NU-LE-PA IN A TATE TAIMANGPI
NU-LE-PA IN A TATE TAIMANGPI
Text: 2 Chronicles 22: 10-12
Devotional 57 ( Vol 3)
Fellowship of Thirsty Souls and Hungry Hearts
Thirsty souls simtute jingpha!
Kou zong Covid 19 ichi chi uh vei man deh tah ung e. Pasian hepina toh kepbit in kana um uhi.
Hih CORONA Khu bei nailou hi. I kiginlou lai un hing zialzial, hing khoihkhoih thei nalai hi.
Sepgual nop tah ah ka bawl lai un kou zong exposure hikha ung. Hinanleh ana lakhalou hamham ung chi ding hi, Ka test result uh hoi vang lah, Symtom zong um samlou. Pasian hepina jal in. Ahiin self quarantine bang ahi chi ka family in ka jil khia uhi. Tu in chu free tah in ka um theita uhi. Baihtuan sih e ki quarantine maimai zong.
“When Athaliah the mother of Ahaziah saw that her son was dead, she proceeded to destroy the whole royal family of the house of Judah. But Jehosheba, the daughter of King Jehoram, took Joash son of Ahaziah and stole him away from among the royal princes who were about to be murdered, and put him and his nurse in a bedroom. Because Jehosheba, the daughter of King Jehoram and wife of the priest Jehoiada, was Ahaziah’s sister, she hid the child from Athaliah so she could not kill him. He remained hidden with them at the temple of God for six years while Athaliah ruled the land.”
Hia atung a tangthu i et leh chijat huai hi. A pi in atuteng thagam sawm chi dan ahi. Kumpi pa Ahaziah khu a shi joujou in a nu in kumpi hi ut in a tu atate thagam siang sawm chi dan ahi. Tua jou chiang a ama lengnu apang sawm hita jen hi. A lamdang lou hi Hia Dawisie bang Athaliah khu Jezebel tanu ahi. A lamdanglou ahi. “Tanu in anu suun hi”- “sakhi api asan leh anou san” chi khu dih jel mai hi.
Hibang a hiamngam tah a leng inkuante*( royal family line) a thagam sawm lai in Jehosheba, kichi khat (ei ham in gen lei ani te khat), kumpipa sanggamnu, tualeh siampu Jehoiada ji (Tulai hileh pastor Jehoiada) ana hi kha hi. Tua ani Jehosheba (Pastor nu) in Lengpa tapa naungeh Joash (kum 1 vel hipan ding) khu gu khia in, tai mang pi in, a enkawl ding nurse khat toh temple sung ah kum 6 sung phual chip den uhi.
Hilchian tute gendan in himi Dawsie numei nu'n atha sawm naungeh kumpi te inkuan a goulua tu ding, David suan, Messiah hing pianna ding a gouluatu ding umsun khu ahi ta hi.. Hi naungah Joash aki tha leh David suan bei ding china ahi( JMacArthur Study Bible, 626). Tualeh hibang a Royal Family, Messiah khanggui Setan ana suh buai sawm khu sil lamdang hilou hi. Hinanleh Pasian in ana humbit jing hi. Setan khu ana gimthawn maimai suah jel hi.
Warren Wiersbe gendan in “Humanly speaking, were it not for the courageous service of the high priest, Jehoiada, and his wife Jehosheba, the Davidic dynasty would have come to an end” (The Wiersbe Bible Commentary, 696).
Tualeh Jehosheba tungtang ah Wiersbe in “That such a godly woman should come out of that family is a miracle of the GRACE of God” chi hi. Ahab leh Jezebel mi hoilou tawp, inkuan gilou, Setan vanjat hibang inn sung mial apat a numei Jehosheba, Pasian vanjat thei, Siampi lianpa ji thei ding ang piang khiah pen Pasian hepina lamdang leh kiching etsahna ahijel hi.
Himi Grace in bangma bawlmaw neilou hi, Niin leh mial lah apat thil manpha tahtah hing la khia khia mai hi. Kinepna umlou mun apat in Lametna vah hing kikap khia sah jing hi.
Naupang Joash kum 6 vingveng Temple ang ki phualjou in, a pi Athaliah chuh kum 6 lal ngei ma hi. A hiin sawtlou nung in Jehoiada leh aji Jehosheba felna jieh in Bible a kumpi naupang penpen Joash kum 7 khu Judah kumpi ding in phuankhiah leh namdet in hing um hi. Tuachiin gam pumpi ah revival leh reformation hing tung hi. Dawise kumpinu Athaliah maban pen Bible ah ki et mai tavai (2 Chronicle 23 ah).
