GNFA: Tripura Mission Field January 2022 Report Tomkim

GNFA: Tripura Mission Field January 2022 Report Tomkim

Amasapen in I Toupa Jesu Khrist' min in chibai ka hon buuk uhi!

Kipahthu genna leh thumpih ding point tamlou ka hon taaklang nawn uhi:

  1. Non thumpihna uh leh non supportna te uh ziak in ministry in maban sawn zel in, kikhopna, counseling, innvehna leh damlou thumsakna te thoveng tak in sutzop theih in om a kipahthu gen ni.

  2. Tukha in mission field a damlou omte PHC puak tung zen omlou in thumna leh damdoi piak in hong dam khe thei ua kipahthu genni.

  3. Tukha sung in innkuan 5 kikhoppihna leh mimal 4 houlimpihna (Counseling) ki nei thei  a, tukha in tuailai numei khat unaunu Zimba Reang Khristian ah hong kipe thak nawn a, thumpih kawm in kipahthu gen ni.

  4. Lim a naungek imuh pen Basurani tapa ahi a, kum tampi nau nei lou a om thumna tungtawn a neih ahih dan amah mah mah in gen hi. Nau min phuah in om a, Isaac chih ahi. A pasal pen gingtu hinailou ahih man in thuumna ah phawk ni.

  5. Photo a green a ki giit kual tegel Pa Talbong leh Nu Joinkati Reang te nupa ahi ua, nupa kaal buaina ziak in Hausa te tungtawn in kikhen uhi. Nu Joinkati pen church member ahi a, a pasal leng Khristian a hong kipia in, kisiik in saptuam te kiang ah a zi toh ki gawm kiik uut ahih dan a hong gen dung zui in, nupa counseling hoihtak a kipia in, Pathian' min toh gawm kiikna ki nei hi. Khristian innkuan a hon bawl khiak theihna ding un thumpih ni.

  6. Babujoy Reang in Activa lei thak a, Pathian kiang ah latna ki nei hi. Saptuam member te lak a gari nei thak leh ki laan kha masa pen ahi. Kipahthu genpih ni.

  7. Photo a imuh bang in tuailai te laa zilna Monday leh Wednesday in ki neihpih zel a, Friday nitak in naupang te leh tuailaite te kikhopna ki neihpih a, Saturday nitak in thuum khawmna ki nei a, Sunday mipi kikhopna in hun ki zang zel hi. Hiai hun te a gingtute'n khalam vualzawlna tampi a muh theihna ding un thum ni.

  8. Mission Field a Biakinn 80% phial bang zoh in omta hi. Tu'n window kua(9) leh kongkhaak (door) thum in sam a, huai ban ah tuang, ceiling leh verandah in sam lai hi. Zohkhiak theih ahih na ding in thuum ni.

  9. Primary school: Nursery, LKG leh UKG tan beek pat ki sawm a, khosung a teacher laak theih ding laisiam omlou ahih man in, teacher dia i laak te mission center a om ngai ding a, missionary teacher te om na ding quarter room 3 beek lamkhiak theih lunggulh huai petmah a, thuumna ah phawk ni. 

  10. Kei leh ka seppih Pa Anonto Reang leh Pa Rindik Reang te a dia honna thuumpih zel ding in kon ngen ua, mialnuai a tu kha mangthang tampi te'n khalam vaak a hon muh ua, Khrist nungzui a hong suah zel theihna ding un honna thumpih zel un aw.


Toupa'n hon vualzawl hen!




Khrist aa dia semkhawm

B. Thang Ngaihte & Ching
Good News For All (GNFA), North Tripura
Ph. 8974099164



View More Photos







No comments

Powered by Blogger.