I WEPT AND WEPT BECAUSE NO ONE WAS FOUND TO OPEN THE SCROLL

I WEPT AND WEPT BECAUSE NO ONE WAS FOUND TO OPEN THE SCROLL
Pastor Dr. Dongza Thawng
Devotional No. 59 ( Vol 3)
Fellowship of Thirsty Souls and Hungry Hearts

Tavang ninou suah kilawm leh Pasian hepina jingkal teng a thah jing lamdawn kawm in chibai!

Tuni Topic: “I WEPT AND WEPT BECAUSE NO ONE WAS FOUND TO OPEN THE SCROLL..”

Text: Rev.5: 4

Tulai i gam ah clean election toh kisai awareness a um dan kipah huai hi. Alang alang aning aning ah himi ki buaipita hi. Makai hoi ineulou leh i gam leh imaban RISKY dan mipi hiin, siampite hiin, mipil misiamte hitaleh koima ummaimai thei nonlou hi.

Pu Thangkhangin Ngaihte Interview ka ngai leh 1980s lai a ZNC movement lai ang geldoh sah hi. Hibang a passionate nalai, hibang a energetic a sousang ngap nalai kipapi huai sa ing.  Comment khat in “Mang Taithul in a interview teng lah ah Mang Taithul bangma gen manlou a umsah thei ama mai ahi” chi hi. -“The only man (so far) who could let Mang Taithul sit back and listen” - Dave Mate. Nal veve hi. A shisa hing thoukit mama bang kasa ahi.

Alang khat a Pu Rev Chungthang, Rev Dr J Lamboi te loi makai in pastor te zong um maimailou ding in tulai meeting  aning aning ah bawlbawl uhi. Ana ngaiven vai. Mailam ah mipite hing hankhawm ding uh hileh kilawm hi. 

Alangkhat ah Vision Lamka leh Transform Manipur te zong bawlthei teng bawl uhi. 

A thanop huai sem a USA politics ah zong sleepy Joe Biden zong buai mamata a. Trump a paipai na ah mipi 50,000 val val in uap in popular semsem hi.  

Tuateng lai ah Rev B, Nengzachin ( f/o of  Dr Ginlianlal) in date Date 03 in hing nusia hi. Dahuai in thawmhau huai hi. Singphung kum lui, bawh pha, jungkai thuuh, sangkhat in hing umlousan ta china ahi mai hi. Tahsa leh hagau atate lian sem, thuuh sem, jau sem leh sang sem a ahing bahjam ding uh ilam-en hi.

A khoi abang hitale janni tah ka khuai nou neh hah neh sengkha in ka sungteng buai hi. Tu jing kal ma deu in ka thou a walking ka va pai hi. Lamtungtawn in Singkungte, ju leh va te, Tavang ninou etlawm ten zong hing na kipapi in hing na lamdawn uh hileh kilawm hi. Tuamai hilou in I Pa Pasian mama in zong “ka thilsiemte hoi na sa ei? A changchang ah ka khutbawlte hing kipapi jel sam ve” chia hing na kipapi in hing kitawnpi in, a silsiam etlawm te “en ve, hi jawng, en ve hite.. nang kipahna ding a ka siem” chia hing en sah malam in ka thei hi.

Tulai  thil tuamtuam leh Laibu ka buaipi na lam in a message zong ka gel man sih hi. A laibu thu sang in zong a citation gelna ah ka awh den hi. Hamsa mama hi. Hing thumpi jel un.

Tu in i thupi ah lut ta vai. Tulai ka Bible sim ka guru pa Rev Hauzalian apat ka jil na pat in Pasian thu pen awlawl a simdan ka ki jil tha hi. Tukum Bible khat vei chuh June in ka busua ta hi. 2 vei ka busua sawm lai in ka lungsim ka kheel thah hi. A bul a 2 veina kipat kia sangin New Testmant avel vel in ka sim hi. Busua ding deina a niteng a bung hijat chia sim zong ki discipline na khat ahi. Ahiin a bung sim jou ding jat tupna toh lamkal a, i kim i pam a thil hoi leh manpha te ki-en manlou hi. Theiga ne hilei a ningning a ki phual theiga tui tahtahte ki loumanlou, ki kheumanlou hi.

Tuajieh in awlawl in NT a velvel in ka sim hi. Tulai in Psalms ah ka sim kia a nop sengseng sim tam ding zong pammai ka sa hi. Lamkal ah neh ding tam seng hi. Khaga (Ground NUT) i neh chiang kheukheu leh a tuitui ana ki phualphual hi. 

