Tukum 2022 kumbul apat I Hinkhua a Siltung Jousie "Na Chi Bang Bang Hitahen" I Chi Thei Diai?

Tukum 2022  kumbul apat I Hinkhua a Siltung Jousie "Na Chi Bang Bang Hitahen" I Chi Thei Diai?

Tukum 2022  kumbul apat I Hinkhua a Siltung Jousie "Na Chi Bang Bang Hitahen" I Chi Thei Diai?

Pastor Dongzathawng
Devotional # 45 ( vol 4)  ( R)
Fellowship of Thirsty Souls n Hungry Hearts


Shillong Vangkhua Jing Nisa Emsing seng etlawm tah apat in Jingpha!

Tunin Mangpa’n na hinkhua leh na in sung ah na lam-et phahlou apat in hamuanna lamdang tah hing tung sah ta hen!

Tuni Topic: “Tukum 2022  kumbul apat I Hinkhua Siltung Jousie “Na Chi Bang Bang HItahen” I Chi Thei Diai??”

Text: Luke : 1 : 38 - *“And Mary said, Behold the handmaid of the Lord; be it unto me according to thy word. And the angel departed from her.*“

Luke : 2 : 35 - *“Yea, a sword shall pierce through thy own soul also”*


Introduciton:

1). Christmas ki jouta…hattuam misiangthou te toh siansung kim a damtah a iman khawm thei leh bangdang jong poimaw seng sih chi mai vai. Kipah dan thei vai.

2) Janni tah ka tanu phone lui kimawl na ajat maimai khat asie hita chia kakoi dap uh khu kava tham tham uleh hing hoi nalai vang lah in. Tuami toh ka hing msg ahi. 

Thirsty soul simtu tampi contact list abei jieh in kang thot leh thotlou toh dim ding hi. Hepitah in ahing thot nonlou chi sih un la..  ahi thei tan in khoi tah e khat apat a himi message na mu leh na number uleh min hing thot kia mai un maw?  Thirsty souls te insuikhawm ki bawl lai tah hi

Himi ka tanu phone lui a ka sim kang thua leh min tampi hing kilang doh kia in, ka thanuam seng a kang gel ahi.

3) China in bawl e tulai…China gingtute ading thumpi vai. Putin in jong ki lep ding ut ta chi kija.

4). Tukum Christmas leh kum thah kikal khu boring mama.. khua hun lah vot, Shillong vang vang 12 apel leh khua liap hi mai. Me lei a pot khiah mai mai jong kingap sih. A umloute ngai a lung leenleen thei. Lawm leh gual te jong ngai huai veve..

Ka family un Rocky part 1-6 ka et bei sawm uhi. 3 tan jou ta. Hipen America te family movie hoi mama, politiciante'n zong inspiration a ajat uh khat ahi. 

5). Direct a whatsapp message dan a sim toh, PDF file a sim khoi anop jawi hing thei sah mai mai vo..

6) Good news ah I laibu thah ding “THIRSTY SOUL" chu Zokam- Paite version leh Thadou version translation pai tou lellel hi. Ana thum pipi vai e…Sponsor ding jong um nailou Thumtou jel ding himai.

Tuni Topic a lut ta vai:

Tukum 2022 khu nua et kia leh chin na hinkhua leh na inn sung ah Thilpha thil thupi tampi tung ding hi. Khat khat in sim ding in kisa in. Ki mawh buai sah sin.

Ahin alang khat ah jong 2022 vang kum sie vawt… kum hoilou, vangsiet kum  chia na vuivuina ding jong tam ding hi. 

Kei ading in jong tukum in ka nu Stroke in puh a tuni tan hoi thei nonlou hi, Houpi thei nonlou, hepi  huai tah in thuah toutou ta hi. I thumthum vang in jong Pasian in ahi chi ding a aphal hita van, hoi thei tahtah nonlou hi. Tu ha mama in Ka iphone  man tam pi man ka mang sah hi. Janni mama in ka nau uh upanu *Kimbawi* ( Manhoikim) in “ka scooter, ka lah thah uh ka nu te inn a insung a ka umlai un ana ki gu mang” chiin hing thei sah hi. Hite Example a igen maimai ahi. Thil dangdang jong i hinkhua a na ngutngut..vuipi thei mama hunkhop jong i tuah ding hi. 

Christmas a Shillong Lutheran church sanggamte kung a ka thu gen “Kum lui laa i na sahsahte uh : “na pampai na pammai,, nua hat thei non lou,,, ka ngai e khua ngai in… etc  chi te khu hing moh tel tel non sih un. Apuah ten zong bang vai a ana phuah uh adiei?” chiin chiam mui nan ka gen hi.  Hua kum lui a i tuahsie teng pi ngai a sah sah ding i? 

