Koi in gaal zou ding? - II

WAY2GOD simtu tengteng na bawn un Hundamtu Jesu min in chibai

Koi in Gaal Zou Ding? chi pansan in vol-1 ina gel zouta ua tuni'n aban sutzopna neivai.

I laigel masatna ah GAAL ZAWHNA kichi khu Pasian lungtuah mite a ding ahi a, Pasian zau minamte khu Mangpa'n atoisang ding a, A utleh nampi in asiam ding hi. Hinanleh Pasian zaulou (Pasian deilou bang a gamtang) minamte pen ut hunhun a phiatmang thei dinmun a um ahi chi geldoh zel kawm in ipantheina lamchiat uah igaal uh doukhawm chiat vai. Tuni'n, iMangpa'n eite a dia gaal ang satpi dan neukhat kikum vai.

Geelpha keeilou hinanleh igamsung vaihawmtu, Talpaah (meitei) te'n May 3, 2023 ni in GAAL hing bawlkhum in mulkimhuai tah leh lungsiatna bei in ang bantha (kill) panta ua, inei-ilam suhsiat theithei susia in leh guuh theithei ang na guuhpiah baan uah, i Biahinn te uh ang suhsiatsah zungzung mai ua, zuou leh naal toh igam uh ang laahpiah theina ding un baanthachimit ang sawm ua, adamsunte delmang ang sawm nalai uhi. Tambang a angbawlnate uh igeel chiang in thangtawm ahuai mama mai hi. India govt. in silhoi hing geelpiah nava ichi lai in Central govt. in meitei govt to khut kitutuah kawm in Kuki-Zo kichite hing doukhawm ahi uh chi ing theikhiat apat in beidon ahuai mama mai hi.

Hinanleh silkipah huaikhat khu beidong a i um lai un i Mangpa'n mit a muthei zen a igaal uh ang na doupi ziahin lungkham tuan sih vai. Aziahpen, meitei + central govt. pangkhawm hinanleh eite pen lei-le-van siam Pasian in ang umpi ahi chi manghil sih vai. Bang chidan in a hia?

Pasian panpina leh umpina pen muthei leh mutheilou in i tang uhi:

I gaalte uh pen ei lethum-leli a tam ahi ua, Home Minister nuai a power and forces umteng leh zatthei-zatmaw teng a deidandan in azang ua, India pumpi a lubawhpen Modi in Gujarath a Pangal te zaankhat-zaanni thu a tha chimit asom bang a Biren tungtawn a tha chimit ang sawm uh hinanleh Pasian umpina ziahin bangza ekhat in sina mulkim huaitah tuahnanleh Kuki-Zo nampi pen tutan dam a gaal doutheinalai a Mapangpa'n ang koi ziahin Pasian in thupina tangta hen!

Thautang-thauvui iki tasam ua, tuaziahin i gaalveng mite un apoimaw vilvel chouh chiangin khatvei-nivei kapthuh zel giap uhi. Hinanleh igaalte'n guazu (rain) bangin thautang pen hing kapkhum leng uhi. Tuathamlou in mortal bomb zong naahtah in hing kapkhum uhi. Tuaziahin, i gaalte nangawn in sibei phial ding a ang hisaap lai un eite pen asi khat ama, aliam ni leh thum a ma i umjel sam ua hinanleh igaal langte pen 30-40 lang bang asi toh akisukha ana kiteh zengzung zel uhi. Adiah a ei langte tampi si theina mun ah a mortal bomb te uh pohlou tangpi a, apawh va zuahnate ahi leh mi umlou na mun a te hitangpi zel hi. Pasian umpina a kilatna point khat ahi mai hi. Praise the Lord!

Commando form a hing ki form in, khatveiteng leh police leh army form bang zangin thudih toh vai sai ding bangbangin aguuh-agaal in igam sung hing lut zel in (infiltrating) eite a hing douzel uhi. Hinanleh iMangpa'n igaalveng mite zang in igaalte uh tangtheilou leh tampi silaw zen in ei Kuki-Zo suante ang na humbit zel hi. Adiahin Khamenlok area ah govt sepai te zang in iMangpa'n igaalte uh ang na doupi dante ithei uhi. Tualeh Sugnu area Leisan kholam ah hitaleh mun tuamtuam ah iMangpa'n hing umpi in igaal uh hing doupi ahi chi ithei man un thupina iMangpa ipiah uhi!

Gaal ziahin hinna tamtah liammangta nanleh igaal langte hinna taan khu Central in poisa mama mai in a lang a hinanleh Kuki-Zo lamte isi chiang un Central in poisalou hi aziahpen ei Christian te thagam na ding a panlate ahi zaw uhi. Naa sa in thangtawm nanlei ibolthei a um sia a hasiat huai mama mai hi. Tuaziahin eite hing panpi ding umsun khu Pasian ahita giap hi chi geelpha kia vai.

Tuni'n dam i ut a, GAALZAW i ut leh iMangpa toh pankhom ding dan naahtah in suiphakia vai. Ngaivawi, igaal doupen ukhu Kuki-Zo te gaal chouh ahi sih a iMangpa gaal zong ahi. Aziahpen Kuki-Zo tate chouh khu athuahkha ihi sih ua, minsetah a vut-vai kisuah ibiahinn te uh ziahin iMangpa a minsia a, simmaw in a um a naahtah in athuah ahi. Tampen Late no. 115 a imu bangin ginglou mite'n Israel te kung a na Pasian uh hoi a um ahiai? a imu khat ama, avaah jual khat ama, chia simmaw tah a, a enghou uhtoh kibangkasa hi. Tuaziahin, tuni'n lunggel tha kia vai ibawn un, tambang a iMangpa'n simmaw, enghou atuahna khu nang leh kei giitlou ziah zong hikha maithei ahi. iMangpa toh gaal doukhom ding ichi tahtah leh, koipou tuni'n iMangpa ah kipekhetha kiavai, mimal kisuhdihna apoimaw ei? oleh nampi kisuhdihna apoimaw ei? Tambang kisuhsiangthouna idei tahtah leh mani angmasialnate, minthan utnate, let-utnate, credit deinate leh a dangdang te eima apat ipaikhiat ding uh ahi. Tua hileh imimal-ihagau hinnkhua zong hing hoi van, nampi khankhua zong hing dih van, Pasian umpina leh A haatna zaal izouthei panta ding uhi. Pasian toh kilepna umlou in gaalzawna umtheilou ding hi. Tam ahi hagau leh tahsa a gaalzawna khu.

Simtu tengteng iMangpa'n hing umpi hing kemzingta hen.

Similar writings

Editorials