Tukum Khanglaite Khawmpi (PYF Central District) Leh Nute Khawmpi (PWF Central District) Reflection

Tukum Khanglaite Khawmpi (PYF Central District) Leh Nute Khawmpi (PWF Central District) Reflection

Khanglaite khawmpi leh Nute khawmpi kinai mama mai hi. Khanglaite khawmpi zou hapta ni vel zou in Nute khawmpi in a zom pai hi. Tam gel hun zat masang in khanglaite hileh Nute hitaleh kisingsahna in lapawl zilna, thu-le-la zilna in nasatah in hun kizang chiat hi. Tam hunsung ah zil dia hoi hunkhom ka mu khia hi. Tamte ban et suh vai.

Khanglaite khawmpi Central District in Zomi Colony ah September 31 - October 2, 2022 sungin zang a tualeh October 14, 2022 in Nute khawmpi Manniang Khuo ah kipan kia hi. Tam gel, ani in kajau a, sil um dan ka etkaah chiang in Hunzat lam ah Nute hunzat dan in tutan dong in ka lung khoikha mama mai hi.

Khanglaite a felzaw ding a ikoite'n ahun peel in hunpan tangpi a, hinanleh Nute in pen hunpat hun ngaahla mama mai ua, program kipat masang dakaal khat phial a advance in biahinn ah tou dim phitphet ua, i kuanhah sim leh touna kitanglou ahimai hi. Tualeh hun kipat hun ding a ngaahla mama mai ua, Nipi Ni suun in bang 15mins umnalai pi in ngaahzou nonlou in hun apan uhi. 

Nute program zatdan ka et chiangin fel kasa a, tualeh etton taah zong kasa hi. Lamka khosung ah ahunchet a program pan chi bang vang mama mai hi, ineu apan Manipur timing hiden keei hi. Hinanleh tu hun in pen Nute'n tabanga ahun chetchet a program apat thei uh pen ka pataat a baanah koipou in enton thei hen lan hilei ut huai zong kasa hi.

Nute'n khawmpi ding kuan a aki singsah dante uh ka en a, laa zil hun in a tungkim chetchet ua, thaselou in Pasian gam nasepna a ngai in afel thei mama mai uhi. Upa mama ta nan uleh taimatah in thu leh laa zil di'n akuanzel ua, khat veivei chiangin 7:00pm to 10:30pm tan bang khawl lou in thu-le-laa zilna in hunbang azang zel uhi. Khanglaite'n Nute bangin tamtantan hun pethei zel lei thu hi in laa hitaleh kisiam mama na di pi hun ki pe peilou, tunghah toh top bai bang ki ut nalai. Tuni'n khanglaite'n Nute apat hunzatdan zil vai i chi ut hi. 

Tuathamlouin, laa sa ding khop ahiai, thu-le-laa a pang ding khop a um na uleh Nute pen kizil un pangpai uhi. Tuachi'n program te piching sah zou mama uhi. Hinanleh Khanglaite pen thu-le-laa zil di hunkhop um nanleh zil ngaaplou, kisingsah peilou ahi mawh uhi. Khua11 kisuhkhawmna ah Nute lah ah kho8 - kho9 bang thu-le-laa ah pangthei uhi. Hinanleh leh khanglaite pen khua11 ki suhkhawmna ah kho3 vel pang zou hamham chi bang hi giap lel hi. 

Khanglaite hi leh Nute hileh lamkaite pen fel thei mama mai uh. A poimaw leh akuul teng ahun bangzel in fel set in koituup zou uhi. Hinanleh tua program hahsa deu mai a lamkaite'n kituup tah a ang siamsah pen uh zang a va kuan di maimai apeilou zong tampi ki um dan hi. Mi teng baahsiangta i china ahi zenzen sih a, Pasian theipum a lungsim tahtah toh pang zong tam pi um veve ahi chi aki mukhe thei veve hi. Sermon apat ka lungsim khoikha mama khat ahi leh "Ka hi theina zaza, ka boltheina zousia, keima a piangdoh thei zousia, Pasian thupina ding in ka zangkheta ding hi, chi'n Pasian mai ah na chingam tai, nachikha tai?" 

Thugente hita in, lasate hita leh anuam thei mama mai hi. Amin a lawm leh gual toh ki mutuah ding kilawp man a program a jau um nanleh hagau thopna tangpum a program zang zong tampi um veve hi. Khanglai na Pasian tuah ding in mansa in um in chi thupi ahi toh kituah in tuni'n ateeh-akhang chi umlou in eima leh eima ki veeltha in Pasian min a ipanlaah dan leh i kalsuan dante tuni'n enpha kia vai. Mangpa pomtaah ihi na diai? Mangpa'n ang pomtaahte ihi sih leh Ama toh ki maituah dia mannailou chi na ihi maithei hi. Mi koizong a ding kip a ki geelte ki veel thah heh, aki pua dia kisa zong hikha maithei ahi man in chi ahi ziah in tuni'n eima leh eima ki veeltha chiat vai.  

Mite'n Pasian na asep chiang un, anasep dan uh midangte a di'n halna ana hipha hi. Tuapen bangdang ziah hilou in lungsimtah toh Pasian nna asep ziah un mite a ding in gualzawlna hipha uhi. Aziahpen atung uah Pasian alungkim taah man in. Tamma bangin Nute lah ah hagau mi tamtah um hi chi ki mu thei hi tuate ziahin mi tamtahte'n a kalsuandante uh etton taah eh chi in etton dingin kikup na topic in nei uhi.

Mite'n bangteng gen nanleh, ikalsuan, ihinkho zatdan ah Mangpa kipahna bawldoh zou dingin Mangpa'n hing umpih in hing mapui chiatta hen. Amen!

View More Photos