Jesu Chiellut In

Jesu Chiellut In

Joseph Doulunlal Samte 

Kihilna 3:20 Ngai in, kotkha bul a dingin kot ka kiu hi, mi koipou in ka aw azah a, kot ahon leh a kungah ka lut ding a, ama toh nitah ann kane khawm ding a, tualeh aman zong kei toh ane ding hi.

Tami Bible tang khu mikhielte'n Jesu hundampa a pomna dinga akizat vang in, gingtute agen utna ana hizaw hi. 

Jesu khun, mi a gumnaw ngai sih hi. I hinkhuo a I chielna munbou a hing teng zel ahizaw hi.

I bawlkhiel zel uh ahileh ichiellou na mun a jong Jesu hing teng dinga I lam-et uh. Nanleh apanpina bangkim a ipoimaw uhi. Ama ang tandoh thei, I hundampa uh ahi.

Tam geldoh zing in, Jesu siemlou tangsah dinga hing pei ahisih a, saltangte zalensa ding a hingpei ahizaw. Ashina in bangzah tah a ang it ahei chi asulang ta hi.

Johan 3:17 Khovel siemlou tangsah dingin Pasian in atapa leitungah asawl sih a, Khovel Ama vanga hundam ahitheina dingin asawl zaw hi.

Pasian apat bangma iphuol thei sih uh. I lunggel teng ana thei sieng hi. Hing lungsiet in ang panpi ut zing hi. Nanleh Aman Ama a dinga iki hon leh honlou ding jong ideitel aphal hi.

1 Kor. 1:9 Atapa Jesu Khrist i Mangpa toh kipawlna ah noute hing hanpa Pasian a muonhuoi hi.

Jesu Khrist khun mi a gumnaw ngai sih a, Ama ahileh vaihawmtu ahi, asilbawltheinate zieh a tam dinmun atan dinga kilawm ahi.

Jesu'n Ama lampi itel leh tellou ding ei deitelna a akoi a, Jesu'n Ama lampi zui dinga kot hing kiu teitei leh hing pawngbawl lou ding ahi. Tuanasang in Ama toh kipawlkhawm (fellowship) ding in itna toh angchiel zaw hi. Tam kipawlkhawmna (fellowship) in a gen ut ahileh bangkim kihawm/kitang (share) ding chi na ahi.

Na hinna a Jesu na lamdot lou na mun a, A guolzawlna natan tawmna ahi zing thei hi. Jesu bangkim siempa, silteng thei. Sil peidan jousie jong theisiempa. Pilna leh theina Jesu a sanga thupizaw umlou hi.

Na hinna a Jesu na chiel a, thuneina jousie na pie leh, Anei jousie dongtu nahi zing ding hi. 

Mangpa'n simtu jousie guolzawl ngei ngei tahen.