PASIAN IN HONG IT TAKPI MAH HIAM? | PASIAN KIHELNA NEU CIH OMLO!

PASIAN IN HONG IT TAKPI MAH HIAM?
Nisim Manna

Bulphuh: Bang hang hiam cih leh tua singgah na nek ciangun na mitte uh kihong ding a, apha leh asia thei-in Pasian tawh na kibat ding lamtak uh Pasian in thei hi, aci hi. Piancilna 3:5

Adam leh Evite mawhna pen a uplohna uh ahi hi. Satan in a uplohna dingun a khemzia thunih tuni dong zang lai hi:
1. Pasian' thu muanglah sak hi: Pasian in Adam kiangah huan laizang a singgah na ne kei-in, na nek leh na si ding hi (2:17), a cih pen Satan in silo ding, mitte vakzaw ding, pil ding, Pasian tawh kibangzaw ding, acihte in Pasian' thugen muanglah sak hi.
2. Pasian' itna muanglah sak hi: Satan pen ngian siam ahih manin Pasian in Adam leh Evi hong it lo-in a hoihpen hong deihsak lo a, tua manin amah tawh na kibat dinguh a lau manin hong dal hi, aci ahi hi. A taktakin Pasian in Adam leh Evite nak itlua kisa nek ding singkung nam khempeuh a omna Eden huan ah om sakin, nitak simin amaute tawh hunzang khawm hi. Tua bang hinapi Adam leh Evite in Satan khemna hangin Pasian' itna muanglah uh hi.

Tuni in eite zong i Lai Siangtho ah i muh bangin leitung piancil a kipanin Pasian in ama mite itna tawh a kep a huaina, a tapa neihsun nangawn sitlo in hong piak dongin a itna hong lakpa hi a, tuni tan dong ama itna leh hehpihna tawh hih ciang hong tunpihpa hi napi Pasian' itna na muanglah kha hiam? Na muanlah leh a taktakin nangh Pasian na itna a muanlah huai man hizaw ding hi!

𝙆𝙞-𝙖𝙥𝙣𝙖: 𝙏𝙤𝙥𝙖 𝙖𝙬, 𝙣𝙖𝙣𝙜𝙢𝙖 𝙩𝙝𝙪 𝙡𝙚𝙝 𝙣𝙤𝙣𝙜 𝙞𝙩𝙣𝙖 𝙢𝙪𝙖𝙣𝙜𝙡𝙖𝙝 𝙝𝙚𝙩𝙡𝙤-𝙖 𝙣𝙖𝙣𝙜𝙢𝙖 𝙩𝙪𝙣𝙜𝙖𝙝 𝙠𝙤𝙣𝙜 𝙘𝙞𝙝𝙩𝙖𝙠 𝙯𝙖𝙬𝙝𝙣𝙖 𝙙𝙞𝙣𝙜𝙞𝙣 𝙅𝙚𝙨𝙪 𝙆𝙝𝙧𝙞𝙨 𝙢𝙞𝙣𝙞𝙣 𝙠𝙤𝙣𝙜 𝙠𝙞-𝙖𝙥 𝙝𝙞. 𝘼𝙢𝙚𝙣!




PASIAN KIHELNA NEU CIH OMLO!
Nisim Manna

Bulphuh: Tua ciangin Jonathan in ama galhiam a pua tangvalpa kiangah, "Hong pai in, dawi bia mi hih khuacingte kiangah va pai ni. Topa in eite' adingin hong hih sak kha ding hi; bang hang hiam cih leh hong hotkhiatna dingin a tawm in Topa nawngkai saklo ding hi, aci hi." Samuel Masa 14:6

Hih hun laitakin Israelte haksatna sungah om uh hi. A galte uh Filistiate leeng 30,000, sakol galkap 6,000 leh galdo ding galkapte tuipi gei a sehnel zahin a tam tawh hong kuan uh hi. Tua ciangin Israel mite suang hawm sung, leihawm sung, hante sung leh tui khukte sungah kibu uh a, pawlkhatte tai kek uh hi. Kumpi Sawl tawh Israelte galkap 600 bek om in, amaute zong lau leh liing in om uh hi. Tua bang laitakin Sawl tapa Jonathan lau lo-in a galhiam a puapa tawh a galte go dingin va kuan ngam hi! Amaute gel in a galte uh 20 that uh a, tua ciangin Topa in a galte lakah lauhuaina lianpi piangsak in a galte uh amau leh amau kithatsak gawp hi!

Tua mah bangin i nuntakna ah khat veivei nasep ding a vekin zawhkhit teitei zong kisam masa lo thei hi. Khat veivei Jonathan banga upna tawh i kalsuan ngam beek ding Pasian in zong hong kalh thei a, aban teng Pasian in kei khutsungah hong koih in zong cithei hi. Tua manin tuni in Pasian in nang hong sapna, hong deihna ah upna tawh kalsuan ngam, mainawt ngam inla, tua tungtawn in zong Pasian in na' hong sep ding zong lamen in ngak in. Pasian kihelna pen neulua, tawmlua cih om ngeilo hi, cih phawk in!

𝐊𝐢-𝐚𝐩𝐧𝐚: 𝐓𝐨𝐩𝐚 𝐚𝐰, 𝐧𝐚𝐧𝐠 𝐧𝐨𝐧𝐠 𝐬𝐚𝐩𝐧𝐚, 𝐧𝐨𝐧𝐠 𝐝𝐞𝐢𝐡𝐧𝐚 𝐤𝐡𝐚𝐭𝐩𝐞𝐮𝐡 𝐚𝐡 𝐉𝐨𝐧𝐚𝐭𝐡𝐚𝐧 𝐛𝐚𝐧𝐠𝐚 𝐮𝐩𝐧𝐚 𝐭𝐚𝐰𝐡 𝐤𝐚 𝐦𝐚𝐢𝐧𝐚𝐰𝐭 𝐧𝐠𝐚𝐦𝐧𝐚 𝐝𝐢𝐧𝐠𝐢𝐧 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!