HINMAN UMLOU NA KISAKHA ZEL EI? Part - III

HINMAN UMLOU NA KISAKHA ZEL EI? Part - III
WAY2GOD

Way2God simtu zousia na bawn un Jesu Khrist min in chibai. Mangpa'n na ma hing puitou jel ta hen.

Hinman umlou kisahna mihing hinkhua ah piang ut mama mai hi. Tambang hahsatna hing piandohnate mun thum in ikhen uhi: Part I & II ah Eima khelna ziah a hahsatna ithuah dante neukhat ina kikumta ua tualeh tuni'n Part III na apat in eima pulam (Satan solna leh Pasian mapuina) apat hahsatna ituahte uh genzom nalai vai.

Eima khelna, Satan solna leh Pasian mapuina

Tam thum teng a kibat vehlou dan.

Eima Khelna: Eima ut thu a nuntaatna ichi chiangin Pasian deidan bangma thudon seselou a nungta china ahi. Tambang nuntaatna in siatna leh Pasian toh ki gamlat deudeuna ang piangsah hi.

Satan Solna: Adam leh Evi tungtawn in Satan in gitlouna haichi atuzouta a, tua gitlounate a ut hunhun in ang poudoh ding a, tuahun chiangin gitlouna bawl din phuut in i umleng uhi. Tambang nuntaatna in siatna leh Pasian toh ki gamlat deudeuna ang piangsah hi. Aziahpen Satan solna khu izawzoulou leh kiatngiamna ahi.

Pasian Mapuina: Pasian in Ama deibang program zui dingin ang dei a, tuabang itheisiamlou ziah un khat veivei chiangin A deina bang zui hahsa isa mama uhi. Hinanleh Ama apat etkhiatna te izaw ngeingei uleh kalsangna ahi a, izolou uleh zong kengiam tuan sih ding uhi. Tam toh kisai maban ah igenkhawm ding uhi.

Part I & II in eima utthu a igitlounate ziah un zumna, hahsatna, mitoh kisiatna leh silhoi sang in silhoilou tampi ang piangsah zaw a, tambang i siltuahte'n silhoilou bawl utna nasatah in ang neisah semsem nalai sonson hi. Gitlouna i tawpsan kinlou leh ihahsatna tuahte uh a huaise deudeu ding hi. Thamlou in leitung hinman umlou kisahna zong a umkhaleng nuam hi. Tambang gimthuahna apat ipawtkhiat theina ding lampi khu Mangpa a kisiah a, ki surrendar a, Ama thuthu bou a hingta ding a ki bulpatna khu ahi. Ngai in Gitlouna ah ithuuh tum dungzui in ing pawtkhiat kia na ding a gamla (hahsa) deudeu hi, chi theipum in tu ahun peet in Pasian deilam bou khu bawlta ding in eima kiveelthah vai. 

Eima gitlouna ziah chouh a hahsatna ituah uh ahi sih a, Satan apat solnate ziah leh Pasian in a program dungzui a ang peipi dan itheisiamlou ziah un zong ithuah leng uhi. Hinanleh tuni'n Satan solna te ziah a isil tuahte toh kisai genkhawm zual vai. Adam & Eve gitlouna ziahin eite pen ipian-ikhan apatsa a gitlouna toh piangkhawm-khangkhawm te ihi uhi. Diabol khu ipa uh ana hi a, aman eite tung ah gitlouna haichi anatuta ziahin, tua gitlouna haichite ang khangkhiat hunhun khu, ut in utsihlei i gitlou hun ahing hi mai a, tuachi'n Pasian deilou silte ibawl khazel uhi. Tam Diabol haichi tute khu: mit utna, tahsa utna, Pasian deina bang sang a eima deina bang pichin utna, thangsiatna, deigawna leh a dangdang te khu ahi. Tambangte pen Satan apat ahi a, hinanleh Pasian in tamte hoinatoh zou ding in ang hanchiam hi. 

Eima ut thu hilou a Pasian deilou dan lunglutna/thanopna ang um chiang in Diabol haichi tute hing mengdoh/poudoh china ahi. Tambangte pen apoina a um sih a hinanleh tua silhoilou hing piangdohte i hinkhua a iva pichin khu ahi a daahhuai penpen. Sawltah Paul in Rom.12:21 ah "Gitlou thuzawin um sih unlen, gilou khu hoina in hing zouzaw un" achi bang in mi koipou adiah a gingtute'n hoilouna hing piangdoh khu hoina a izaw uh angai hi. I zaw thei ding dan uh lam pi zong iMangpa'n Paul tungtawn ma in tambang in ei hilta hi: Tahsa silbawlte (hoilouna hing piangdohte) khu Hagau a suhlup zel ding ahi , achi hi. Tami in agennop pen ahi leh tam anuai a bang ahi:

Romans 8:13

¹³ Aziahpen tahsa dan a na um uleh, na shi ding uhi; hinanleh tahsa silbawlte Hagau a na suhlup zel u'leh, na hing ding uhi.

Satan in mihingte tung a gitlouna haichi a tute a ut hunhun in ang poudoh ding hi. Ang poudoh chiangin imihin khu hoilouna ngen in ang tuam dimta china ahi. Tambang hun ah silhoi sang in silhoilou bawl utna a nasa zaw a, tuaziahin gitlouna khu hoina toh zaw ding in iMangpa apat thupiah imu uhi. Mi tamtah in silhoi bawl ding in nasatah in pan ala ua hinanleh a lawsam zel uhi. Aziahpen, hoilouna khu hoina toh zaw theina lampi khatbou a um hi. Tuapen i Mangpa Jesu leitung a lenlai in ama thu a kalsuan hizawlou in Hagau siangthou ma puina boutoh a sitohdong in a nungta hi. Tuamabangin eite zong Hagau ma puina chouh khu ihinkhua puitu hisah a, tuachia hoilouna khu hoina toh zouzo ding in iMangpan thu ang pia a, thamlou in gingtu teng a Hagau Siangthou toh kumtawn a ding in ang tenpi ta hi

Ephesians 1:13

¹³ Ama ah noute zong thutah thu, na hundana uh khantanhoi na zah nua ua, gin zong na gintat nua un Ama ah chiemsa Hagau Siengthou a chiemte in na um uhi.

Eima utna bang a kalsuanna khu gitlou kipatna bulpi khat ahi a, thamlou in Satan haichi tute ang poudoh hunhun khu gilou ding a phuut a i um hun ang hinalai hi. Tamte pen tahsa ki soizoina nasatah toh dou nanlei i lawsam thouthou ding hi. Khumziahin, tambang silhoiloute douzawna um sun khu Pasian hatna ahi. Pasian hatna toh idouzaw na ding lampi khu, Pasian deina bang chouh a nungta ding a ki surrender na khu ahi. Pasian deina bang chouh a nungta din na mantai? Tambang nuntaatna khu Hagau a dimna (fill with HS - ) - Hagau/Pasian miitna ahi a, Pasian galvan kim a kithuamna zong ahi (Eph.6:11). Tambang hinkhua neilou in leitung gitlouna i douzou sih ding uhi.

Pasian mapuina bou toh kalsuan theita dingin Mangpa'n i hatlanate uah hing panpi chiatta hen.

Ephesians 5:18

¹⁸ Tualeh zukham in um sih unlen, tuanah kidehzou louna a um hi, hinanleh Hagau a dim in um zaw un.

Ephesians 6:11

¹¹ Dawimangpa zebawlnate na douaw na ding un Pasian galva bukim in kivon un.

Simmun masa sim utte a di'n

Part - I
Part - II
Part - IV
Part - V