PASIAN ZIA NGAKNA

𝗣𝗔𝗦𝗜𝗔𝗡' 𝗭𝗜𝗔 𝗡𝗚𝗔𝗞𝗡𝗔
Nisim Manna

𝐁𝐮𝐥𝐩𝐡𝐮𝐡: Sarai in Abram kiangah, "Tu-in en in, Topa in ka ta neih ding hong khaktan hi; ka numei-sasem nu' kiangah lum in; ama sung panin keimah in ta a nei ding ka hi kha ding hi," aci hi. abram in Sarai' thu mang hi. Piancilna 16:2

Pasian un i thungetna hong dawnzia nam thum om a: "Hong pia ning, " Na ngak in " leh " Hong pia kei ning " cih hi-a, hih teng lakah a haksa pen in " Ngak(wait) " cih ahi hi. Bang hang hiam cih leh hih in i ngak hun tan ding kitheilo ahih manin tua sungin lungkiatna hong om thei hi. Pasian in Abram kiangah ta piak ding na kamciam khin hi (Pian.15:4ff). A kum-a sim hong pai ciangin Sarai lah naupaii tuanlo ahih manin Sarai in zong kei hilo in ka numei-nasem' nu tungtawn in ta hong pia ding hikha ding hi ci-in Hagar pen Abram tungah pia hi. Hagar in nau hong paai takpi a, tua hun a kipat in Abram innsungah kilemlohna hong piang hi. Pasian in hun a sak ciangin a kamciam bangin Sarai tungtawnin Isaak pia hi. Pasian' zia a ngak zawhloh manun tuni tan dong Ishmael suante (Islam) leh Isaak suante (Judaism) gal lah sa-in ki-en denlai uh hi. Tua manin tuni in eite'n zong Pasian' zia ngak kisin ni. A ngak zote adingin amah kikhel ngeilo a, zekai tawh a kibat hangin hunlap hi. Pasian' zia ngak zawhloh manin a bei nawnlo ding gal leh sa piang thei-a, Pasian' zia ngak zawhna in Joseph bangin mite adingin thupha nak kisuak thei hi.

𝐊𝐢-𝐚𝐩𝐧𝐚: 𝐓𝐨𝐩𝐚 𝐚𝐰, 𝐥𝐮𝐧𝐠𝐝𝐮𝐚𝐢𝐧𝐚 𝐥𝐞𝐡 𝐭𝐡𝐮𝐚𝐤𝐳𝐚𝐰𝐡𝐧𝐚 𝐭𝐚𝐰𝐡 𝐧𝐠𝐚𝐤 𝐝𝐢𝐧𝐠𝐭𝐞 𝐤𝐚 𝐧𝐠𝐚𝐤 𝐳𝐚𝐰𝐡𝐧𝐚 𝐝𝐢𝐧𝐠𝐢𝐧 𝐡𝐨𝐧𝐠 𝐡𝐮𝐡 𝐢𝐧. 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧 𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!