Tuajieh in Tui sengseng neh ding tam sengseng ka masawn ut sih hi. Thilmanpha ki phual khu thakhat a mawh taw khiah thei hilou hi. Pasian khu achitahlou a lunglutlou te kung ah kilah utlou hi. Awlawl a hunpia ngamte kung mai ah a hina kilah sawm hi.  Pasian khu va thumjual, Bible va phetjual, kin deudeu a va sim a hing kilah paipai ding chi hilou hi. I nutsia ngam jaja in ama hing ki piakhia ding hi. Ei hun awng sung tawmkhat toh hing ki adjust sawm Pasian hilou hi. I hun manpha penpen i piahngam chiang a hing ki lah pan ding hileh kilawm hi. 

Mikhat in I don’t read Psalm 73. I prayed psalms 73  achi dan hileh. Psalm laibu pen i sim chiang ei hindan  toh kibang seng in chiamte senglou thuhoi um hi. Tuajieh in chiamte sawmsawm lei zong chiemte senglou ding ahiman in  Psalm ma i thumna in zang lei. I Psalm ma ah thumlei. Pray the WORD kichi. Pray Psalms. chi in psalm phuahtu thumna khu ka thumna ka hisah hi. 

Laphuahsiam te la khu eima a bang a isah bang ahi. A changchiang mi la phuah sa in i mittui pot hi. Ajiehpen alaate eima abang a i lah jieh ahi. Tua chi dan ahi. Psalms a thumnate, guitamnate, lungthahnate, kipahnate, eima abang in la in Pasian i houpi thei hi.  Or Ama toh kipawl thei hi.

Hibang dan a awlawl a Bible sau loulou, dam tah a ka sim lai in nidang a ka mu ngeilou, ka ngaisahlou laibu Revelation bu apat in thil khat hing kilang doh hi. Nidang in Revelation bu ka sim chiang sim kinkin a chai kinkin ding ka ngaitua hi. Ka um sawtngap sih hi. Ajiehpen mailam thu ngen ahi a ingaituana in abatlou tam hi. Thil kigente thupi thei seng hi. 

Ahiin tutung ka Bible sim na ah masawn louin mun khat ah ka khawlden hi. Tua ahileh Revelation bung 5 ahi. John in Labujial (scroll) khu a phel ding van leh lei, Vantil le Van mipite hileh koima a phelthei ding amulou jiehin “ka kap ka kap” a chi hi.

Hibang a Mihing leh Van leh Lei a thilsiam jousia lai a, a hong thei ding koima amulou jiehin kap hi. Hibang a aka lai in misiangthou upa khat in “kap sin, kap sin… a hong thei khat um hi” chi in hamuan hi. 

“ See, the Lion of the tribe of Judah, the Root of David, has triumphed, He is able to open the scroll and its seven seals” chi hi.  Tua khu koi ahiai ichi leh koi dang hilou in Ka tanpa, ka taang a shipa, kei hing it pa, tunia a sun ajaan, ahun chin a ka ki thuapi, ka nai a um, achang chia ka ngaisahlou ahivang a hing nusia tuanlou, kei hing it seng a kei ading a ashi mai hilou a, nichin a kei toh kithua ut a, kei hing juijui, jingkal teng a ki pawlpi ding a hing na ngah gige, kei ahing it seng man a Thangsie khop a hing it…koi dang hilou in MangPa Jesu ana hi hi.

Aban simlei Balam nou in himi laibu ahawn ma in laltouna kimvel a upa ten thupi tah in ama biana leh pahtoina nei uhi. Tua jou in Van mipi a sim a simsenglou ten Balam nou pahtawina leh biahna thupi tah in nei uhi. Tuachiin bung 6 na ah tua laibu khu Belam nou in hing hong ta hi. Tuami ahonna pat a thil piangte khu abanban in Revelation bu pumpi in hing gentoutou hi. (tualam pen i gen sawm ahi sih hi). 

I buaina khuhpi, i beidotna kotpi kikhah kihonna ding a hoi pen khu Belam nou Pahtoi in biah lei ama hing kipan mai ding hi. 

Tunia i gen ut khu na hinkhua ah na thiltuah hamsa seng, a dawnna ( answer) umlou,  a su veng thei ding umlou, lam pi um nonlou, doh ding, kup ding zong um nonlou khop a mun hahsah ah na umkha ei? or thil hahsah na phukha ei?

Hibang dinmun ah mitampi in chimaw leh beidong seng in lampi dang umlou in amial sem juan in ama uleh ama uh hinna ki la uhi. Mitampi in ju leh sa ah tu suh uhi.  Adang tampi in ama uh bawlthei teng bawlin minsiet leh thilse zong khawh sahlou in bawltheiteng bawl uhi. A hinkhua ua himi ki kaanchip leh himi box ki kil/kal honna ding in a sumnei teng, a gounei teng toh pang in honkhiah sawm uhi, A dangten singnuai mi, gamnuai mi jang in hon sawm uhi. A dangten mi lian milal anei teng uh panpina toh honsawm uhi.  Adangten dawisiam leh aisansiam zang in hon khiah sawm uhi. 

