THUMAAN DINGA HANGSANNA
Nisim Manna
Bulphuh: "...ngeina ahihlo hangin kumpipa kiangah ka vapai ding hi; ka sih leh zong a si ka hi mai ding hi," a ci hi. Esther 4:16b
Pasian in thumaan i gen ding hong deih a, ahi zongin khat veivei thumaan i gen ngamna dingin hangsanna a kisap hun om hi. Hih thu Persia kumpinu Esther in zong thei hi. Amah Judah mi ahihna kuamah kiangah kigen lo-a, tua laitakin Haman in Persia gamsunga Judah mite thah ding sawm citciat hi. Tua manin Esther in amah leh a mipite a suahtak theihna dingin a thusim pen a genkhiat kisam ahih dan thei hi. Tua a genkhiat theihna dingin Kumpipa kiangah saplohpi in a va paite thahpah theihna zong thu om sawnsawn lai hi. Esther in thumaan a gentheihna dingin haksatna, lauhuaina tampi na nawk a, ahi zongin thumaan gen ding Pasian deihna ahih manin thumaan gennuam Esther pen Pasian in mavanna guan hi!
Tua mah bangin eite zong thumaan gum in, thumaan i genna hangin haksatna, bawlsiatna, langpanna, mindaina tampi zong thuak kha ding hihang. Hih bangte i thuak leh Topa deihna lampi a tawnkha i hi, cih phawk ni. Tuni in thudik-thumaan gum-in i gen ding haksa tase leh i gen teiteina thaman in Esther bangin eimah leh i mipihte in suahtakna i ngahna hong hiding hi. Thumaan gente lamah Topa pang hi, cih thei ni!
𝐊𝐢-𝐚𝐩𝐧𝐚: 𝐓𝐨𝐩𝐚 𝐚𝐰, 𝐭𝐡𝐮𝐝𝐢𝐤-𝐭𝐡𝐮𝐦𝐚𝐚𝐧 𝐠𝐮𝐩𝐧𝐚 𝐚𝐡 𝐛𝐚𝐧𝐠𝐭𝐞𝐧𝐠 𝐡𝐚𝐤𝐬𝐚𝐭𝐧𝐚 𝐚 𝐨𝐦 𝐳𝐨𝐧𝐠𝐢𝐧 𝐭𝐡𝐮𝐦𝐚𝐚𝐧𝐧𝐚 𝐤𝐚 𝐝𝐢𝐧𝐩𝐢𝐡 𝐭𝐡𝐞𝐢𝐡𝐧𝐚 𝐝𝐢𝐧𝐠𝐢𝐧 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧 𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!
No comments