If you are to Choose: Family Vs Everything Else

If you are to Choose: Family Vs Everything Else

Pastor Dr. Dongzathawng

Devitional # 3 ( vol 4)

Fellowship of Thirsty Souls n Hungry Hearts

Thirsty member te Shillong jing nisuah etlawm tah apat in Shalom!

Mangpan tuni Monday ni in ama mercy leh grace toh hing tuamdimta hen!! Hilou tukal hing tung ding sung phutngap huailou hi. 

Text: 1 Chron 16: 43

  “Then all the people departed, every man to his house and David returned to bless his house.”

Katapa a class lutta. Kei a school compound a singkung kilawm tah leh vasa ham te lai ah nisa awi kawm in himi msg hing gial vang.

I maban election ding ka gelh sawm chiang bangma ka geldoh thei sih hi. Ahiin neukhat hung gen vang.

Koikoi kai in bang chi kai leh jong I gam humbit ding, i maban saupi ading a geel leh i mi inamte thakheel a Assembly a ki tom ngam. Podium tum ngam English nal deuh zang a haang ngam, ki resign ngam leader vang dei huai ta e!

Thautawite'n gam a it tahtah uleh hibang bawlngam dingte tawsawn uleh…ahilou leh lah um maimai in ana gal-et uleh. Munkhat a capture thei in bial dang a free and fair kichi khu fair lou veve hi.

Mipi te Vs mipi te thakheel a kipia gam leh nam ading a pang tangvalte ki nohtua chivang hing umda mai leh dei huai e!

Topic a lut vai.

Inkuan etkawl na lawching mama in mun dang a lawsam chi toh mun dang a law ching mama in insung etkawlna ki chaivawt chi um hi.

Pu Tongthang in pu Thangkhenkhup shini in “kou tegel pen insung a 0%, pualam a 100%” achi kaja kha hi. Inn sung a 100% mu ding in pualam a 0% mu ding toh Insung a 0% muding in pualam a 100% muding khu na teel ding hileh khoi na teel jaw diai? Chi ahi tuni i houlim na ding.

Ajiehpen koima in i duthusam bang in ki hingjoulou hi. Mihing khat hinkhua tomnou sung in thil jousie ki boljoulou hi. Limit kinei hi.

Billy Graham tanpha jong atanu khu apa tung a lungkimlou dan gen hi. Kum 1000 lenggam ah ka pa toh hun tuam mong mong ka mang ut hi. Leitung a ang piahlou hunte ka ki sang sah ut chi hi. Ajiehpen Billy in kumkhat sung in ha 6 mai a family toh hun mang jou giap hi. Billy Graham mama in jong a bul a kipan tha kia ding hileh a family leh Pasian toh kipawlna hun tampi peding in gen hi.

Ahiin mihingte social being ihina ah khawtang vai, hattuam vai a koima theilou koi ma ngaisahlou a um khu thuah hah kisa hi. En mi ipoimaw bang a ei jong mipoimawna iva kilah ngai hi. Ahin eimi pen khawtaang mite patat leh thei a um khu nop kisa hi. 

Hithei henla inn sung a poimaw na teng a pang jou, hattuam a jong ki jang veve, khawtang a jong a fel pen hilei ut huai hi. Ahiin hibang dinmun a um ding in mi million 10  lah a  1/2 vel um giap ding a, tua te lah ah kipang jou lou hi. Billy Graham nachiang apan joulou leh nang leh kei adin hamsa mai thei hi.

Hattuam alah a ki jang pen hiding, mi patat pen hiding, khawtang alah mite ngainat pen afel pen hiding, inn sung a ji leh tate ading a lah pa hoi, pasal hoi hiveve ding chi pen a ham sa mama ahi.

Hibang hisawm pasal in atheilou kal in aji leh atate khu a thuah tampen hijel hi. Aziahpen ama'n bang dinmun atun lamlam jong theijou nonlou khop in buai ta hi.

A left over energy, time khu a ji leh atate ading in pia in aji leh atate ama kep ngaite khu ama jong kep ngai, jen leh thawih ngai ta hi. Liam sa, gim sa, lungthah sa, guallelsa, maijumsa, puahgih toh inn atun chiang atate leh aji  it  khu gen ding bei a hepi huai ahi ta.

Atate leh aji ama nourish ngai ana ngahte khu ama nourish bawl ding in lam enta hi. Hiah nu pa kal buaina hing ki pan chet hi. Aban khu gen da tavai. Inkuan leh pualam khu balance tah ki jang thei leh chuh hoi ding hia. 50-50 or 70-50 or 50-70 bang a hom thei jong um mai thei hi.

 

Ahin khoilam teitei khat percent ipiah tawm na lam penpen ana vang (hole) jel hi. Khujieh in teel thei hilechin ichi khu ahi. Ajiehpen i hun piah na tam pen khu khang in hinpha ding hi. I percent piahtamna penpen ah i ga nei ding hi.

Tualeh i topic ua Family Vs every thing else ichi chiang: office leh nehsuina, khawtang leh politics, hattuam leh Pasian nasep, thumkhawmna, missionary nasep tanpha jong huam hi. Everything else kichi himei hi.