Tutung zong i maban a MLA election ah kai sawm teitei in koi shi koi hin khawsah lou, i nam maban lamlam buaipilou, mahni lalnading ahi pou leh i nam i gam, i tu itate sal a puilut ding zong khawsahlou a kaisawm teitei zong um ding hi. Mahni thil dei, tup lawchinna ding ahi pouleh ahi hihi, asuahsuah suah chia pang zong hing um ding hi. Isreal taten SA adu man un akap in kap khia mai uhi. A chang ah thil khat dei seng a, del teitei, a tan sawm teitei khu GREED etsahna thupi tah ahi. Atahtah in Bible taumi deina khu LUST- dugawlna chi hi. Eg Pasal khat in Nungah khat hoi sa mama in, a nungah in lah hing dei mama lou. Aman lah a deina hat semsem, atawp in a dugawlna in Jou sengta ahi chiang force a gu khia in gam lah a luppi in atawp in that hi. I gen ut khu a chaang ah thil khat deiseng khu thiljauhuai ahi

I gam leh i society uh natna ahi. Idei khu dugawlna hing suah hi. Tua dugawlna in khawhsahlou na  hagau toh hing pui in a top a shina manthaina khuuhpi i tung hi.I thil dei chuh imu a hinanleh Pasian in hing nusia ta hi. A ban khu gen ngai nonlou hi. 

Ahiin Himun a John in a thil dei a mu sawmdan khu a ma hatna leh jat theithei, bawl theithei teng toh  honsawmlou hi. Khenbuh, suang,, singtong etc  te toh sat keh sawm lou hi. Ama hatna toh hon sawm sawm teiteilou china ahi. Ahiin  Van jat lah a hoi pen “I wept and wept’ chi hi.  A siamsa mai hilou a atatsa, tua mai zong hilou a ata it te aka chiang a en theilou, galet theilou, um maimai theilou I Pa Pasian ahi igen. Ei mihing, hepina tawm leh gitlouna in a luadimten zong i tate aka chiang ki enjoulou hi. Himi ka gel lai tahin ka tanu neu pen kap kawm in hing tai hi. Ka laigel kholphot in ka ngaisah hi. Ui lau ana hidan hi.

John aka khu a thumna zong hi ngal hi. I kaa chiang kam teng umlou a. Mittui luang hi, Tua mittui khu kamteng lah a hat pen ahi. Tua kamteng khu Pasian in anjual thei lou kamteng chi uhi. Tua khu John in jang hi.  Van leh Lei a a bawl thei ding umlou chia a kaa lai in a hong thei pa khu Leitung a leen lai  a aang a aki ngapngap na pa Nazareth Jesu ana hi hi. 

Bible ah chimaw beidong a kap a dang tam pi um hi. Tuate lah a khat khu Kumpi Hezekieh ahi. Baang lam nga a hasie tah aka chiang Pasian in a thilsiam NISA leh LEITUNG pai dan kheel liang in athumna dawn sah hi. Nisa kinungtawn chi khu Tuni tan a Scientist te buai pi kham thil ana tung sah hi. 

Mary Magdalene jingkal  phalvah a, hundampa mulou a akaa lai in  I Mangpa agei ah va kilah hi. Bible hi in christian khangthu hileh, Tuhun hileh Pasian in a tate lai a chimaw leh beidong a kapte kung ah ama kilahlou in um ngeinailou hi. Eite iki bawlthei sah ua, ki muanpi ding i hauseng ua, taina ding, hat ding, panpi tu thei i hauseng ua ahi. 

Psalm laibu i sim leh hibang a kaana tam hi. Tunin i tate jieh, i pasal jieh, i ji jieh, sum leh pai tahsap jieh,i nam din mun lungjin huai sah jieh, i hattuam te chiing leh nat jieh, mite hing musit jieh, mite i een jieh, i hinkhua a tahsap leh hindan niem jieh, mite i phahlou i batlou jieh, tahsa damlou jieh, i lawsap jieh leh adangdangte jieh kap thei khu mi hampha ahi.  Ajiehpen akapta photte lamdel ding a mansa I Pasian ahi. 

