Mihoi leh midih hinapi a hahsatna tuah

Mihoi leh midih hinapi a hahsatna tuah

WAY2GOD

"Hezekia in muonhuaitah a abawl sieng nua in, Assyriah leengpa Sennakerib hing pei in ava buluhta hi..." (2 Khangthute 32:1)

Israel te kumpi Hezekiah in a vaihawm kum 4 a chinkum in, Assyriate'n ahing buluh ua Israel khopi tamtah a suhsiatpiah uhi.

Kumpi Hezekiah pen leeng hoi mama, iMangpa mai ah dih leh gin-umtah ahi hi. Khangthute nina 31:21 na in tambangin agen hi, "Mangpa biahinn a nasep silbawlna zousia leh danthu leh thupiehte zuina ah, Hezekiah in a Pasian maipha asui a, alungtang zousia toh asem a, alawching zel hi" achi hi. Thamlou in a leenggam sung apan milim biahna zousia a phiatmang sianga, biahinnte lamthahin, a sunga kithoinate leh Pasian biatna leh phatnate khu Siampute toh apanthahta hi.

Hinanleh Khangthute nina 32:1 in tambangin agen hi, mihoi, midih leh mi ginum, leengpa Hezekiah khu Assyriate leengpa Sennakerib in ava simta hi (buluhta hi). Tamna i gen ut pen khu, vangsiatna, hahsatna te khu mihoiloute tung chouh ah tung ding in bang khenkhatte'n i ngaituah kha let uhi. Hinanleh, tambang hahsatnate khu mihoite (or mizousia) tung ah tung thei gige ahi chi a chiang mama hi. Tamziahin, i hinkhua ah hahsatna peel ding a kisingsakhol hizolou a, tambang hahsatnate palgaalkai ding a kisingsakhol gingtute hizo va ui.

Tam a tung a bang a pan ilaahthei na ding un GINNA (proof um seselou napi, ahima hi chia pomdet ngam) apoimaw hi. Aziahpen, tambang beidot hun in Kumpi Hezekiah apatau (chimaw) sih a, tambang hahsatna lian tah sang a lianzaw (thupizaw) Mangpa ah amuanna anga chinten hi. Tuaziahtahin tambangin agen hi, "zauvawt sih unlen lungzong lungke sih un, hangsan leh hattahin pangzaw un, aziahpen Assyriahte sang a hatzaw Pasian eite lah ah a um hi" achi hi. Tamnah, hahsatna liantah atuah uh sang a hatzaw leh lianzaw Pasian um ahi chi amuchian mama a, Mangpa ah amuanna angah ziahin, Mangpa sepai galkaapte'n (angels) Assyria gaalkapte anuaimit siangta uhi.

Ei, khenkhatte pen i gualtungtuan theina ding un ahisihleh hahsatna i palgaalkai theina ding un, naahtah a kisahkhol masatlou in bangma i bolngam sih uhi. Kisahkholna khu poimaw mama ahi, hinanleh Mangpa a ding a kisahkholna khu tahsalam leh khovel vai a kisahkholna hizolou in hagaulam gaalsat ding a bangchihlai pou a mansa china ahi. Tam khu bangdang hilou in Mangpa a sitanpha a muanngamna toh thumna leh Pasian thutah a hinna khu ahi mai hi. Tambang kisahkholna toh koipou tung a tungthei, hahsatna ituahkhah chiang un ipalgaalkai zou ding uhi.

Hahsatna ituah chiang un, Mangpa gawtna, Mangpa thangpaina chisih vai, Mangpa'n tambang ituah ding uh alunglam hilou hi, tamte sangin, Mangpa aw, bang kachi ding a nang dei ahiei, na deidan hing theisiam sah in chi zo vai. Eite pen, ahoilam zousia a hing ding leh ahoilam silte tang(receive) ding in i Mangpa'n ang deisah hi.

Simtu zousia iMangpa'n hagau lam panlaahna athahtah a panthah kia thei ding in athupha hing tangsah chiatta hen.