MI LUNGSIM ZAWTHEINA DING

MI LUNGSIM ZAWTHEINA DING
Nisim Manna

Bulphuh: Samaria numei khat tuitawi dingin ahing pei a, Jesu'n akungah "Dawn ding hing pe vawi," achi hi. John 4:7

Nidanglai in Samaria mite'n gamdang mite tawh zi leh pasal a aki neituah ziah un Juda mite'n a asianglou in a ngaisut ua, naahpi tah in a hua uhi. Tuaziahin khualzin lampai chiang in zong Samaria khopi sung tuankha utlou in lampi dang jui in pel vevo uhi. 

Tambang dinmun ahi lai nangawn in Jesu'n a mipite totnuamlouh Samaria gam sung a Saikhar khua ah vapai in Samaria numei khat tawh kituahkha in ahoupi a, tui dawn ding angen hi. Tambang a Juda te gamtat ngeilou dan a Jesu ang gamtat tah in Samaria numei nu zong lamdang satna toh kidim hi. 

Jesu'n koima khentuam neilou a, mizousia akibang a mu ahi dan asuhlat man in Samaria numeinu lungsim a zouta mama hi. Thamlou in, tambang a Jesu kingiamkhiatna zaal in Samaria numei nu tel in leh ama tungtawn in a khomipite tanpha in hutkhiahna nga uhi.

Tuni'n Jesu'n etton ding lim hoitah hing laah hi. Tuapen, i Mangpa siang ah mite pui vai ichi leh kingiamkhiatna leh itna tawh mite lungsim izaw masat akhuul hi. Tuni tan in i Mangpa'n kingiamkhiah tah leh itna toh pan ilaahtheina ding in hunpha hing pe nalai hi. Kingiamkhiatna leh itna in zawla neilou ahi. Tuaziahin tuni'n Mangpa a din zang khia in.

Ki-latkhiatna: Mangpa aw, ka hinkhua ah kingiamkhiatna leh itna keima apat ka lahkhiat zawhna dingin Jesu min in na siang ah kang ki lan hi. Amen!