A LIAN DINGTE KI NEUPAT UT UH HI

A LIAN DINGTE KI NEUPAT UT UH HI
Nisim Manna

Bulphuh: Apu in a kungah, suoh hoi leh muanhuai na bawlhoi hi, sil tawmnou tungah na muanhuai a, sil tampi tung a vaihawm in ka hing koi ding hi. Na pu kipahna ah lut in, achi hi. Matthew 25:21

Tampen vantung a Pasian in a paahtawi ding mite tawh kisai a Jesu' thugentehna ahi. Tam gentena in ang hilnop ahi leh, Pasian thu toh kisai hi in, Leitung sil toh kisai hita leh, sil thupitah khat poupou ahing piankhiat theina dingin lungsim chiimtah tawh sil neunou khat apat hing kipankhia zel ahizaw hi.

Veina neunou khat apat lianpi hing piang zel ahizaw hi. Etsahna dingin, Judah gambup hagau lam a akhanlawhna ukhu, Kumpi Josiah kisiahna (repentance) ziah a silpiang ahi. Tuabaan ah Israel te'n nithum sung an-ngawl a Pasian nasepna lian mama khat amuhdohna ding un Kumpinu Esther apan kipankhia hi.

Atung a sil umdan igen mabang un, Joseph, David chite zong milian-mithupi asuah theihna ding un thawnginn (jail) ahisihleh belam ching chite apat hing kipan khia uhi. Josuah zong lamkai hoitah ahitheina dingin Moses nung chitah deu in ana zui masa hi. Zawlnei Elisa in zong chitah deu a apu Elijah nung ana zou ziah in Elijah vangletna leni (double) mu hi.

Theisiam dia poimaw masa ahi leh nungzui ichi chiangin mite sang a lianzaw a kikoi louhin, mite sang a neuzaw a kikoi china hizaw hi. Tambang a kineupatna um masalou in letna, makai hoi leh lian ki suahthei mawhlou hi. A lian khat poupou i suahtheina ding in eima ki neupat ngam ngai hi. Ki neupatna khu neuna hilou in letna hizaw hi aziahpen, iletna khawnung in hing kilangpan zaw hi. Tuaziahin, isep-ibawl, i hinna khatpoupou ah thuazawhna, ngaahzawhna poimaw a, tua hileh ahun ang tung tah chiang in Mangpa'n hing lamsang ding hi.

Ki-latkhiatna: Mangpa aw, ka hina bangbang pomsiamthei a, silbangkim ah ki neupat ngam a, nang lapsang hun ngaaahzou ding in Jesu min in kang ki-lankhia hi. Amen!