Ahiin tunia igen ut khu Dawimangpa’n I tate Royal family line, maban a kumpi ding, kumpi huang a sem ding, Siampi ding, Pasian phatding, Pasian vanjat ding i ta neute: apiang nailou toh apiangsa toh hing suhmang sawm in theitawp sua hi. Jauhuai mama bang hi. Tua itate humbitna ding in pate'n bang chi'n pan i la uai? chi ahi.
1950s lai in I gam a gingtu masa pen pu Thangkai leh Lungpau te'n ka khua uah Hinna thupha ana gen ngei uhi. Tua mun ah ka Pa’n Hinna thupha Gospel ana sang hi. Jesu ging ding leh jui ding a thupuhna ala a Jesu min a Baptisma Tuiphumna alahjou in a thupuhna la in bang tan hahsatna ahinkhua a, amaban a hing tut ding ahia chi a thei khalou maithei hi.
Khum lai a Ka inn uh khu khawsung a Ju ki dawnna mun pi ahi.. Ka pu leh ka piin kou neu lai tan uh zong ju huan nalai ua, jankhua in khawsung a ju dawnna mun pi hinalai hi. Ka pun Sutkhuam a, a pusa pasa abiah zong ka thei mama nalai hi.
Ka pu’n a pasien biahna anei ding chiang atapa tah pen ka pa poimaw hi. Ka pan judawn atop san ban ah tu in apa biahna a nutsia ngaita hi. Hih hun chiang ka pa gamlah (uzuah ) lam ah va ki phual mang jel hi. Ka pu’n va sui/jong kawikawi in, ha han in han hi, A mulou chiang leitang, suangtang vel in sep jel hi. Tualai in kapa khu Valnou hinalai hi.
Tu kum tampi jouin tua jaan a hagau gam a thil piang, mial leh vah ki dou (conflict) spiritual warfare- koute hagau kituna ding a hagau lam gal tung khu tu lamlam in ka nua et kia hi. Nasatah in Ka Reflect hi.
Tuajaan ka pa’n ka pu dawipiahna taisan a Jesu jieh a inn atai mang a gamlah ava ki jaan phual lai in kei leh ka sanggam teng khu himi dawibiahna, apat in ang na taimangpi, ana ki but mang pi, ana ki phual mang pi ana hi hi. Tua jaan a ang na taimangpi lai in kou unau mai hilou in, ka ji ka tate, ka u tate leh ka khang pumpi un hing na taimangpi ana hi hi. Tuajaan a a kiphual mang na mun ah kou teng zong ka tel kha uhi. Ka tate zong pang kha uhi.
Ajieh pen Hebrew 7: 10 ah “When Mechizedek met Abraham, Levi was still in the body of his ancestor (tua khu Abraham)’
Umjie khu Abraham in Levi te ding som a khat ana piah in Levi khu piang nai sai lou hi. Hinanleh Apu sawn Abraham tahsa sung ah Levi ana um ta hi.
Tua mabang in ka pa’n in gamlah ah jaan nuai a ka pu dawibiahna pat ang taimang pi lai in ama valnou nalai hi. Hinanleh atahsa a kou atate a tute teng zong ka na um ta uhi. Tua atahsa ana pua te lai ah kou unauteng, ka tate uh leh ka ta sawn te ding uh tanpha hing na taimang pi in, hing na hum bit hi.
Ka gensawm i mat tah uh ka gingta hi. Tunnin Melma Setan Athaliah in Royal Line-kumpi inkuan, siampi khang suhtanna dingin bangja tah in pan ala tai? Niteng in himi khanggui hing sattan sah sawm hi. Pa tampi, nu tamp in hi khanggui kembit jounonlou in a ta leh a tu khang a gen ding bei in, ama uh tanpha mangthai uhi.
Ahin Jehosheba bang a nu hangsan, leh Jonadabte bang a pa hangsan bangjat e khatte'n Koi Athaliah, Koi Nehbuknezer, koi Ahah, Koi Egypt sepaite, koi kumpi jaulou in atate uh bitna dingin ahinna uh kiphal in Pasian minin ana pangin, Pasian ana bel uhi. Tuate'n ama uh mai ki hunkhialou in, ata hing piang ding, a tu piang nailoute tanpha ana hunkhia in ana humbit uhi.
1997 I gam buai lai in, pa tampi in a tate uh Moirang, Imphal, Shillong, Delhi, Mizoram ah i taimang pi uhi. Tuni kum 20 jou in hia a inkuan taimangpite apat officer tampi, pastor tampi hing piang khia in city tuamtuam ah hattuam tampi hing ding khia hi.