Ahiin kana ding a hoi pen leh Pasian lungkimna pen ding a ka ngaitua khu:  Ama mel imu lou jieh a kahna hileh maw. Naupang in anu amu lou sawt chiang kap hi. A nun in nehthei leh ki mawl na ahing puah ding dei hinonlou in anu umlou in thawmhau in, hing joulou hi.  Anu anglum ngai hi. Anu anglum khu kimawlna leh nehtheite toh tetheilou hi. Tunin na Pasian, na honpa, Jesu toh ki mufuhlou, ki pawl thei tahtahlou, ki fellowship thei tahtahlou, na kaal ua a liatu khat um, adaltu khat um, face to face a ki mutheilou, ki houthei tahtahlou a na umchiang na gim in na ning akihel ngei ei? *A ki hel ngei leh a ma toh umkhom nop dan achiam kha na hita hi etsah na ahi.

Thumlou hilou, Biiah inn kailou hilou, Bible simlouhilou, Maitam bawllou hilou. Ahivang a Pasian toh kithua tahtah theilou, adaltu, a liatu khat um bang  hinkhua na tuah kha ei? Tua igen khu a theisiemlou ten theilou ding a, atheisiamten mat hahsa lou ding hi. Kum tampi Hattuam lamkai, mission worker, leh thawktu pension hijieh a theiding china hilou hi.

Eli siampu in Hannah thumna khu ju kham sa mawh hi. Hia siempu puteeh pa in Pasian toh mimal a, kamteng mai phun a ki hou thei ahilam zong ana theibutlou hitajen hi.

Tunia kaana ding a hoi penpen khu Pasian ngai a kaana ahi. “Mangpa kang miss talua, Kang ngai ta lua, Nang lou in ka thawmhau a ka hing jou sih” chia ama lungguilh leh ngai a kaana khu kaana lah a siangthou leh Pasian lungkimna pen hiding in ka ngai tua hi. 

Kaana ding a hoi dang khat ahileh eima khial kisa seng, khawvel miki saseng, tahsa mi seng, lungsim sie seng, I ginna tawm seng, I kamsie seng, ei leh ei ki it seng, eima interest ki ngaitua seng, Pasian itna tawm seng, midangte it tawm seng, niin kisa seng, thumtawm seng, hagau mang vei tawm seng, Bible simlou seng, I lungsim a thildang tam seng, i tupleh i ngim leh i dei leh ikipahnate khu khawvel vai seng, .. te in kap kap lei maw…

Aban a kaana ding a hoi khu: “Mangpa nang na it, na tatsa, na hinna toh nalei sa hagau mang, belam mang te khoi ah ka mu thei diai? tuate bangchi leh ang kile kia thei diei?” chiin thumthum in kapkap lei Pasian a lungkim ding dan. Mimasa ten vang “Hagau mang hing pia in ahi louleh Shi jaw vang” chiin thum thei uhi. Ama it teng ama lungtang  a bei ngailou a tatsa vah mang te ngaituana jieh in kap kap lei vang ama akipah ding dan…

Hia atung a kaana ding a hoi pente jieh in kapkap lei ama’n i sumbat, i leibat, ih inn veng pa bawlsietnate, i tup ingiim te, I hattuampite hing sawiselnate, i thil deite khu bailam tah in hing bawlsah in hing pie mama ding hi. Ama ading hite khu temporary mai mai ahi. 

Atawpna ding ah: Atung a kaana ding a hoi i chite tantan zong tung joulou, imuna dai mama, Van lamlam zong ngaitua phalou a leitung tahsa hinkhua niteng nehding dawnding , sil leh teen toh buai  a ki satkhop changchangte kaana zong a ngaisahlou a umlou I Pa Pasian ahi.  I tate school fee leh admission, I tate nehthei, i tate sil leh ten, i  tate damlouna, i lei bat i thangbat, i innten i loutente tanpha hing ngai poimaw sah Pasian ahi. Job laibu simlei aman ganhing piangtuung pante leh ahtui kinutsia te tanpha ana veng tu pa ahi chi i mu hi. I buainate Ama ading in aneutalua leh aliantalua umlou hi. 

Tunin  na buaina na thiltuah, na nung nama, nakim napam, na kiheina lamlam beidot huai leh panpi tu ding umlou, kupna ding zong umlou khop in John bangin chimaw in na um ei? John bang in vanjat hoi pen “ka kap ka kap" chi try in. Sawtlou in, Van leh Lei a ahong thei kimu lou, abawlthei umlou khu koidang hilou in Najareth Jesu in bailam tah in hing honsah ding hi. Ama khu nagei ah nahat ding ngah in um jing hi. 

Hibang Pa Pasian leh Hundam pa i nei hi. Mangpa’n  ama sapchang/hatchang thei dingin Grace hing piata hen!

Topa Thupha!