Ahiin igen sawm khu tua apeisa a, i tuahsiette khu puapua ding, vui pipi ding in kumthah 2023 ajong puahlut tou ding in, kum 2022 a ivangsietna, i lawsapna, i guallelna, i tuahsiet khu 2023 a jong nat pipi ding, thuahtou pipi nalai ding ka diei?

Tanglai Mary bang a “Mangpa na chi bang bang hita hen. Nang tung ding a na phal khu na phal ahi mai hi. Tunia pat in hamsa nanleh ka pawm ding a, kum thah ading masawn na leh step lah na in ka nei ta ding hi” chia kilatna khat inei ngai hi.

Hun hing tung ding a bangma itheilou man in “Mangpa na chichi hi ta hen.. nang chi bang bang in hing pui in” chi nop hi. Ahia hun peisa leh tu leh tu a i hinkhua a thil tung te khu pawm hah sah hi. Tuami a tuni i point ding uh.

Mary toh kisai tunin gen seng sih vai. Ahin tunia Van Angel kung a “na gen bang in ka tung ah tung hitahen” achi khu tulai numei te revival na a emotional gawp a kilatna toh kibang lou hi.

Himi a decision khu maban a Jesu nu ahijieh a aman saangpi apiah ding kipatna ahi. Jesu nu ahijieh a athupi leh a hamphat huai lai in amaban lung jin huai vawt hi.

Amasa in, agai ziahin a pasal aki kham pipa in nual in khen thei hi. Tua mai hilou in mipi in suang in sep lia thei uhi.

Khuotaang a nungah nou kum 16 hipan khat a pasal um lou or kithei lou a naupai khu Jews te tawndan in pomthei hingeingei lou hi. Mose dan a suang a selup ding himai hi.

Ha 9 sung atapa apai in bangjat vei Angel ava kilah kia diei? ki sim kha lou hi. Khatvei ki mu tuatua khu final himai hi. Achang ah Mary lung gim in asil mu khu juau leh mumang mai mai ade aw achi chang um ding hi.

Hibang te kal ah ama jong Judea gam a a unu Elizabeth kung a ha 3 va ki phual hi.

Ahun ang tun in Mary hinkhuo ah Van apat a hun geihgeih in information tung chetchetlou leh ani sim a hun sim ahina leh ata hinna jau huai dinmun ahi jing hi.

Setan aha pan mama lai in *Vantung lam a Heavenly special force* ten smart tah in ana sep ding uh sem chetchet uhi.

I Mangpa Jesu pian hun a Mary siltuah te ithei siang uhi. Ginna jal a thupuhna a risky mama vang in Aginna jatat in um a kepbit , ven bit ahi jing hi.

Ahin hun hing pai jel in A sung a piang Pasian Tapa khu mihing te bang veve in Ama leh Ama voluntary a a Pasian hina teng suakhiata ahi chiang Nu in atatung a gimpi ding teng Mary in jong gimpi veve hi. Pasian tapa ahijieh a nop tuan na um mama lou ding hi. Hichi ding ma a Pasian in plan a bawl ahi.

Nu leh pa ten i tate jieh a mai taang ding, lu lian ding, jatatna khuh sah a um ding chi khu i tup uleh i kipana pen uh ahi. Koima i ta te jieh a mual phou ding, hausa coart a ding mialmual ding chite ki chim taah ta hi.  Tate jieh a mai vah ding ki-ut chiat hi.

Zogam nupi te pen i tate Pasian nasem ahi uleh zong singtang pastor khat maimai koi ma thei phahlou ahilou leh mission field a genthei tah a hinkhua mang ding in ki dei lou hi. Pastor ahileh jong office a tou ding,  speaker lar mama hi ding, USA a pai teitei ding, a Pasian nasep khu inn teen pi ding, nop tah a hinkhua mang ding” chite idu thusam uh himaithei hi. 

Ahiin tunia igen Mary in ana hin, miten a en mama uh tanchin pen tulai Lamka nupi te duthusam ana hilou talua hi.

 Mary in A hin leh akep Pasian tapa khu leitung a "Homeless, Si-alte, Va-te jong tuh lou, koima dei lou, mi jousie nual pa hing suah a, a tawp in cross ah ahing tang in ki khai a, a sung a piang atapa Cross tung a  alai ta a aki kou guai guai amit in en hi. Aloi hoipen John te, Peter ten anut sia lai in aman nusia thei lou in atawp tan ah din pi hi. 

Koi atapa jieh a maitang leh jatat a um malah lah atapa jieh a tawplou a mual phou phou leh  thuah thuah ding nu ahi jaw ta hi. Nu llah a a hepi huai pen pen nu ahi ta hi. Atapa in bawl thei na pi, Van lei Lei a thunei  pa hinapi a siamsa te’n a ut ut a a bawl ding a Belam nou bang a ki daw pa ahi ta hi.