Biahinn kaikai, thumkhawmna paipai, Pasian thu gen a jinjin, progm dim chite jong huam hi. Eima deiteel ahi. Adang chuh ki adjust thei ahinvang i neh suina, i kham chuh alou thei lou ichi maithei hi. Or Pasian thu chuh ki adjust theilou ichi maithei. Ken chuh hijong ki adjust thei ahi chi Pasian Thu pansan in ka gen mgam hi.

Family 1st a na koi in sum tamtam na, sum tamthei pen loi lut ding, record hoi ding, promotion gang ding or Hagau lam a lawching ding, hagau mang man ding, mite'n speaker a hing chialchial ding etc ahileh chuh family no 1 hinonlou china ahi.

Family khualna promotion lalou, family khualna over time work pen lalou, family khualna boss pa deisahna jong tanglou khop a party leh picnicte juilou, family khualna progm lalou, komiti a pailou, thumna teng a pailou, pastor pa maipha enlou, hattuam thei siamlou tel jaw chivel jong ang um ding ahi Family i khual tahtah leh. Sacrifice ahi a key. Khat lam teitei minus or sacrifice di china ahi. 

Pualam a i lawching sawm leh lah innsung nutsiat tam ding, inkuan a hun piah tawm ding,  ki buai sah ding, i file lompi inn a puah lut jing ding china ahi. Ajiehpen mun jousie a patatna mikhat in ki law thei lou hi. Ji leh tate patat maw Bose te, pastor te or khawlai mite patat chi ahi. Hattuam jong minpha, khawtang alah min pha pen dei inn sung te lah hoideu a enkol jou chi khu hithei lou hi. 

Nam leh gam adia min hoi mama a hivang a a inkuan kichai. Ahaah asuan sui ding umlou. Hattuam founder minthang mama ahivang a atate khamthei guithei a si bei chite gen ding i hau uhi. Hepi huai leh khasiat huai leaderte i genthei tam hi.

Christian galhang khat  leh ni tanchin en jual va u.  Pastor Thugen minthang khat atapa valnou panpan umdan hoinonlou chi athei chiang Pasian thugen minthang kum 2/3 ading progm nei sa hina pi a progm teng cancel in, a sepna ki tawp in, atapa teenager aha sua utlou jiehin singtang khawta khat ah koima theilou in pastor na sem a atapa ading in hunpia in atapa hunkhia hi.

 

Tua atapa khu James Dobson hing suah hi. American Christian history a the most influencial Christian leader 3 ki tel nalah ah James Dobson 1 in pang hi. Billy Graham toh a vote mu kibang hi.Dr Dobson in innkuan million a sim hunkhia hi. Ajiehpen apa in ama minthang, ama ministry, ama passion leh utna, ama progm teng sacrifice khop in atapa del jaw hi.

Tua ma bangin nupi khat jong Pasian thu gensiam revivalist ahi. Hinanleh tuami khawlsan in apasal thuap ding in kisa hi. Athumna khu khatvei chiangin atapa in ama thakheel in Pasian thu namte kung ah hing tangkou ding chi ahi. Atapa khu thugen hangsan John Hagee ahi.Tunin atapa John Hagee in million a sim namte kung ah Hangsan tah in Pasian thu tangkou hi.

Unaute hia atung ate apat Mangpa'n i vision uh hing suhsausahta hen!

Nang nupi koima theilou in na tate toh naat niainuai in koi ma patat lohlou in aning khat ah ki ngaisie deu in na um mai thei hi. Nang mi pa na talent na vission, na siamnate society leh hattuam a jang theilou in na inn sung baang fit square neunou ah na talent teng na phum mang na ki sa mai thei.

Maban a inam ading a James Dobson, John Hagee te bawl ding a Pasian in na kot teng ahing khahsah a na tate toh a khum chip himai thei hi.

Bill Gather Te Women home  coming a  nu ta ni: “You are my ministry” chia ki dawng tua tegel i et leh mittui potlou theilou hi. I ministry lianpen khu inn sung a i ji i tate ahilam thei tha vai.

I text un: David khu innlam ah a family te gualzawl ding in a kile kia chi ahi. Nang mi pa aw, nang mi nu aw, in lam ah ki le kia ta aw. Na ta in hing ngah hi. Na ji na ta in nang gualzawl na ngai in hing ngah hi.

Kholai a milah  a gen ding jong theilou, koima thulaah jong hilou, miteng chiammuina leh mite nual, koima poimaw jong hilou, nopsalou sasa a milah a na toutou sangin na scooter kimat in innlam juanin tai vengveng lechin na ji na tate lamdang sa in kipah in ki tawm ding uhi.

Tunia na MLA jui pa in nang innsung hing vahsahlou ding hi. Nang tate hing hil sahlou ding hi. Nang nam leh hattuam vai a na taitai lai in maban a i nam Leader tahtah leh hattuam siamphatu ding te'n na inn ah hing na ngah liiliai uhi. Tuate khu na tate ahi uhi.

Hun sah ta vai kei jong inn juan in tai ta vang. Ka battery bei di hita.

Mangpan inn lam a i innkuante chiat vangbuah ding in hing kile sah ta hen!

Topa thupha!

Tate Taimangpi Ngai Hi