TUNGLAM EN ZAW NI

TUNGLAM EN ZAW NI
Nisim Manna

Bulphuh: Jesu'n tanghou pheng nga leh nga nite ala a, vanlam en in a gualzawl a, tualeh tanghoute aphalsuo a, amasang ua luipieh dingin nuazuite kungah apia a, tualeh nga nite zong amaute zousia lah ah ahawmsah suahta hi. Marka 6:41. 

Jesu'n sil hahsa mama khat tuahkha hi tuapen ahi leh pasal piching vive mi 5000 (numei leh naupang simlouh) a vaah kul hi. Tambang hunin Jesu khut ah tanghou pheng nga leh nga ni maimai um hi. Jesu pen Pasian zong ahi a, mihing zong ahi veve hi. Tuaziahin hahsa sa veve ding ahi. Hinanleh Aman eite etton thei ding sil hoi mama khat abolkhia hi tuapen ahi leh, tam leitung silte kheel lam a um Pa Pasian nasep theina ang mitsuanta hi. Tuachia hagaumit hahpum a tunglam ang et tah chiang in Pa Pasian in hagau mitvahna pia in, bangkim bawlthei Pasian in a siltuah hahsatna tung ah zawna pe ding ahi chi ang theichianta hi.

Tam leitung a hahsatna zousia Pasian in a dawnna nei hi. Tua dawnna pen Pasian lam mitsuante a ding ahi a, tuabang mite'n lamdang sa hial in Pasian apan panpina mu uhi. Tuni'n na hahsatna tung a gualzawna na tang nuam leh ginna mit tawh tunglam en in zing in. Silbangkim bawlthei Pa, a kikhel ngeilou, thupina tawh kidim Mangpa Pasian lam nga in. Ginna tawh na muthei ei? Ginna tawh Pasian muthei a enzingte in tam leitung hahsatnate tung ah Pasian panpi tang uhi. 

Ki-latkhiatna: Mangpa aw, leitung ka khoheina ah, kiim-le-paam a umte sang in nangma umna tunglam kang mitsuan tawntung theihna dingin Jesu Khrist min in kang ki-laan hi. Amen!