VASHTI HANGSANNA

VASHTI HANGSANNA
Nisim Manna

Bulphuh: Ahih hangin kumpinu Vasti in innsung mangte' thupuak kumpipa' sepna a nial hi. Hih a nialna thu-ah kumpipa heh mahmah a, ahehna hangin a sin a so hi. Esther 1:12

Persia leh Media kumpipa Ahasu-reas in Susa khuapi sunga om milian-mi neu mi khempeuh ading pawi ni sagih sung bawl a, ani sagih ni zu nekna hangin kumpipa a lung a nop ciangin innsung mang sagihte' thupuak bangin kumpipa in kumpinu Vashti mipi mai-ah a meel hoihna a lahna dingin sawl a, ahi zongin kumpinu Vashti in kumpipa' sapna hangsan takin nial hi! 

Mi pawlkhat in kumpinu a utlohna hang pen mipi mai-ah guaktangin kumpi lukhu bek khu a kilak dinga a kisawl man hi, ci uh hi. Pawlkhat leuleu in pasal hon zukham mahmahte mai-ah numei khat va pai ding lauhuai ahih manin a nial ahi hi, a ci zong om hi. A bangbang hang ahi zongin Vashti in a numei hihna, mite zahtak a ngahna pen kumpi zukham thupiak sangin thupi sak zaw hi. Tua pen a hangsanna ahi hi. 

Pasian in tungsiahte' thuman ding hong deih hi. Ahi zongin tungsiahte in Pasian deihna tawh kituak lo-in sep ding hong sawl thei uh a, tua bang hun ciangin Vashti bangin i nial ngam ding zong thupi hi. Tua bang nialna hangin nasepna zong tanloh thei, minsiatna zong kituak thei lai hi. Tua bang hita seleh i thukhenna pen Pasian deihlam ahih nak leh amah in lampi dang haulua hi. A thupi pen ah Vashti bangin i hihna i kepbit ding thupi-a, tua i huutna dingin hangsanna zong kisam hi. Vashti bangin hangsanna i neih theihna dingin Topa tungah ki-ap ni! 

𝐊𝐢-𝐚𝐩𝐧𝐚:𝐓𝐨𝐩𝐚 𝐚𝐰, 𝐧𝐚𝐧𝐠𝐦𝐚 𝐦𝐢 𝐤𝐚 𝐡𝐢𝐡𝐧𝐚 𝐤𝐚 𝐤𝐞𝐩𝐛𝐢𝐭 𝐳𝐚𝐰𝐡𝐧𝐚 𝐝𝐢𝐧𝐠𝐢𝐧 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧 𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!