1997 a unau kal buaina beita, gal beita ahiin Setan gal bei naisailou hi. Aman Eden huan apat in himi inkuan leh khanggui siang - kumpi khanggui, siampi khanggui suh buai sawm jing a, suhtan sawm jing hi. Hinanleh Pasian in himi khanggui khu kum asangsang a sim in hing enkai suhsuh hi. Tua a etkolte lai a ka pang khah jiehin amin ka phatphat hi.
Hinanleh Pasian mihing lei a kisiam, sa leh sisante jang in humbit jel hi. Tua ami jatte Jehosheba te Jochebed te bang tuni'n poimaw jing hi.
Tunin pate kipan vai! I tate mun hoilou, mun bitlou, mun sianglou apat a taimangpi hunta hi. Ajieh pen i taimangpi lou leh i inkuan khanggui kisie ding hi. I khang mang ding hita. A chang ah hattuam ginalou, tate ading a bangma hagau ann umlou, politics ngen a dim, siatna khuhpi, lungsim natna leh hagau liamna hattuamte apat zong tate taimangpi ngai ding hi.
Lot in atate Sodom apat a taimang pi ding hina pei Sodom lam a jot pi jiehin a khang mangthai law hi. chijat huai tah in a khangthu nusia hi.
Abraham in ana taimang pipi jieh in tuni tan in Eite Abraham jarjoute isuah uhi. *Jacob in zong atate ana taimang pipi mai hi. Khujiehin gualjawlna nam, Psaian namtel nam hing siam khia hi.
I tate munbitlou, mun sianglou, mun niin apat taimangpi ngamnu hangsan, pa hangsante khoi a um ta? Asuahsuah suah hen, Ka tate abit ngai hi chia Jehoshepa bang numei hangsan poimaw hi.
Tunin tangval siangthou leh Pasian suh lungkim sawm nungahte tunia mite ading mawl huai leh changkang huailou hinanleh ju leh sa, sex leh khawvel sil thanghuaite a na kikep siangthoua, na ngen a mite chiamnuina na um leh kipah in. Maban a apiang nailou natate kembit leh taimangpi pa, nu nahi jing hi. Nang tuni a munsianglou leh bitlou a na ki buallou a, kichup tah a Pasian min a na dinlai in apiang nailou natu natate na kim ah um ua, na pang ah ki phual lilei uhi. Amau ua ding a munbit tah bawlsah na hi chi thei jing in.
Joseph in Potipher ji nu apat a tai mang lai in, atate Ephraim leh Mannasseh leh aban a hing piang nalai ding a Joseph sawnte zong taimangpi ahi jing hi.
Ka pa in ka pianma peh ua, judawn leh dawibiahna apat jaan nuai a gammang lah ana taimang pi jieh in tunin koute munbit ah ka um ua, ka tate zong munbit ah hing umsah hi
Kipah ing e Pa. Koute khualna hibang a pan na nalah a, gimna tampi na na thuahjiehin koute tunin Kumpi pa nasem in kumpi huang ah khawsa unge! Khanggui hamsie, buah leh niin apat in khanggui siang leh damna hing suahsah hi.
Jehosheba in Naungeh Joash khu mun jauhuai apat ahinna phal jen a ana taimangpi ban ah Temple ah kum 6 sung phual chip hi. Wiersbe commentary in “As he grew older, he mingled and played with the other children in the temple area and was not recognized as an heir to the throne” ( 699)
Aw, Pasian biah bu, Pasian umna mun a tate phual chip khu bangja tahin abit ta diei? Kumpi gilou nu in kum 6 sung in thahsawm in suisui nanleh Pasian inn temple ah muang tah leh bit tah in kepbit in um hi. Pasian temple a koima jau leh lau in um ngeilou hi, Ajiehpen ama Haliim nuai ah muanna leh bitna um hi. Himun ah hih naupang khu siempi tate zong Zion lasa in nuam tah in um uhi. Pasian biabiah Korah tate, Asaph tate phatna luangkhawm nuai a khang khia naupangte lah a pang kha ahita hi.
Child Psychologist ten naupang kum 6 nuai lam ki etkol dan a mailam a hina ding tengteng kinga hi dan, apoimaw dan agente uh tuni'n gen mansih vai. Tomkim a i genthei sun khu kum 6 nuai lam a munbit a umkha naupang khu mi hampha ahi. Tualeh Atate kum 6 nuailam mun bit a umsah nu leh pa khu mi hampha sem ahi uhi.
Mangpan itate, i khangsawnte taimangpi ta ding in GRACE hing pia chiat ta hen!
Topa Thupha
Shalom!
No comments