“Mihing a di'n khatvei sih seh ahi a, vaihawmna'n a zui diing” (Heb.9:27)

 

“Mihing a di'n khatvei sih seh ahi a, vaihawmna'n a zui diing” (Heb.9:27)

Eugene H Chinzahao | September 2011

Khatvei nungak M.Div. zoukhia khat a ngaihjawngpa’n midang ji a a neihsan a, lungkham lua a om, hehnep leh khamuan ngai a om a, a lawmnu’n, “Ka lawmnu a ngaihjawngpa’n ji a neihsan a, i vahehnem diing” chi in a honjawn hi. Ke’n leng, “Nou a Bible zil a zoute mite etton diing pente hehnep leh khamuan na ngaih mawk uh, a Bible zilloute hehnep ngai na tel un chia!” chi in ka na dawng hi.

Hiai leitung i tangtawn gam diing hilou a, i khualzinna gam ahi, chih Laisiangthou a kigelh i sim un, i thei mahmah ua, himahleh, Kha Siangthou hatkhum a kigelh Laisingthou a kinga zou taktaklou i hi uh, chih a kilangchian mahmah hi. Pathian thutak ah i kinga kei ua, khovel thil ah i kingajaw uh, chih a kichian mahmah hi.

Kanaan gam juan a Israelte a pai lai un, Mosi in Kanaan gam enkhe diingin, nam khat a a lubawk chiat a sawl a, mi 12 a pha uhi. Kanaan gam a va-enkhe petmah ua, ahihleh, chih bangin grep khawng a hoih a, bawngnawi leh khuaiju a luang gam a na hi taktak a, ahihhangin, a kulhte uh a thupi mahmah a, huan, Anak suante bang a lian thei mahmah ua, nam 12 lak a nam 10te a lunglel mawk uhi. Joshua leh Kaleb chihlouh siah in, lunglelhhuaitakin a gen ua, Mosi tungah a phun ua, Aigupta gam a a om lai khawng uh a khiaklah thu peuh uh a gen ua, huan, Joshua leh Kaleb thah a sawm ua, huai hun laitakin Pathian in mial a sawl a, Joshua leh Kaleb lousiah pasal kum 20 tunglam teng a sisak a, huan, Sinai tang ah kum 40 a vakvai uhi.

Hiai thu na sim chiangin, bang na ngaihtuah a? Pathian muanlouh tuh khelhna ahi, chih na mukhia hia? “Na omdan diing Toupa tungah nga inla, amah muangin, Aman a hihvek diing” chih chikchiang a zat dia kigelh ahi de aw? Ahihkeileh, a minpu maimai a kristian i hih jiak ua Pathian a kinga theilou, khamuang theilou i hi jaw uhia? chih i kivelna diing ua poimoh ahi. “Na kiang uah khamuanna ka honnutsiat ahi, Khamuanna ka honpia a, khovel in a piak bangin ka honpe kei, na lungtang uh buai kei hen, lauh leng lau sam kei hen” chih thu i Toupa Jesu’n hiai leitung a nutsiat diing thu a nungjuite kiang a a gen, eite aa dia leng gelh ahi.

“Aigupta gam goute sangin, Kris jiak a gimthuak a ngaisang zotham a, kipahman muh diing a lamet jiakin” chih Mosi lungtang a om ahi a, huai in hontheihsak tuh, hiai Aigupta in khovel a ensak a, huan, kipahman muh diing a lamet jiakin, chih in van gam gen ahihdan hontheisak hi. Huaijiakin, a tangpi leh thutak a gen in, sih khamuanna nei loute jaw, hiai khovel thilte a thupingaih jawk jiak uh ahi, chih chiantakin a kilang hi.

“I khovveng hihna uh van ah ahi jaw a, hiai leitung jaw i khualzinna gam uh ahi” chih leng i sim uhi. Huaijiakin, i ji hiam, i tate hiam, i pasal hiam, i nu hiam i pa hiam, i inkuan sung a khatpeuh in honsihsan chiangin, van gam kai diing hia diinglou, chih bel thei kei hang, ahihhangin, van gam kai dia i gintak aleh bel, i kahkah louh a, i nehnou hetlouh a, i kipahjawk diing uh ahi.
I chang pansan un a gen a dik mahmah, chih i theihchet kilkel uh ka gingta a, niteng in misi tampi a om jel a, a om jel diing. Mihing aa diingin, khatvei sih seh ahi a, huai nungin, vaihawmna a om diing, chih Laisiangthou gen a tangtung ziahziah mai hi. Huaijiakin, nang leng si diing, kei leng si diing, a kua leng a silou diing i om kei uhi.

Ei tung a siatna, sihna a tun hun a thuaksiam haksa sa chiatte i hi uhi. Ahihhangin, Pathian a kinga, a thutak a kingate leh hiai leitung i khualzinna gam ahi, chih theisiamte aa diingin, khamuan louhna diing a om kei hi. Pathian tangtawn thiltupte lak a khat, “Mihing aa diingin khatvei sih seh ahi a, huan, huai nungin vaihawmna (thukhenna) a om diing” chih a dikdan i muh uh, i jak uh, i sim uh ahi. Hiai juau ahi kei a, thutak ahi chih i mit mahmah a mu a, i bil mahmah a ja a, khoihkha hialte leng i hi ua, huchi hinapi a Pathian thutak a i muanzoh keileh, i kristian hihna uh, i gingtu hihna uh i kivelchet uh a poimoh mahmah hi.

Laisiangthou ah, kristian lem, buhlem, ngia belam vun silhte leh kiloh belampu chihte leng i mu uhi. Huaite mah bang a, a lem hi jenpi a taktak kisakha houh i hi jaw uhiam?

Gingtu diktakte bel, hiai khovel haksatna gam khelah kuamah a om kei diing. Pathian thutak leh a Kha Siangthou a kingakna kip nei a, sih ni man ni a khamuang thei chiat diingin, i ginna uh a dik leh diklouh velchian masa lehang maw?

Huaijiakin, bang dang teng sangin leng sih ni man ni a i khamuan dan, i puaksiam dan zil in i hihna a kilangchian mahmah hi. Huaijiakin, nang leh kei aa diingin, Jesu Kris i neih taktak leh taktaklouh, hichi bang hunte ah mite mitmuh leh ei mahmah in leng i theichian thei uh, chih a kilang hi. Sih khamuanna i chih a zungpi a bulpi a dik leh diklouh ah a kinga lian mahmah hi. Sih khamuanna leh i inkuante leh tanaute sih chiang a i omdan a dik theihna diingin, i dam lai ngei in hihfel chiat ni.

Sih khamuanna leh puaksiamna nei thei chiat diingin leh a min thupina diingin, Toupa’n a thu vualjawl hen aw.