Nang Vualzawlna Hi In

Nang Vualzawlna Hi In
Mercy Manlianvung

 Amasa in hiai laigelh simtute tengteng navek un i Toupa Jesu Khrist min in Itna Chibai ka hon buuk hi.

Tu Kumthak 2021 ah i dingta a, buaina, haksatna, natna lauhuai tampite maituah in ompah a, i tuaktou zel kha ding hi. Huchibanga i omtouh lai un i mihinpihte banglam hiama haksatna tuakte panpih in amaute’ adi’n vualzawlna tuntu i hikha samta hiam?

Midangte adingin vualzawlna bangchibang in i hithei dia, chih lungsim  suangtuahna ah i koih kha ngei hiam Unaute.

Salam a kipanpihnate kia hilou in Thumnate in midangte adingin vualzawlna i hikha tou jel hiam chih ei leh ei kidot hoih kasa hi.

Dotna khat kidong zual leng: Mi panpih utna leh hehpihna nanei ngei hia? Hiai kon dotna ziak ahih leh Christmas chiang hiam ahihkeileh kua hiam Birthday chiang kia a mi gift/thilpiak pe utte nahi hiam? Hiai ka hon dotna ziak ahihleh hiai ni poimohte kia lou in leng i mihinpih haksatna tuak i muhte khawng panpih utna Kha (Spirit) nitengin i neih hiam kachih ut ziak ahizaw hi.

Sum-le-pai a panpihna vapiak pen kia mite adia vualzawlna hilou in amau adia thumna a theihtawp suah a panpihna leng amau adia vualzawlna ahithei hi.

Damdawi inn i chih chiangin damloute ki-etkolna mun ahi. Noplouhna hiam damlouhna nei mi khatpeuh in azot Damdawi inn akichi hi, khentuam neilou a mi ana enkol uh ahihziak in Damdawi inn bel miteng in aphattuampih hi. Ahihleh, ei mihingte lungsim leng hiaite panpih ding, hiaite panpihlouh ding chi a khentuam neilou lungsim putdan a om ngai ahi.

Luke 10:30-36 a i muh bangin Jesu’n gentehna agen: Samari mihoih in atheih ngei hetlouh mikhat suamhatte vuak a liamna tuak, lampi a amuh, midangte’n panpih dinga leng a etlouh uh, Samari mihoih in hehpih a, apanpih bang in ei Amah Khrist nungzui Khristian kichite’n leng hiai Samari mihoih bangin lametlouh pen hun in leng midangte adia vualzawlna tuntu hi ding in ahon deih hi.

Jesu Khrist nungzuihna ah, Panpih ngaite panpih utna lungsim nei ding in Pathian in ei Gingtute ahon deih hi. Doctorte bang in siamna nei kei mah leng, i hihtheih dandan a Jesu Khrist in ei ahon it bang a i mihinpihte iit a, ama’u dinga vualzawlna hithei ding in Pathian in ahon deih hi.

Mihingte khalam kia hilou in nekding-dawnding neilou leng tampi omlai hi, amaute ading in bang chidan in ei vualzawlna ihithei diale? Puansilh- nikten, tuidawn, damdawi chihte lam chituamtuam in i panpih thei hi. Hiaite ahih theih kei taak leh leng i thumna beek ua pangin amaute adingin vualzawlna ngetsaktu hithei gige ihi chih mangilh hetkei ni.

1 Peter 4:9-10 ah hichiin kigelh hi - Phunlou hial in ki nekngaih tuah chiat un. Michih in, midangte naa sepsakna dia Pathian a kipan a thilpiak adon tapeuh, Pathian hehpihna tuh gin-omtak a sepkhiak nading in zang hen. Hiai in agennop banghiam ichihleh ihunhoih neih teleng iitlou a midangte adia nasep hoih phunlou a sep ding chih ahon hilhna ahi.

Genbeh zek laileng, hiai khovel ah kuamah ahausa khinsa a piang omlou ahi, hunte hongpai zel in Pathian in a vualzawlnate ah honpi in tu khawng bang in a houpen a gen in Cellphone bang kinei chiatta hi.

Sawltak Paul in Nasepte 20:35 ah hichi’n ana gennawn hi -  Thil tengteng ah hichibanga sem gim in mihaatloute panpih ding ahi chih ka hon ensak hi. Toupa Jesu mahmah in a thugen.” Laak saang in piak in lukhong anei zaw’’ chi hi.

Hiai atunga Bible tang in thu tampi agen a, hehpihna leh zindousiamna (hospitality) ei gingtute’n ineih uh apoimoh dan chiangtak in agen hi. Kuahiam i panpih a i piakkhiak ngamleh Pathian in i piakkhiak nazah sanga tamzaw in hon vualzawl thei ahi chih ei gingtute’n mangilh kei ni.

Huaiziakin, ei gingtute zaw panpih ngaite panpih a, thumsak a, midangte adinga vualzawlna hithei dingin Pathian in simtute teng hon vualzawl chiat ta hen…