Koi in gaal zou ding? - I
Koi in gaal zou ding? - I
WAY2GOD simtu tengteng na bawn un Hundamtu Jesu min in chibai
Hun sawtpi WAY2GOD simlou in ina um ua, hinanleh Pasian hoina toh sim thei kia ding a i um man un Pasian min iphat uhi.
Movie a ina et uh, tangthu a ina za uh GAAL kichi hunhahsa mama tuah lellel ihi ta ziah un i leitung hinkhua, ilungput dan, leh i Pasian toh ikizopna lam tanpha naahtah in hing lawngkha a poi mama mai hi. Tuaziahin bang-to-bang in ikhosata di ve aw chi'n ilung phawng mama mai hi.
Khenkhatte pen gaal veng hita va chilawi pawl toh, naahtah a igaal uh hing sousang ding ahi chia lauthawng pawl toh, igaalte uh hat mama uh tuazong training hoitah a la ahi uh kizou sihva Manipur govt + Central govt pangkhawm nalai ahi chiangin chipawl toh, alelam khat ah eilamten zong training ihoibawl na vevualeh tuaban ah eipanpi ding Mizoram leh gam dangdang um nasamlou ama chilawi pawl toh, pupa hun apat gaalhangte ihi uh zau di umlou chilawi pawl toh, ngaidan tuamtuam, mudan tuamtuam toh i um zengzung uhi.
Tua ngaidan ineite uh pen mihing ihiziah un bang ma adihlou leh apoi a um sih hi. Hinanleh silbangkim ah iPasian ukhu akhatna a ipansah ding uh khu gaallu-gaaltawh a um zousia in imanghil hetlou ding uh ahi kachi nuam hi. Bangziahin adiai?
I tung a vaihawm khu iPasian ahi, Aman i siltuah zousiate uh atheikim sipsep hi. Tuaziahin Pasian in ang gawt hiva, ang taisan hitava ichi sang un, tambang gaal katuah uh nang phalsah naziah (purpose) bang ahiai hing hil in, chi'n iPasian uh buan chiat va ui. Pasian in mailam mulawhlou leh tup-le-ngim neilou in gamtang ngeilou ahi ziahin iMangpa'n asiltup khu idoh khiat sawm ding uh ahi.
Pasian siltup pen gamhoitah hing pia a zalentah a Ama phat-le-bia a, Pasian gam nasepna lam a nasatah leh detdou tah a panlapente gam hing suahsah ut zong himaithei ahi. Ahisihleh kamsiam (Kampudang) toh Pasian bia meimeite, amin a Pasian minlou ahivang a atah a Pasian deilou sil naahtah a bawlte ihiziah ua Pasian in Amite (Atate) ang sepchiil sawm zong himaithei ahi. Ahisihleh gingtu ngaidamna neitheiloute'n khat-le-khat ki ngaidam tuahna dihtah bang ahiai chi hing zilta uhen achi ut ziah a tambang gaal ang tuahsah zong himaithei hi. Tua ngaidan igente sang a thupi zaw Pasian siltup zong um maithei ahi, iMangpa'n aziah dihtah thei ahi. Ama dong vai.
Ngai vawi, Gaalzawna khu Pasian a ahi. Pasian lungtuah mite'n Pasian hatna leh umpina zaal azou ding uhi. Pasian ngaisahlou leh phawhphalou ihi uh kachi sih hi, Pasian lam ingaisah chiatna uhi hinanleh Phatna, biahna, agenthaw mai hilou in muthei ding in khat-le-khat tung ah Pasian deibang ki ngaidamtuahna, kikhongaihtuahna, pankhawmna, kitheisiamtuahna practical in ei apat luangkhe sah chiat tava ui. Tambang khu Pasian in eite apat a ngaahla ahi. Achileh eilawi in bang ding i nomenclature uh kituah maw zen na ding a ihichi buaipi uh, bang ding a ka nam, ka mi, ka ham, chite ihichi tutah vevo uh e? Bang ding a flag thu pou a buai? Bang ding a alemtang hun chiang a sum-le-pai khu Pasian deidan silte sang a pibawl zaw? Bang ding a minphatna (credit) ihi chi dei uh? Lamkai khat ihi leh mawpuahna khat nei ihi a, imawhpuahna pen hoitah in bawl vang ichi sang un lamkai lubawhpen hileng chi itup vevo uh? Minthanna, Letna, Gualzawna kichite khu Pasian lungtuahte a ding ahibou hi chi itheikha naisih uh ama?
Pasian tate ikichi ma uhi, hinanleh Pasian tate lah ah ki daidanna, kituahlouna, kitheisiamtuahlouna, kilangbawlna a um laisia Pasian in itung uah silhoi atupte ang bawlkhiat ding ikinem uh ama? i umdante uh ngaituah tha vengveng lei iMangpa a ding in thasiat huai va maw? Nang leh ke'n i ngaituah maimai leh zong itha zoizou hia. Matthew 18:20 in agen na ah "Kamin a 2 leh 3 na kisuhtuah uleh kei zong ama'u te lah a ka zau hi" achi bang in kituahlou pumpum a ipankhom guigui pen uh Pasian min a 2 leh 3 ki sutuah ihi na di uai? Philippians 2:2 in agenna ah lungsim munkhat a gingtu kichi te umkhom ding a thuhilna akimu hi.
Tuni'n gingtu dihtah in kasi-kahin in zong Pasian min in hi heh achi bang in nang-le-ke'n zong Pasian min a Unity khu tutah ding in kipantha kia vai i Gaalzawna ding un apoimaw hi. kanam, kami, kamin, katawndan, bangdan chite chinawn sih vai Unity detna ding leh Gaalzawna ding in. Aziahpen nam liantah zong Pasian lung atuahlou uleh suhmangthai ahizel bang un iki letsahpi i nam, i ham, i nomenclature te pen Pasian lungtuahlou namte ihi uleh phiatmang hivan in, Pasian zau, Pasian lungtuah nam khat penpen khu i nampi uh hing hi lel ding hi, ei lungkham ngailou. Tuaziahin sildang tampi ipoimaw ngai umnanleh Pasian deidan bang ahiai chi khu ipoimaw ngai penpen uh hisah phot vai, iPasian a lungkim naahleh Gaalzawna khu ei a ahi. i damkhosuahna ding uh poimaw masa ahi tudin mun in.
Khat-le-ni in tambang lungput neilei zong bang phatuam tham di ahia chisih vai, bulpatna umlou a zawna a umtheilou bangin nang leh ke'n pan phot himhim vai... zawna khu Pasian a ahi zel ngal a.
Gaal hing kipat a pat Pasian in ang umpi dan leh ang doupi dante, tampi kang kup ut a um nalai a tuate akia chiah gial maita vai. Tamtan ah zou phot vang. Simtu tengteng tung ah iMangpa'n khahlaw na hing pechiat ta hen.
No comments