THEINA TAHSAPNA ZIEH IN

THEINA TAHSAPNA ZIEH IN

📝 Joseph Doulunlal Samte

HOSEA 4:6 Ka mite’n theina atahsap zieh un, suhmang thai in a um uhi. 

Khristiante'n bangzieh a hinkhuo a guolzawlna sang a, hasatna atuoh tamzawt uh adiei? Azieh ahileh, laisiengthou gen dungzui in theina itahsap zieh uh ahi. 

Laisiengthou in dawimangpa eite suse ding in ang pei achi hi, alehlam a iguolzawh ding dan uzong ang hil hi. Abuoina tahtah khu ahileh Pasian thu I nelsie ukhu ahi. 

Theina dihtah in ginna asiem hi. Silkhat ing theichiang (clear) leh, tuakhu in ginna angpiangsah hi. Tua theina dungzui in igamtang zel uhi. 

Pasian mite vangsietna zieh a suhsiet a ina um zel theina upen Pasian in ang itlou zieh ahisih a, ang panpi joulou zieh zong ahi dieh sih hi. Thutah a ikalsuanlou ziah uh ahi. Aziahpen thutah a hing ding hinapi’n thutah theilou ina hi zieh uh ana hizaw hi. Thutah khu na thei tahtah hilei, tua theina dungzui in igamtang ding uhi. Tuachi’n theina dihtah dungzui a gamtatna in ang zalensah a - ahing suse sih a zong suoh bang in ang umsah sih hi. 

JOHAN 8:31‭-‬32 ³¹Tuachi’n Jesu’n Ama gingta Judate kungah, “Ka thu a na um zing u’leh Ka nuazuite na hi tahtah uhi. ³²Tualeh thutah na thei ding ua, tua thutah in noute ahing suohtasah ding hi,” achi hi.‬

Pasian thu khu eite hing zilsahtu laibu ahi. Tambang a i um chieng un, ei a di'n na asem zel hi. I deitel ding uh Mangpa'n aphal hi. Deitelna dihtah ibawl chieng un Mangpa lungdamna mi nunnuom pen kihi zel hi. 

Tam message zieh in diabol in hing mawpai sih henlen. Tuanasang in - lametna hing (living hope) hing pezaw hen. Pasian thu nangma’n zong naki zil (sui) thei a, tualeh A thu dungzui in mailam hun a adihzaw sem in hangsantah in gamtang inlen guolzawlna tuntu zong hi in. 

Mangpa, laisiengthou a theina khu ei pie'n, thutah Nangma a ka theina bang a ka um a, mi nunnuom kahi thei nang in chi'n Pasian angsung a lungsim jousie toh na thum kia va ui. 

Mangpa'n simtute jousie A hagau toh hing vil tahen.