Theologian ten l hitung tang ah Jesu khu anu Mary in Hagau Siangthou a gai lou a midang khat toh agai hileh himun ah vang ki dawm jou non lou in kipuang ta va chi uhi.

Atapa hibang amitmu a ki satliam hepina bei a ki bawl amu in vang kum 30 val ta akung a Angel thu gen “na hinna temsau a vu in ang um ding” achi khu dih sa vawt ding hi. *Atapa in cross tung a ka jou ta chia a akikou bang in aman jong* “Mangpa kana ki lat na bang in ken jong tuni na tapa tung a ka mawpuah ka jou ta” chiin kipah thu gen leh ki lawm hi.

Mary Leitung a nu jousie lah a nu hampha chi khu thei sa ahi. Nikhat Jesu avah lai in Nupi khat in “Anawi na tep nu khu hampha hi na e” ana chi hi.

Ahi Mary jong hampha ki sa mama hi . akipah dan alavui gen ah imu hi. Ahin aman (price) apiah jong baih vawt lou hi. Atapa jieh khatvei jong a hamphatna, a jar ajouna ki mu lou hi.

Tulai pastor law tawm nou nou saang a gim tah swm nu te Jesu nu Mary sang in mai aan jaw nalai ding uhi.

Ahin tunia igen ut khu Akilat na a *unconditional obedience* khu ahi. Angel in ava gen lai in aman bang ma question , request leh advice bangma jong la lou in “Na chi bang bang “chi tawp hi. Tuabang numei ma ahi Pasian in ana et et. Atapa kem thei ding mihing khat chuh Pasian in chi jiat mama ding hi.

Mary in ahinkhuo a atung tung Pasian thu ahinah leh thuah ding in mansa achina ahi.

Tunin ihin khua ah adiah in *kum paisa teng ah bang kim ichi dan dan in apai ei? or i ut lou tampi iphu kha uai? I duthusam lou lam ngen ituah kha ei? kaha se  himai thei hi.*

iki doh ut khu isil tuah ei deina lou i ut lou te khu tunin i vui pi a ih lungthah pi hi. Tunia Pasian kung a *tuateng jong nang thu a tung ahia nang thuthu hi ta hen na suah ka hi”* chi thei leh navah tah in Christmas imang thei ding hi. “Na suahnu ka hi”chi hi. Eite suah ding in ngaidan, plan leh deutek i hau seng uh hilou maw? *Suah in choice nei ngai lou hi*. Aki gen gen bol dia um ahi. Suah in mahni thu ngen ideih leh koi pu in ahing kem sawt thei in ahing jang thei diai?

Tutung khu mahni deidan surrender a Na Thu thu chi hun hisah vai. *“Thudeih”ki chi Ih Eden a ih pianpi uh i naupang apat ahing control leh eisung a Pasian nasep dal thupi pen ahi. Hagau miten himi thalupna ding in aman tampi pia ua, Ahinkhuo un dou uhi.* Eiten vang hoi deu in ivah khang ua i lal sah mama uhi.Ann tui tui ipia hi. Achi dan dan ijui uhi.

Himi thudeih na in nupa kal, tate tung leh insung leh hattuam sung vai hom in ibuai sie siang uhi.

Himi thudeihna ama sung a um thatlum leh soijawi masa pen pen te khu gual jou hinkhuo mang masa te ahi mai uhi..

Tukum hun peisa asia apha ahi jong in atung jou sie Nang Thuthu ahi, ka thumna na dawn lou tanpha jong chia iki surrender chiang Merry Christmas huikhua hing laang pan ding hi.

Mary a ahileh mailam a apiang bang bang na thuthu chia ka ap ahi a. Ei a ahileh tukum paisa a atungsa jousie khu nang thu lou a tung um lou. Nang thu thu hihen ka pom a ka ki surrender ichi ngam leh lungmuan in hing luan lut pan ding hi.

 Tuachiang kum thah a i lamjawt ding dan, i pai ding dan, i hin ding dan ki kup thei pan ding hi.

Kum lui natna, Egypt hamsietna pua kawmkawm in Kum thah Canaan gamga ine thei si ding a, canaan gam hin khua toh iki adjust thei sih ding hi

Hitler nuai a soisahna tuah jou Rabbi khat America a pem theiding in hamphatna nga hi. A gam thah a pemlut ma in "America ka lutma in Adolf Hitler ka ngaidam poimaw hi. ka pemlutna ding ka gamtha ah ka sunga um Hitler ka paw lut ut lou ahi" chi hi.


Mangpan hibang chi thei ding Grace hing pia ta hen!


Topa Thupha!





No comments

Powered by Blogger.