MIHING HILOU IN MANGPA AH MUANGZAW IN
MIHING HILOU IN MANGPA AH MUANGZAW IN
Tangteel: Mihing tahsan sangin, Mangpa muan ahoizaw hi. Lengtapate tahsan sangin, Mangpa muan ahoizaw hi. - Late 118:8-9.
Bangchidan a mihing tahsan sang a Mangpa muan hoizaw adiai? I mihinpite zong thunei tahtah, sum-le-pai hau tahtah, bawlthei tahtah zong tampi a um ngaal a? Tualeh Mangpa'n direct a ang panpi lam lah ithei tuam sih ua? Tambang dawnna awlsam mama khat ahi leh, mihingte apat pilna, siamna, hatna, thuneina, hausatna leh silbawltheina zousia khu ang kipatna Mangpa ahi bou hi. Tuaziahin mihing tung ah i muanna ngazawlou in, i poimaw teng hing kipatna Mangpa tung ah i muanngamna ngazaw vai. Tambang ding a hat zong ihi.
Tambangin i Mangpa'n Jawlnei Jeremiah tungtawn in ana gen hi: "Mihing muanga, mihing baanthahatna muanga, a lungtang a Mangpa kiheisan mi khu, hamsiat in um hen (Jer.17:5)" achi ma bangin, tuni in i poimaw teng hing kipatna Mangpa muangzawlou a, mihingte i muanzawh ding khu iMangpa'n na asa mama mai a, tuaziahin tuabang mi khu samsiat hi hen achi hilhial talawm hi.
Ngai in unau, mihing tung a kinepna-muanna ngah khu hasiatna kokhu tung a ding giugeu toh kibang ahi. Aziahpen mihing tung a kinepna khu alawsamthei hi. Hinanleh, Mangpa tung a kinepna nei mi khu Mangpa'n a zumsuah ngai sih ding a, leitung beidong in a tenpi zawbou ding hi (cf. Mt.28:20). Tuni'n bangchihlai pou a Mangpa a muanna nga ding in na man tai? Nop leh da hun a zong mangpa a muanna ngaden thei dingin Mangpa ah ki-lankhe vai.
Thuumni: Mangpa aw, ka poimaw teng mit amu in mihingte apat piangdoh bang nanleh, Nang a pat kipan ahizaw hi chi ka thei chiangta hi. Tuaziahin, nopni-dani a zong mihing tung a muanna ngazawlou a Nangma tung a ka muanna ka ngahden zawh theina dingin Jesu min in kang ki-lan hi. Amen!
No comments