SEPGUAL HA

SEPGUAL HA
Pastor Dongza Thawng
Devotional  No. 55( Vol 3)
Fellowship of Thirsty Souls and Hungry Hearts

Thirsty souls simtute Sepgual Chibai!

Pasian hepina jingsang teng a thah gige jieh in Amin i phat hi. A hepina jingsang teng a thah bang jel in nang zong lungsim thah leh tha thah toh jingkal hing kipansahta hen!

Tuni khu nang ading in Pasian in ahing ve ni, ni nop tah hi ta hen!

Tulai chimthoinan Kimbuang Interview leh Dr Seilen Haokip leh Dr David Zamjathang te a ka en a nop mama e. Kimbuang  kipapi huai mama hi! Kim, Pasian in na maban hingpui jel ta hen aw!

Dr Seilen pen Nampi makai ahina toh nam toh kisai lam ki dong va ka chi leh Grape farming lam ngen ahi a, kipapi huai veve. Dr David pen ka ngaisaang  mama  hi. I gam a communal feeling hibang lawm lawm a hat lai a even hagau mi te lai kisan communal feeling toh adim lai a, ama pen communal spirit um vetlou, nei vetlou-siangthou kilkel lamkai khat ahi. Tuami spirit toh a People’s Health Foundation hing pan hi. Ka ngaisaang mama hi. A hospital huang ah va pai le chin ham tuamtuam kija ding a, nop tah in khosa khawm uhi.  Pasian in PHF mapui jel ta hen!

Text: “O Lord, revive thy work in the midst of the years, in the midst of the years make known” (Hab.3:1)

Kou zong Sepgual ha chiin janni tah in inn khat ah ka ki khawm uhi. Tulai khangthah ten sepgual bang ahi zong thei nonlou un, tampi ading in a khatveina jong ahi. Ahin tua NEW GENERATION te sepgual bang ahi chi ka gen sah pen ka tha nuam mama hi. 

Ei NEIGM (ECCI) nuai a kikhaikhawm leh a bajam a um kha te ading in kum chin a september ha ang tun leh sepgual ha ahi a. Neu lai hun te bang phawh in um a, lunghel huai hi. Valnou lai vei a Lamka a, Zomi Colony ka veng ua, alang alang sepgual bawl a lampi a thaumei tawi a ki phu luilui lai lungsim ah ki lang hi. World Cup hun bang ahi. Hattuam chin in group ki khen in inn chin ki tuan hi. Tu in zong Lamka lam a hibang a akibawl ding ki nep huai hi. Hoi kasa vang lah hi. Paitou pi jel hoi hi. 

A history leh a background va sui ding dan zong a um khawl sia. Ahiin kei mu dan in NEIGM a gingtu masa ten himi sepgual ha khu biah inn a ki khawm khawm lai pen biah inn khah phot a, ki the jah a, inn chin tot hun ding a ana jat uh hiding in ka gingta hi. 

Tualeh sepgual chi um jie khu mi jousie pang chiat ding, Pasian thu kikum ding china hiding hi. Biah inn ah pen upa te leh pastor te mai in Pulpit ah thugen in mipite hamlou in ki ngaikhie hi. Sepgual hun ah pen leader ding tuamtuam kiguat in Bible thu a kikupna kinei in, mi jousie in pan mun ki nei hi. I buainate ki kum khawm in, inn chin khen umlou in ki tuan a, koima penglou in panmun ki tang chiat hi. Tualeh thawlawm, thaphut leh bangbang e ki thaw khawm hi. Tua chiin ha tawp chiangin sepgual ki tuakhawm na khawmpi khat kibawl jel hi. Tua khawmpi ah i sepgual bawl dante report kipia in, ki mu khawmna thupi tah um hi. 

Tu sepgual hun a thoudoh joulou, innkuan leh khanglou butlou gingtu khu a lungkham huai mama ahi ta hi. Ajieh pen sepgual khu hattuam mimal chin, inkuan chin suhhal nading a ki bawl ahi.

Hibang sepgual ha a michin a buai vengvung lai a bang kibawl e zong phohphalou a, khawvel sil toh buaite zong himi message tungtawn a khanglou ding in Aman hingveta hen!

Himi i sepgual khu Tulai western leh Pasian thu lam a ana sangjawte a toh ka suhtuah sawm chiangin sapgam a home cell, small church  small group achite utoh ki bang ka sa hi. 

South Korea, Seol a Full Gospel Church - leitung a hattuam lianpen ah homecell maimai mun 20,000 ah ki bawl hi( latest hilou) Tua homecell ah inkuan 10-15 lah bang ki gawm uhi,

Sapgam hattuam lian pipite, a hatna thuguh uh khu home cell ahi. Mintuamtuam in ki gen hi: homecell, cottage meeting, Small group, small church,  House church, etc etc te himai thei. Pasian ni chiang asiing-asaang in biah inn ah khawmpi bangin thupi tah in ki khawm jel ua, Nidang chiang aningning ah homecell active tah in nei uhi. Tuami homecellte in a Biahinn (hattuam) khu thuap in detsah hi. Or ki jomsah hi. 

