LAMETNA OMLAI HI | NUNGZUIHNA AH BANGTENG NA NUSIA NGAM HIAM?

LAMETNA OMLAI HI!
Nisim Manna

𝘽𝙪𝙡𝙥𝙝𝙪𝙝: Ahih hangin a kimet khit ciangin a lu tunga a samte khang kik dingin hong kipan hi. Thukhente 16:22

Samson tangthu pen lipkhaphuai a, a langkhat ah enleng thangah huai mahmah zel hi. Lipkhaphuai ka cihna in Pasian in a lamdangpi in thahatna pia napi a piapa deihlohna bangin a zat manin a galte simmawh a suahna ka genna hi. Ahi zongin a lu tunga a samte khang kik dingin kipan hi! Samson in thahatna a ngahna pen Pasian tawh a thuciamna pan ahi hi. Tua thuciamte lakah khat pen sammetloh ding hinapi Samson in palsat hi. Tua ciangin Samson a thahatna bei-in a galte khutsungah maizum huai tak leh guallel takin a om laitakin a lu tunga a samte khang kik dingin hong kipan hi! 

Tua mah bangin eite zong Samson bangin maizum-in, guallel-in, lawhsam-in, lamet bei kisa kha ding hihang. Tua bang ahih laitakin hih thu phawk in: Hih ciang pen a beina, a zawhna hilo hi. I Pasian pen a hoih Pasian hi a, hehpihna tawh kidim hi. Amah in hunpha dang hong pia hi. Khalam vai takin gen leng i sam a kimetkhiat hangin khangkik theinawnlo ding cih thu om nailo hi. Samson zong a guallelna mun panin lungsim takpi tawh Pasian hong sap kik ciangin Pasian in dawngin thahatkikna guan-in, Samson ngetna picingsak hi. Tua mah bangin eite zong i lawhsap-i guallelna panin kipan kik thei hihang. Lungsim takpi tawh Pasian sam kikin kipan kik ni, a hoih pen in hong ngak hi! Lametna omlai hi! 

Ki-apna: Topa aw, lametna a bei mite lametna thak guankik na hih manin lungdam kong ko hi. Nangma muanna tawh a thakin kipan kik dingin Jesu Khris minin kong ki-ap hi. Amen!

NUNGZUIHNA AH BANG TENG NA NUSIA NGAM HIAM?
Nisim Manna

𝐁𝐮𝐥𝐩𝐡𝐮𝐡: "Amah in zong a puan lawnkhia a, dingto pahin Jesu kiangah a pai hi." Marka 10:50.

Bartimai nakzaw sem in hong kiko ciangin Jesu zong khawlin a nungzuite kiangah va sam dingin sawl hi. Tua ciangin Bartimai in a puan lawnkhia in, dingto pahin Jesu kiangah a pai hi. Hih hun lai-in khutdawhte in midangte tawh a kitheih khenna dingin khutdawh puan tuam nei uh hi. Tua manin Jesu in a sapsak ciangin khutdawh Bartimai in tua khutdawh puan a lotkhiat in gen nei mahmah hi. Tua in khutdawh Bartimai in Jesu a upzia hong theisak hi. A sampa Jesu in damsak ding a, a khutdawh nasepna pen sem kik nawnlo ding cih ki-umpah hiding hi. 

Hih in hong theihsak pen eite zong Pasian ukna i lut theihna dingin hong dongtang sak thei nate khempeuh leh hong gakcip mawhna leh khialhnate khempeuh paai khia-in, i mai-ah a om taina ding lampi a mong dongin lungsim kip takin i tai kisam hi (Heb.12:1) cih hong phawk sak hi. Suahtakna na ngah theihna dingin ama nuntakna tawh hong tankhia Jesu adingin bang teng na paaikhia ngam a? Bang teng na nusia ngam a? Na nutsiat ngam zahzah Topa hoihna na mu ding hi. 

Ki-apna: Topa aw, Nangma nung kong zuihna ah hong dongtang sak thei leh hong gakcip theite panin ka kisiansuah theihna dingin hong huh in . Jesu min in kong ki-ap hi. Amen!