CHRISTMAS LOHCHING

Wednesday, December 22, 2021 0
CHRISTMAS LOHCHING

CHRISTMAS LOHCHING
WAY2GOD

WAY2GOD simtu tengteng Hundamtu Jesu Khrist min in chibai kang bu masa hi.

Leitung pen Pasian phalna toh Lucifer thuneina nuai a um chi tah ma buaina in dimden hi. Tujingkal in zong tungtawn in "Delhi Govt. Bans Xmas & New Year Gathering" chi thu bang thedal in um pai hi. Tambang thu tuamtuam leh sil dangdang tamtahte ziahin leitung pen nidang banglou tah in hinkhua hel (hahsa) ta mama mai hi. Tam pen sildang hilou in vaihawmtute tung ah Satan deidan in weight neita mama china ahi mai hi. eg. Mall, Bazzar, Ginglou mi kipunkhawmna etc ki ban lou (or bangma strict lou) in Christmas (or Christian gathering toh kisai deute) khu BAN (or buaipi a um) ahi sese khu bang ngaidan na nei ei? Bible in tung a vaihawmte thuthu in nung un achi ziah a athu uh zui va dung zel mai di hiva maw? Ngaituah tham chingta mama hi, i Christian hinkhua khualtuupna in zangzaw vai. Ginglou mi in a sakhua uh PIBAWL a ei sakhua ang doubawl lai un, eiten zong ei sakhua PIBAWL in sakhua dang apat ki koi siang sinsen vai.

Ngaidan khat ah Jesu ang piang in naungeeh kum 2 ding vel nuailam in a hinna uh ana taanlaw uhi. Tuama bangin, nidang banglou tah a tuhun a natna leh hinna itaan gentaahlou, dihlou tah a leitung mun zousia a kivaipuahdan ki ningtel huai mama te ziahin Anti-Christ ding leitung ah a piangta china khat ama leh? chi thei ding khop hial in eite tung ah sil hamsa ang tungta hi chi na feel thei ei. eg. existance of New World Order and the favoritism of it by whole world govt. system. 

Atung a sil umdan igen mabang un hun beikuan hita henlen hisih taleh zong, Kumpi hing piang, Jesu Khrist, i Hundampa leh Mangpa a ipomlou leh pen leitung ah i hinman umlou ahi chi geelpha kia vai. Tuaziahin unaute aw, Mangpa siang ah ki nuale kia mi khu hampha hina vaya e chi Hosea 14 apan enjual vai.

Hosea 14:1-2 sung ah Mangpa'n Hosea tungtawn in Israelte lungsiatna aw toh tambangin han hi:  Israelte aw na Mangpa kung uah ki nuale un, aziahpen na thulimlouna te ziah un na kipalpuahta uhi. Kisiahtahin na Mangpa kung hing zuan unlen, ka bolkhelna zousiate uh hing ngaidam in, koute'n zong na deilou bang ka bol non sih ding ua, na deidan toh kikal zousia ka kholsan ta ding uhi, tuaziahin Na khotuana toh hing na sang hamham in chi un, chi'n Hosea in Israelte a thuhilta hi. 

Tambang a Pasian aw azaahtah un Israelte kisiah in Mangpa kung ah kisiah a kisiamphatna kamteng ang sekhe ta uhi. Point thum in akhenthei hi (Hosea 14:3):

  1. Genthei-Beidot ni in nangma (YHWH) muang a kang bel sang un Assyria te kana muangkha zaw leng uhi. Hinanleh tu'n vang Assyria te'n ahing hundam thei sih ua Nangma (YHWH) ngei in nang hundam zawbou ding hi chi chiantah in ka theikheta uhi. Tuaziahin bangkim ah ka bel uleh ka muan pen uh nangmabou na hita ding hi.
  2. Gualzawlna lam tuamtuam a ka tante uh Nang (YHWH) apat ka mu uh ahilam ka thei sih ua, koute'n ka khut mama ua ka lamdoh uh, ka hatna-pilna toh ka sepdoh uh kasa ua, giin bei leh khosatna bei in, kichapou sahtah mai in Sakol tung tuangin ka diang lele uhi. Hinanleh tu'n vang koute haatna a piangdoh umlou in Nangma hatna leh khotuahna zaal chouh ahi chi ka theichiantaah ziah un Sakolte tungah ka tuang non sih ding ua, nangma pui dandan ka zuizaw tabou ding uhi.
  3. Lei-le-vaan siampa, Ahing Pasian, bia chi-le-nam ka kichi uhi hinanleh kouma deiteelna zang a kouma deidandan a ka namtat ut man un ka khutsiam khutsua milimte bia in ka kun leng uhi. Hinanleh tu'n vang KA BEL UH,  KA MUAN UH, KA KINEPNA UH, KA THUZUI UH, KA BIAT UH nangma (YHWH) na hi denta ding hi. Aziahpen Assyriate'n ang hundam sih ding ua, Sakol thahaat in gual ang zousah sih ding a, Siamtawm milimte'n ang hundam sih ding hi chi chiantahin ka theikheta ua, Nang (YHWH) chouhchouh ah hutdamna, khotuahna, panpina, lungsiatna, damna bukim a um hi chi katheita uhi. 

Tambang a Israelte kisiahna leh kisiamphatna zaalin iMangpa'n tambangin a gen hi: a nuatolna uh ka damsah ding a, a manbei in ka iit ding hi. Lungsim tah tawh kisia a, aki siamphat ziah un, Ka lungthahna amaute apat ka lakheta a, tuaziahin amaute a dingin zing daitui bangin a gualzawlna uh ka hita ding hi. Lebanon mual a singkungte bangin hui hoitah aha ding ua, ga hoitah asuang ding ua mite a dia gimnamtuitah ahi ding uhi. Hinanleh ka mi Israelte bang a kisialou a, kisiamphaloute pen a kheltat man un aki palpuah ngeingei ding uhi chi'n iMangpa'n thu apuangta hi.

Unaute aw, lungtang kisia a, kisiamphatna tahtah tawh iMangpa kung a kinuale di'n iMangpa'n tuni'n Israelte ahat bangin nang-le-kei ang han hi. I tenna leitung pen hahsa in lungziin huai nanleh Pasian toh kilem a umkhawmte ding in Hamuanna, Bitna, Mailam Muchetna leh Hinna khu ahi. Tuaziahin i lungsim bawngin ah iMangpa ahing ten ding phalpiah vai in, Ama pui dandan a kalsuan dingin i lungsim hong vai, tuachi'n Christmas Lohching i hitheipan ding uhi. Mangpa siang ah kisiana tahtah tawh kinuale a, Mangpa toh kilem a, hamuang tah a umthei ding in Mangpa'n hing vangpiahta hen. Amen!




   




Tags:

No comments

Subscribe to: Post Comments ( Atom )
Powered by Blogger.