Biakna Dik: Jesu Pansan A Biakna

Biakna Dik: Jesu Pansan A Biakna

Pastor Tunthianmang

Tangtel: “Huan Jesun a kiang ah, “Numei, kei hon gingta in, hiai tang chitchiat lou leh Jerusalem khua chitchiat lou ah leng Pa na biak hun uh a tungta hi.” Johan 4:21

Kumthak nung kha 3 khawng hoihtak, zalentak, leh nuamtak a biakkhawmna nei a tuabang a paizomtou thei zel dinga ngaihsutna nei in Saptuam’ ni poimoh tuamtuamte zang ding a kisakhol a I omlai in Covid-19 Second wave ziakin mipi’ biakkhawmna, nipiskul, siamsinna school te khak ngai dinmun in hong om nawn a poi I sak chiat uh ka gingta hi. Covid 19 in leng khawllou a nasemtou zel ahihman in ihihtheih omsun sorkal in kivenna ding leh pilvanna ding a hon gente hoihtak a zui a thumna toh I dou ahimai hi. Saptuam kizatna tuamtuamte (biakkhawmna, kithuahkhawmna, mipi kipawlkhawmna, a hon a thilhih ngaite) ahithei teng khawl phot ding hongsuak nawn hi.

I khalam hinkhua a ding I ngaihtuah chiang in biakinn kailouh ziak in khalam ah kiakniamna, bahna, hatlouhna hong om khak ding lauhuai mahmah hi.  Huaiziakin I khalam hinkhua abiiktak a Pathian biakna hinkhua hoihtak I neih theih/neihdet theih na ding lametna in Jesu’ hon puakkhiak Pathian biakna saulou in ngaihtuahkhawm lehang kachi hi.

I tangtel a kimu bang in Samari numei in Jesu’ kiang ah, “ka pipute un hiai tang a Pathian be zel ua, nou bel Pathian biakna mun ding Jerusalem khua ahi na chi sese ua” chi a a genlai in Jesun, “Numei, kei hon gingta in, hiai tang chitchiat lou leh Jerusalem khua chitchiat lou ah leng Pa na biak hun uh a tungta hi.” chiin dawng hi. Hiai tang hiam (Gerazim tang- Samari mite’n Pathian a biakna mun uh- vualzawlna Tang leng kichi), Jerusalem-Judate’ Pathian biakna mun chitchiat lou ah leng Pathian biak theih hun hongtungta ahi chiin numei kiang ah gen hi. Biakna a mihingte’n Pathian I naih/I zot dan thak Jesu- Messiah in hon pokhia/hon pankhia a huai tuh Jesu tungtawn a kha leh thutak a Pathian biakna ahi hi (Gerazim tang hiam Jerusalem hiam a biak theih nawnlouh ziak ahikei. Corona virus ziaka biakna kikhop theihlouh ziak a hongpiang leng ahikei).

Thukhunlui hun in mite’n gan sisan tungtawn in tempul ah Pathian biakna nei zel uhi. Himahleh Thukhunthak hun ah Jesun amah sisan mahmah in Pathian mai ah khelh ngaihdamna hon bawlsak in, ahinna in mikhialte hong tankhia hi. Jesun a sihna leh thohnawnna in Pathian toh mikhial hon kilemsakta hi. Jesu’ sisan lou ngal in mikhial kuamah in Pathian’ pomtak biakna kineitheilou/kipetheilou hi.

Huaiziakin, mimal biakna hiin mipi biakkhawmna hitaleh Pathian biakna himhim Jesu tungtawn a kha leh thutak a biak ngeingei ding ahi.

Unaute, tua Jesu- Pathian I biak theihna omsun, Lal leh Hondampa a pom a Amah neite ading in chiklai peuh in, koimun peuh ah Jesu tungtawn in Pathian I naihthei ua, Pathian toh I kipawl thei ua, Pathian I be thei gige uhi. Khut a lam biakinn, mihing bawl biakna mun leh vanzatte in Pathian biakna neithei lou in om tadih mahlehang, Pathian in amah biakna ding a a honpiak Jesu Khrist pansan in mimalmal leh innkuan chih in Pathian I bethei lai uhi. Biakinn a I kikhop in leng, midang kuahiam tungtawn a Pathian bia ihikei ua (huchi I om kha zenzen uhia leh?), Jesu’ tungtawn mah a Pathian bia ihi. A hun hiam, a mun hiam, natna hipi hiam in a sukbuai theihlouh Pathian biak theihna Amah gingtate’n nei ihihdan phawk thak ni. Biakin ahi hi in, biakin lou ah leng Pathian biak theih dan sin thak ni. Mihingte’n bel Pathian biakna ding leh thumna ding mun deihtuam/teltuam bang I nei uhi. Mundai, mun thoveng leh mun siangthou hi a I ngaihtuahna mun a Pathian hoihtak a bethei deuh ihihleh ahoih, himahleh Jesu tungtawn a kha leh thutak a biakna ahih keileh mahni kikhemna, mahni nopsakna, mahni kisuklungkimna lel a biakna hikha ding hi. Jesu tungtawn a Kha leh Thutak a Pathian bemite hiding in Samari numei a veh bang in Toupan a mite hongveh thak chiat hen!!