Ngaidam Thei Pa
Ngaidam Thei Pa
Tangtel: Huchi in a thou a, apa kiang ah a paita hi. Huan gamlapi a a omlai in, apa’n a mu a, a lainat mahmah a, atai a, a va pom a a tawp tonton hi” (Luke 15:20)
Pate’ Ni hon musak pa tengteng Pa, Pathian’ tung ah I kipak mahmah a thupina I pia hi. Simtute tengteng leng Pate’ Ni chibai ka hon buk hi! Awle, tuni Pate’ ahih toh kiton in Ngaidam thei Pa chih thupi zang in Pa khat hihna ah midangte ngaihdam theih poimoh ahihdan tamlou in ngaihtuahkhawm lehang ka chi hi.
I tangtel ahihleh Laisiangthou tang minthang mahmah, Tapa taimang gentehna chi a I theih ahi. Hiai gentehna thu ah tapa khat apa kiang a a goutan sik ngen a, gam gamlapi a zinmang, a utdan tawk a vakizang khin, a neihteng zang gai, gilkial/dangtakna thuak a haksatna thupitak a tuahlai a kisik a apa kiang a hon zot kikna leh apa’n a ngaihdamna thu I mu thei hi. Hiai gentehna thu ah ngaihdamna chih thumal kimuchet keimahleh, Pa in a ta thumanglou a ngaidam ahi chih I muthei hi. “Pa, van a tung ah leh nangmah mitmuh in thil ka hihkhial; na tapa a sehtak ka hita kei” (Luke 15:21) chi a a gen lai in apa’n a sikhate kiang ah “puanhoih pen hon lakhe pah unla, silh sak un; a khut ah zungbuh a khepek ah khedap bunsak un; bawngnou thautak honla unla; gou un, I ne ding ua, nopbawl in I om ding uh; hiai ka tapa a si a, a hong hing nawnta hi; a mang a, I munawnta uhi” (Luke 15:22-24). Tapa in apa kiang ah a sikhate khat bang a bawl ding a a ngetlai in pa in a ta mahmah in a pom nawn ahihman in a tapa a ngaidam ahi chih a chiang hi.
Banah, I tangtelna I sim leh tapa in apa kiang a bangmah kisikna thu a gen ma in, apa’n gamlapi a a omlai a muhphet in a lainat mahmah a, a tai a, a vapom a atawp tonton hi chih I muthei hi. Tapa in pa kiang a ngaihdam a ngetma nangawn in pa in a tapa lainat mahmah ahihman in a ngaidam khin ahi chih akilang mu. Tapa in ngaihdam a nget ziaka pa in ngaidam ahi masakei a, a lainatna ziak, a itna ziak in pa in a ta a ngaidam ahizaw chih a chiang mahmah hi. Hiai gentehna thu in Pathian in a ta mikhialte hon itna, hon ngaihdamna genchiang mahmah e maw…Ngaihdamna taktak zaw kisik a ngaihdam nget ziak a ngaihdam hizawlou in itna ziak, lainatna ziaka ngaihdam hizaw hi.
Tapa taimang bang a Pathian a kipan belam bang a vakmangte, Pathian’ thunuai a om utloute, Pathian’ deihlouh dan a kizang a hinkhua zangte ihi uhi. Himahleh Pathian in a hon it mahmah a, a Tapa tang neihsun honpia in, a Tapa Jesu ah I khelhna hon ngaidamta hi. Kisik a Pathian kiang I zot chiang in tapa taimang mahbang in Pathian’ ngaihdamna I tang, I theichian uhi. Pa, hiai bang a Pathian’ ngaihdamna na tang ta hia? Pathian’ ngaihdamna tangta nahihleh, nang bang a mikhial, na zi leh tate leh midangte na ngaidam thei sam diam? Pathian’ ngaihdamna nang natan pen koitan na bansak zou a? Nang tan a tawp mai hia? Midangte’n leng Pathian’ ngaihdamna na tan a hamphatpih kha uhia? Pa in a tapa taimang a ngaihdam theih leh nang leng na ta thumanglou, an ta genhak, na ta thukhel na ngaidam thei sam diam? Ngaidam thei Pa hiding in Pathian in pa tengteng hon vualzawl chiat hen!
No comments