Muanna, Bitna, Hamuanna Limgelh (picture of peace)

Muanna, Bitna, Hamuanna Limgelh (picture of peace)
B. Goumuanthang

Nidanglai in Leeng minthang mahmah khat, a hobby chu milim gelh ahi. Amahpa chu milim gelh athanuam peetmah a, ahihvang a alunglut tuh a siamlou khat chu ana hi ahi. Milimgelh lunglut lah siamngellou ahihziahin nikhat chu gamsung pumpi ah milimgelh kidemna diing thupuan ahung bawlta ahi. "Lemna, Bitna, Hamuanna te chu ka ngaina mahmah a huziah in Leengpa room sung a taah diing in ahoih theipatop in hung gial un, a gelhsiam penpen chu sana-dangka toh nasatahin katawimawi diing hi," achita hi. 

Mipite'n Leengpa thusuah azaahtah un a phuurtheih mahmah va, Leengpa apat kipaahman sangdiing kinepna toh a theihpatop suahin Lemna, Bitna, Hamuanna te chu lim (picture) a muhtheih diing in ahung gialpanta uhi. Hun tomlou sungin gamkhat pumpi kitaitehna limgelhte chu ahung khawm panta uhi. Lim chu asiing-asaang a sim dikhop in atam peetmah a, hung teng lah ah Leengpa'n adeihdiah, alungtunna mahmah limgelh nih chu ahung teeldohta hi.

Ateeldoh limgelh nih te muangchang tah a, a room sung a et diing in ahung tawipheita hi. Lampaam a, a result he-ut mipite chu a ding leh niainuai va, teeldoh a um limgelh nihte ana mukhaman pawl zawng ana um dan uh ahi. Limgelh mukhaman pawlte in limgelh amuh dungzui un koihpen selection a um di ahiai chih gintatzawh chuh aneita va hichi'n achi uhi. 

Limgelh KHATNAPEN chu a siang sitset a, vaan leh meilumte zong a siang sitset a, hampa louhing te zong a hing dimdem a, zu-le-va te zong nuamsatah in a khosa uhi. Huchi'n alai ah mikhat chu lungsimnopna toh kidim in baanjaah in vanlam en in nehnui hieuhiau a kipaahthu soi chu amu uhi. Ahi'nlah, limgelh a NIHNAPEN ah chu hitobang amu uhi: huihpi leh guahpi kithuah amu va, vaanlam ah lungthah mahmah meelpu hileh kilawm meipi san ziazua chu a um a, tahlamzawn ah lui khat a um a tuiluang chu san zuazua in hung tohmang thei leh kilawmtop in alauhhuai a, huihpi-guahpi nuai ah singbaw khat ah vabu a um a, asung ah vanou leh vapi chu muangchangtah a um zong amu uhi. Hi limgelh nihte chu aki khe mahmah mai a, aki nungngattuah uh ahi chih theih diing khop in a um hi. Huziahin koihpen in Lemna, Bitna, Hamuanna gelhkha zaw in na he ei?

Khenkhat chu a result hetsa chi'n akikou dohta va, alehlam ah alimgelh mupha khabaan nai keeilou zong adim-ahaah in um nalai veve. Mipite chu koipen selection in a um de o chia abuai laitah un Leengpa chu a room apat ahung potdohta a, a result puangkhe diingin a hung dingdohta hi. Mipite chu phuur talua in control zohlouh hial in result ngaahlah in a pheluplup ta mai uhi. Leengpa'n a result hichi'n ahung puangdoh ta mai hi.

Limgelh siam a siing a simte lah apan a deih mahmah leh a lung tunna mahmah nih te lah apan leengpa'n chu milim nihna pen ateelzawta hi. Bangziah a Leengpa'n ANIHNAPEN a teelzawh ata diai? Aziahpen Leengpa ngaihdan in chu: Lemna, Bitna, Hamuanna kichi chu hahsatna umlouhna mun, nopna ngen a umna mun ahizaw sih a, hahsatna, buaina nasatah a ikiim-ipaam a um ahih vang a hute lailung a patauhna neihlouh keei a muaangtah a umtheihna chu Lemna, Bitna, Hamuanna dih ahi achita hi.

Na hinkhua ah hitobang hamuanna, lungmuanna, bitna leh lemna na neih ei? SILPOIMAWH PEETMAH AHI. Hitobang buaina, thawmhauna, hahsatna leh lamtuamtuam a chimoh a umtheihnate kaallah a, lungsung suhliing guallouh muanna chu Jesu - Hundamtu & Lal a neihte chouh in aneihtheih giap uh ahi. 

Hih Muanna Limgelh (picture of peace) simtu tengteng Lalpa'n hitobang lunggil tah a muanna neihtheih diing in lamchinteng ah ma hung pui in hung umpihchiatta hen.