LEITUNG MITE TAWH A KILAMDANG DINGA HOTKHIAT

𝗟𝗘𝗜𝗧𝗨𝗡𝗚 𝗠𝗜𝗧𝗘 𝗧𝗔𝗪𝗛 𝗔 𝗞𝗜𝗟𝗔𝗠𝗗𝗔𝗡𝗚 𝗗𝗜𝗡𝗚𝗔 𝗛𝗢𝗧𝗞𝗛𝗜𝗔𝗧
Nisim Manna

𝘽𝙪𝙡𝙥𝙝𝙪𝙝: ....... 𝙉𝙤𝙖𝙝 𝙥𝙚𝙣 𝙋𝙖𝙨𝙞𝙖𝙣 𝙩𝙖𝙬𝙝 𝙠𝙞𝙠𝙝𝙖𝙬𝙡 (𝙩𝙤𝙣𝙠𝙝𝙖𝙬𝙢) 𝙝𝙞. 𝙋𝙞𝙖𝙣𝙘𝙞𝙡𝙣𝙖 6:9

Noah khan hun in mite mawhna sungah a kibual laitak-un Noah pen Topa tawh kikhawl (tonkhawm) hi, cih kiciamteh hi! Noah leh a innkuante cihloh Pasian a zong om tuak lo-a, amau innkuan bek in Pasian khasiasak lo uh hih tuak hi. Midangte in leitung gualnopna bek a zon laitak-in amau innkuan in Topa deihna bek zui uh hi. Leitung mi khempeuh in a langpan hangun laulo uh a, tua sangin Topa thupiak a zuihloh khak dinguh lauzaw uh hi. 

Tua mah bangin nang zong na up Pa leh na up thu tawh na kalsuan ding lau kei inla, na maan lam na kitheihtel nak leh hong ki mawhsak phial zongin lau tuan kei in. Thumaan mah gualzo veve ding hi. Thumaanna tawh kuamah a kalsuan ngam loh laitakin kalsuan ngam inla, midangte in Pasian zong phawk manlo-in leitung vai-ah a buailaitak-in nang Pasian mah phawk veve inla, Pasian a zong kuamah a om kei phial le zong nang zong veve in. Pasian tawh kikhawlh ding a thupi penin koih inla, amah tawh kizopna hoih bawl tawntung ding na lunggulh pen hisak in. 

𝐊𝐢-𝐚𝐩𝐧𝐚: 𝐓𝐨𝐩𝐚 𝐚𝐰, 𝐧𝐚𝐧𝐠𝐦𝐚 𝐥𝐮𝐧𝐠𝐬𝐢𝐦 𝐚 𝐭𝐮𝐚𝐤 𝐥𝐞𝐡 𝐧𝐚𝐧𝐠𝐦𝐚𝐡 𝐭𝐚𝐰𝐡 𝐚 𝐤𝐢𝐤𝐡𝐚𝐰𝐥 𝐝𝐞𝐧 𝐤𝐚 𝐡𝐢𝐡 𝐭𝐡𝐞𝐢𝐡𝐧𝐚 𝐝𝐢𝐧𝐠𝐢𝐧 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧 𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!