Lametna Hing

Lametna Hing

Lametna Hing
Pastor T. Tunthianmang

Tangtel: “I Toupa Jesu Khrist leh Pa Pathian phat in om hen! Aman a hehpihna thupitak bangzel in, misi laka kipan Jesu Khrist’ thohnawnna ziak in lametna hing mu ding in a honsuang nawn hi.” (1 Peter 1:3)

Amasapen in A thoukik I biak Toupa Jesu tung ah kipahthu ka gen a, simtute tengteng na vek un Jesu min in Chibai ka hon buk hi!

Leitung ah sakhua makai tamtak a si ua, a thoukiknawn uh chih zak ding, gen theih ding kuamah a om kei uhi. Himahleh Jesu Khrist, Saptuam phutkhetu bel a si a, sihna akipan nithum ni in vualzou tak in a thoukik chih Laisiangthou in honhilh a, a thohkik nung a mi bangzah hiamte’ kianga kilak ahihdan Laisiangthou mah ah I muthei uhi. Huaiziakin, si mahleh sihna in a zohzohlouh Hondampa leh Toupa gingtate ihihman un hampha I kisa mahmah ahi.

Jesu sihna akipan a thohkikna in zawlnei tak-a thugenkholh bangbang a thil tangtung ahihdan bang, Pathian - tangtawn a hing gige ahihdan hon theichian sak hi. Banah, amah gingtate a dingin leng Jesu’ thohkikna in hamphatna tampi honpia hi: 
  • Amah I gintakna a hingsak (validate) a, 
  • Amah thohkik bang a thoukik ding I hihdan a hon theisak a, 
  • Pathian mai a siamtang I hihdan leng ahon theisak hi. 

I tangtel 1 Peter 1:3 ah Jesu Khrist thohkikna tungtawn a Lametna hing mu ding I hihdan a hon hilh lai hi. Pathian gingtate’n lametna hing mu/nei ihihdan Peter in hiai ah a honhilh hi. Hiai lametna hing a kingakna bang ahia? ahihkeileh bangziak a lametna hing kimu/kinei thei hihiam chih leng ahonhilh hi.

1.Khatna ah, lametna hing tuh pianthakna ah kinga achi hi “…lametna hing mu ding in a honsuang nawn hi” hiai a honsuang nawn kichi khalam a pianthakna kawk ahi hi. Lametna neilou I om kei maithei himahleh lametna hing neilou a om theih ahi. Lametna hing kichi pianthakna ziaka om/neih ahihman in mi piangthakte’n a nei ua, piangthakloute’n bel neilou uhi. 

2. Nihna, pianthakna pen Pathian’ zahngaihna thupitak a kinga ahi achi hi: “Aman a hehpihna/zahngaihna thupitak bangzel in…” Eipau Bible ah hehpihna thupitak chiin kilet a English version tamzawte ah bel zahngaihna thupitak (great/vast/abundant mercy) kichi hi. Pathian’ zahngaihna in a gen ahihleh mikhial in a tan ding/ aphu a tanlouhna ahi. “Khelhna man sihna” ahih bang in mikhial ihihna a I phu/I tan ding tangtawn sihna ahi. Himahleh Pathian in a zahngaihna ziak in I phu/I tan ding I tanlouhna ding in Jesu Khrist a honpia a amah gintakna tungtawn in tangtawn sihna tang talou in tangtawn hinna I tang zawta uhi. Tangtawn beidotna tang talou in tangtawn lametna hing I tang zawta uhi. 

3. Thumna, pianthakna pen Jesu Khrist thohnawnna a kinga ahi: “misi lak akipan Jesu Khrist thohnawnna ziak in lametna hing mu ding in a honsuang nawn hi” John Piper in hichiin chi hi: “Thohkikna lou a pianthakna omlou; pianthakna lou a lametna hing omlou; huaiziak in thohkikna a om keileh lametna hing leng a om kei.” Jesu’ thohkikna, Amah a ding a poimoh leh thil thupitak ahihlailai in, ei amah gingtate ading in leng lametna hing mu ding a pianthaksak ihih ziak un thu kipahhuai, thu manpha, leh Tanchinhoih ahitaktak hi. 

Simtu tengteng Pathian in hon vualzawl chiat ta hen. 









No comments

Powered by Blogger.