HINMAN UMLOU NA KISAKHA ZEL EI? Part - V
HINMAN UMLOU NA KISAKHA ZEL EI? Part - V
WAY2GOD
WAY2GOD simtu zousia Paisan min in chibai.
Tualeh tuni'n tam i topic uh Part - V ah i ngahsawm ta ding uhi. Pasian thu ahi bangtah a thezaah ahi thei zel na ding in hing na thumpi zel ding in simtu zousia Pasian min in kang ngen masa hi.
Mihing pen khatvei si teitei ding a guatsa ahi a tuazou pen thukhenna in azui ding hi (Heb 9:27). Tuaziahin leitung idamsung a Pasian mapui bangbang a kalsuan khu idamsan ahi hi. I damlai sung a i siltuahte leh i siltuah dan kibang vehlou hi. Genkhawm zual vai.
Natna, lungkhamna, beidonna, mangbatna, vangsiatna, gimthuahna, gensiat-bawlsiat nate michin phial in ki tuahkha hi. Tambang hahsatna te hingpiandohna thum a um a, tuate khu KHELNA HING KIPATNA THUMTE chi'n zong agenthei ding hi. Tuate ahi leh (1) Pasian program leh mapuina itheisiamlou ziah leh i pomsiamlou nate ziah in zong ahi ut mama hi. (2) Satan natoh/heemnate ziahin zong genthei-hahsatna nasatah in ituah uhi. (3) Ei mama in tamte gel pomdan dih a ipomlou ziah leh peldan dihtah a i pel lou ziah in zong ahi ut nuam mama hi.
Khatna: Pasian program (Pasian hing pui dan) pen mihingte thuneina kheel lam ahi. Tuaziahin, ithuneina umlouna mun a siltungte ahi bangbang a pomsiam mi leh Pasian kung a thunuailut tah a, Pasian toh kilepna bol mi khu leitung a mi hampha penpente ahi. Tambang a hing piantheina ding in gintatna (faith/believe) khu a kot honna chabi ahi. A simple theipen a gen in, iMangpan Bible a agensate pomdet leh zui ding hilel ahi.
Nina: Pasian mapui dan zousia khu ihoina ding leh ikhantou na ding ahi a hinanleh Satan na tohna zousia khu i kiatngiamna ding leh dana-kana ding lam ngen ahi. Tuaziahin, Satan in ipu-ipa Adam apat in michin zousia tung ah gitlouna chiha (gene) tungtawn a kilaw sonson ding in nna asemzouta a, thamlou in i khoheina chinteng leh mite lungsung mialsah in thu-le-la adihloulou a heikawi in, Pasian deibang kilepna umtheina ding mun ah siatna leh kibalzaahna apiangsah zaw leng hi. Tambangte ziahin unau laiguizomte zong melma suah khaleng hi. Hinanleh Pasian in 1 Cor. 10:13 na ah, "Mihing thuohzoulou solna na tung uah atung ngai nai sih, ..... Aman na thuoh zoulou uh solna na tuah ding uh aphal sih ding hi; na thuohzouna ding un solna apat suotatna lampi ahing bawlpiah zaw ding hi," achi hi. Tambang thute izaahtah chiangin Satan henkol apan iMangpan hing suatasahta chi achiang mama mai a kipah um leh hamuan ahuai mama hi.
Thumna: Pasian in eite hoina dia ang mapui dan i theisiamlou ziah un leh Satan in i siat theina ding a pan alaah dante baan ah eima ngelngel in tuate bang chin ihinkhua ah ipaipi ei (i solve ei) chi khu sil poimaw mama khat ahi kia hi. Aziahpen, atung a igensa mabangin mihing thuazoulou ding khop solna tung kha nailou leh tung lou ding, tuaban ah hahsa isah mama leh zong suatatna lampi hing bol sah nalai ahi ziahin, eima khut ah bangtan ekhat a um peetmah hi chi achiang hi. Etsahna ding in: mit utnate, tahsa utnate, thasiatnate, engsiatnate, bolsiatnate leh adangdangte khu Satan apan ahi a, tualeh ithuneina kheel a sina-lusunna te, kialte, nat hilengte leh adangdang te pen Pasian apan hi a, tuate tengteng iMangpan, Ama muang pum a ithuah aphal a, thuahzouna zong ang peta hi chi manghil sih vai.
Tambang siltuah mihing in niteng in i sual leng uhi. Khumziahin ithuneina tellou hun ah iMangpa mai ah ki surrender vai in, Ama deibang in ki puihuai sah va ui. Tualeh Satan natoh ziah a pulam apat bolsiatna leh gimthuahna baan ah eima apat hing piangdoh zel lungsim siatna leh khaatna te khu Pasian ma kipuisahna chouh zaal in izou giap ding uhi.
Tuaziahin, i siltuahte vang a beidong mai leh kingaisia a decision topna la mailou a panthah iMangpa Pasian a ilaahthah zel uh poimaw peetmah ahi. Aziahpen iMangpa'n tambang hahsatna huaisia tawp zozouna mihingte kung ah apeta hi chi thei vai. Zouzou mama sing ichi leh vang eima apat tupna tahtah umlou china ahizaw ding hi. Tambang a zozouna step ichi khu ahi leh Pasian toh pangkhawm a zawna ahi: Pasian a ki nga, Pasian ki mapuisah (Pasian deibang chouh a kalsuan china zong ahi). Pasian toh pankhawmtheina ding in ama toh kizop masat ngai hi. Pasian toh kizopna lampi umsun khu Pasian mai a ki surrender a, bolkhelnate kisia a topsan vengveng a Pasian deibang chouh bolta ding a ngaidam ngen a, lunggel leh hindan ki henlamdanna khu ahi.
Pasian a bulpanthah a, leitung a igalsat uh tahsa leh sisan ahisih a, vaihawmna dihlou, thuneina dihlou te ahizaw hi. Tambang galsatna pen hahsa nanleh Pasian pangpou lei idouzou ngei ding uhi. Gualzou ngei ding in Mangpan simtu tengteng leh pan lathah ding a kipankhe tengteng tung ah athupha nibang hing tangden sahta hen.
No comments