HINMAN UMLOU NA KISAKHA ZEL EI? Part - I
WAY2GOD
Na hinkhua ah, lungkham-mangbat, leh ki ngaisiat vungvung hun na tuahkha tai?
Kenvang kana tuahkhata hi, khumziahin leitung ah hinman um sih e zong kana chi
kha hi. Hinanleh Pasian hoina, iitna, leh lemgel siamnate ziahin tunitan dam
in ka um nalai hi. Tamlou hing share zual vang aw?
Ki ngaisiatna hing kipatna khu eima gitlouna, tatkhelna, bawlkhelna, leh
hinkhua a tuasiat-vangsiat ituahkha te ziahin ahi ut deu hi. Tamteng baanah
Pasian mapui dan itheisiamlou ziah zong ahi ut mama hi. Tuni'n eima khelna
ziah a kingaisiatna lam gen vai.
Pasian deilou bang silte bawl khu
hoi nanleh
khelna ahi (Thamlou in Pasian toh ki melmaatna ahi). Pasian
deilou bang silte ibawl ziah in Amatoh ki melma leh ki dou ihita uhi. Tamte
ziahin ihinkhua pen nopsatlouna toh apum dimta hi. Biahinn ikai a miteng in i
gitlouna mu un i nunglam apat hing dapkawh uh hileh kilawm in lunggel ang um
panta a. Mi kihoudap imu leh ang gensia hidi'n lunggel inei paita mai uhi.
Sermon ingai leh ei kawhna a kigen bang in iza ua, deisahtah a khat in
itanchin ang kan chiangin nou bang na hituam uai? chi in lungsim
gilou i paaipai uhi.
Tambang zousia khu eima khelna ziah a sil umte ahi zaw hi. Aziahpen lungsim
hoilou ang neisah a, koima theipi lou pi in lungtang sou vitvit in bang i
umkha leng uhi. Thamlou in i sep i bawl taphot ah miten hing thangsiat in, a
dihloulou a hing gelgawt uh hileh a kilawm hi. Mite'n i umdan lamdang sa in
gen leh sah ang neitah chiang un tuasang in naahpi in ilungthah deudeu ua,
kinuahtuah leh kilungthahtuah in i um leng uhi. Hoilouna pen eima apat hing
piang ahi a, tuapen Pasian thu hinpilou na ziah ahileltah hi. Aleh bang chiin
i siamhoita di uai? Point khat leh ni gen zual vai.
Pasian thupina di'n hing gen vang. Tambang hun katuahlai in biahinn ah laapui
in bang ka pang a, koima theipi lou in aguuh in zum mama leh hagaulam gawh
viamvuam in ka umkha leng hi. Tambang hinkhua tuahpumpum a kikhopna leh Pasian
thulam ka khawlsan tuanlouna aziah ahi leh Pasian ta ka hita a, ka khelna te
ziah a zumna leh mualphouna ka tuahte ziah a ka Pasian apat taimangthei ka
hituan sih hi ka chi ziah a keima leh keima kisiamphatna lampi del a Pasian
mai a ki pong bawl kahi. Kisia a kisiamphatna neita nanlei ilungsim,
ingaituahna, leh itung a siltung te normal tah a ang um kiana ding in hun
sotpi (10yrs about) bang alut hi, Luka
laigialtu in meithainu'n lungkelou kei in thukhenvaihawmpa kung ah
atungthu dihtah a vaihawmpiah dia a ngetnget leh atawp ah vaihawmpan
atungthu aleelpia maitaah bang in (Luke 18), Mangpan Ama toh kizopna suhthah na
ding in zummawpan top a pan kalaahnate kumsawm (10yrs) zoulam in hing
ngaikhiatsah in hing suhdam sah veve hi. Mangpa phat in um hen!
Tuni'n ka genthei-hahsatna te leh ka siltuahte ka hinpi ngaapnonsih hi ichi
kha maithei hi. Hinanleh unaute aw, Mangpa mai a ngaidamna ngeenthei a
hinkhothah zang dia kihenna ding hunpha inei lai sia akikheel nailou ahizaw hi
chi thei vai. Ki ngaisia a eima leh eima hinna kilaahsawm mai chite bawllou
keei ding ahi, tuate sangin iit tah a hing ngaah zing iMangpa lam zuan zaw vai
unau. Mangpa'n lungsim tahtah a Ama deibang bawlta ding a ikipiahkhiat ang
ngaahzing hi. Giitlouna leh hoilouna neitalo lomlomlou hi veng aw chite sang
in, ka gitlouna Mangpa'n ang ngaidam zouna diai maw chite khu Pasian toh
kilepna lampi ah aki naizaw uhi. Pasian in atenna dia a siamsa ilungtang ahi
(1 Kor.3:16). I lungtang neitupa Pasian in a tenna innmun dia asiamsa
ilungtang eite ang kepsah (1Kor.6:19) ahi zaw. Tuni'n iMangpa'n aluah utta hi,
na pephal ei? oleh na pe ut sih ei? Pasian in a sisan a aleisa ahi (1
Kor.6:20), na piahsih leh khatvei chiangin a sisan man ang phuul ding hi, tua
ni chiang in bang na genta diai? Ngai vawi unau
gingtute leh gingloute a ding in lampi
a kibang khat chouh a um hi. Tuapen Pasian deilou bang a hinkhozatna tawpsan a
Pasian deibang chouh a hingta ding a lungsung apat pusuakhia in tahsa hinkhua
dong a kisiamphat na khu ahi. Aziahpen tambang a ginna leh kinepna nei a
iMangpa mai a kipuangkhia mite a ding in
ikhelna teng ngaidam chouh hilou a sawpsiang ding in iMangpa amuanhuai in a ginum hi (1Jn1:9).
Ka bawlthei khamkham chi'n tam lavui ka siam dohta hi
Ka phaltheilou mun nuainungpen tang di'n
Na liangvai seng hing lungsiat ing Mangpa
Chitna neilou pen hinanleng zong
Na tenna mun dia na siamsa ka lungsung
Hingtengta in tun ka lungsung a
Nang di'n hongta ing na siamsa ka lungsung
Hing teng ta in Mang Jesu aw.
Unau tuni'n hun aki kheel ma in i Mangpan ang hatna bang leh ang deina bang a
hinkho thah zangta ding in kipankhe ta vai.
Simtu teng adiah a Pasian a dia panthah laah lunggul teng tung ah Pasian
hepina umta hen!
Tamna laa ana ngai chiat vai
Click here!Aban sim nuamte a di'n
Part - IIPart - III
Part - IV
Part - V
No comments