Pasian ni chiang a Pastor in a puplit sermon mai khu Pasian thu a jungkhawna ding leh khanna ding chingjoulou hi. Tualeh hattuamte pen mi tamseng, leh lian seng in kalkhat a nikhat Biahinn ah nakai 2 vel va kithuah in relationship ki siam thei ngeilou ding hi. Ahiin homecell a Bible thu khu thuuh deu leh chian sem in ki sui hi. Tualeh heart to heart sharing ki bawl thei hi. Biah inn ah mi tamseng in, hun zong tawm hi. Khawmpi bang ahijieh in thuuh tah leh nel tah a ki thua hun umtheilou hi. 

Ahiin homecell ah khat leh khat nai tah leh nel tah in ki thua thei hi. Hi home cell tuamtuamte'n link hoi tah nei in Biah inn khu a huaikhawm tu ahia, Biah inn ah home cell tuamtuam leaderte leh Pastor toh ki mu khawm jel in tua homecell a gingtu mimal hahsatna homecell mai in a suhveng jouloute Biah inn ah tut uhi.  

Eiten sepgual khu kumkhat ah ha khat mai i bawl ua, Sapgamte ah vang kal chin a paitoutou ahi. Ei ten Biahinn kai i thupi sah ua, sap gam te atamjaw ten Pasian ni jing kal mai hoi tahin ki khawm ua, hinanleh thupi tah in bawl uhi. A dangte pen home cell ah intimate leh deep deu in ki khawm uhi. 

Eite sepgual ha chiang ki hal in ha dang teng ah ki gammang, kigamla, ki tummang siang bang hi. Ahiin kal teng in Biahinn sang in hibang in inchiin ah homecell, small group Bible study etc te bawl lei Sepgual ha chiang i lim ua i hal bang un kumbul apat kumtawp tan ki haltou ding hi. Sepgual bawl ki hi jing mai ding hi. China House churchte leh Muslim gam gingtute ading in ahileh Biahinn Building nei lou ahi man un kum bul apat kum tawp khu sepgual ahi tawn tung mai hi.

Khujieh in ama uhte hagau lam ah a ihmu thei sih uhi. A hallou theilou uh ahi. 

Ei te dan a Pasian ni chiang a angeina dan a dress thupi leh Gari nal tahtah ki showna dan a Biah a ki mu khawmna ding China gam leh Muslim gam a gingtuten  hun nei lou uhi. 

Gingtu tawmnou, mun ning khat ah hun um lou sasa in ki mu khawm ua, ki hanthawn in, thum khawm in Bible sim khawm in, Pasian phat khawm uhi. Sepgual bawlbawl ahi mai uhi. 

Sepgual or homecell hoina khu Pasian thu gen ut, Biahinn a pulpit tangjoulou, upate leh mi vantangten hih homecell ah hun adei bang uh nga thei uhi. Biah in pulpit pen pastor or Senior pastor pa a ding mai in ki koi a, aman kal khat sungin thum kawm in sermon ki prepare hi. Tua chin Pasian ni chiang in mipi te Hagau ann tui thei pen toh vah hi. 

Hattuam khu a hat tahtah leh Pasian thu jil tahtahna ding in himi homecell poimaw hi.  Himi homecell khu America te, leh South Korea te apat hing kipan hilou in. Laisiangthou a Nasepte laibu a hing kipan ahi. Gingtu masa ten inchin ah, thumkhawm, annsiang nekhawm, ki fellwoship khawm, Pasian thu sinkhawm chi i sim hi. 

Tunin sepgual kichi ngal a, thase deu a,  Biahinn  abawl veve, leh Pastor or upa te mai in pulpit a thu agen veve ua adang te a ngai khie mai ahi leh sepgual meaning um nonlou hi. 

Sepgual ichi leh sepkhawm ding, koima khenlou a pang (participate) chiat ding, koi ma inn khen lou a suh khah chiat ding.  Bible thu ki kum ding, thum khawm ding, ki pawl khawm ding chi ahi.

Abang abang hita leh tu ha sepgual ha ahi toh kisai in I changtel uh Habakuh thumna “Kumkimlai in zong hing halsah in, Kumkim laiin hing ki thei sah in” chi ahi. Aw, Pasian Hagau Siangthou kumkim lai, in hing ve in, hing su hal in, hing ki lah in, hing ki theisah leh ut huai na e maw!

Hibang a mawl tah a  Amin a iki pawl khawm na uah Aman amite hing kankhia in, hing ve leh ut huai e maw!

Inkuan lungngai leh hattuam thawmhau, leh mimal hagau a lungleng te lai ah I Mangpa Hagau hing teeng ta hen!

Mangpa’n simtute jousie tu sepgual ha in hagau lungleenna thah I lungtang uah hing khum sah chiatta hen!

Sepgual man nuam! 

Shalom!

Topa Thupha!