Because I live,! Ye shall also live | Happy Resurrection Day

Because I live,! Ye shall also live | Happy Resurrection Day

Pastor Dr Dongzathawng

#12 ( Vol 4)

Fellowship of Thirsty Souls and Hungry Hearts

 

Imphal Game Village ECA church apat in thoukiani jingkal pha!

Good Friday apat ka hun uh himun a Pasian tate toh hun nop tah mang ung. Ahing thumpi te jieh in kipa thu hing gen ing. Tuesday ah Evan Lunmin toh Thanlon lam juan ding hi ung. Hing na thumpi jel un aw.

Tuni Topic: “Because I live,!Ye shall also live”John 14:19

India akipan khawvel pumpi a dia Pasian mijat Ravi Zecharias, A valnoulai tanchin enlei tunia hibang a minthang ding in kilomlou hi. Laisim lam hileh personaliity lam hileh gual pha in kingailou a, apa'n jong pata in kitheilou hi. Maban kinepna neilou in Atawp in kingaisia in a room ah poison ne in ki thasawm hi. Hinanleh sijoulou in hospital tung hi. Hospital a missionary khat in vave a,? Akhut ah Bible chang khat paper neukhat a kigial toh nusia hi. Tua mi Bible chang khu: “because I live, you will also live” (John 14:19) chi ahi.

Damlouna jalkhun apat in thoukia Jesu hing bel a hing dam khia in tunin Ravi Zecharias inei hi. Tunin Khawvel pumpi a city te a University lian penpente lai a khanglai asang a simte lai ah Ahing jing Jesu min theipih tu hiding in Pasian in pilna pia mai hilou in thaunilh hi.

Ken jong ka master jil apat a sermon leh alaibu te kana hinpi a tuni tan ka nungjui nalai hi. Ravi Zecharias western gam a teenjou kum sawtpi nung in aji toh Delhi a api haan en ding in nikhat hing kuan hi. Sawtseng ta hanmual record ah jong muhahsa ta hi. Atawp in mukhia ua a suang ava et leh Himi Bible chang John 14:19 “Because He live, you will also live” ma ana kigel hi. Ravi ading in Pasian in kumtampi ma apat Ana guatsa leh houpina confirmation ahidan a muthei chia Lamdang in lungmuan huai sa mama ding hi. Pasian in atate hinkhua ana prom sa ahi dan lamdang hi. Nang leh kei jong ihi.

MLA candidate nung jui a a inn leh lou juah, or paybook banda jen a pangte khu A juipa MLA ang kai chiang khuh ama inn leh lou mansuate khu bangma hinon lou hi. Ajiahpen a juipan “vangphat thu a kang kai leh Manipur sumbuh chabi khu ei ading ahi. Bangdia lungkham lai?” Chi thuchiam khum hi.

Tuabang pangte a juipa uh ang kai ni ni chuh JCV lei masat hi a contract nasep kipat a, building inn lam kipan ahimai uhi. Khenkhat Minister pa sang in chief guest in ki koumun jaw uhi. Minister thakhel in sum hawmtu himai uhi. Ama un aluah uh mai hilou in a hawmtu hinalai uhi. Sildang jiah hilou in tuma a inn kal kitawi jen a ajuipa khu tu in cabinet minister pa hita mai hi.

Tuni'n ei gingtu te khu i jui pa un “kang dam jenjen a, kang thawkia thei a, ka hinkia leh” chilou hi. “Kei ka hin bangin noute jong na hing ding uh” himai hi. Khawvel in ang mu non sih ding a noute'n vang nang mu kia ding uh chiin thu chiam toh vaihah hi. I u-pa uh I tanpa uh, i muanpa uh, i ki neisahpi, i juipa uh hung ki thasah hita mai hi. Atahtah vang Ama leh Ama kipekhia hijo hi. Eite ahing tatna ding in, tangtawn a Pasian plan redemption” suh tangtung na dingin.

Hilou hileh Van Angel siang simsemglou te Michael lamkaina in every second a A boss pa un a signal apia bangbang a bawl ding in kigingsa in um jing uh.

Hinanleh Pasian tapa in a bolthupi pen leh a A ma adia hamsa pen khu Rome sepaite leh mial silboltheina Setan leh demons te apat ki venbit ding hilou in a hibang thuahgim hun a Pasian hina Power neukhat a sua khah ding a hi. Hia aki sum jou na khu Philip Yancy in “Divine Restraint”  chi min vua hi. Boltheina pi boltheilou, jouna pi joulou a kikoi dinmun hamsat dan I Mangpa'n himun ah thei diah ding hi.

Nang leh kei hagau it jiah ban ah i example ding a abol ahi. Khawvel mu dan in vang a guallel leh aboltheilou, aboljoulou pa ahimai hi. Meitei mission field a Jesus film en lai a “Hero si reh” ki chi khu ahi phot ta hi. Setan jong a kigual jaw sah ding dan. Pasian kung ah “laltouna hing awt ta in “chin ana nawnaw ta ding hi. MLA result ki sim suah nai lou a a ching sa a ki ngai a Delhi lam juan mante toh ki bang ding hi. Ahi'n anq khawl phot leh thawkiani jing khua hing vah a, nisa hing suah hi.

Hero pa shi malah Van leh Lei leh thilsiam te tung a thuneina teng khusah a um in tatna nasep teng chaiin, Pasian siangthou leh dih kung a mihingte tonkhelna teng Eden apat leitung beitan a thakhel ding in khelna kithoina sillat ashisan toh bol jou in, A Pa Pasian ziat lam a Vaihom ding a guatna toh Thoukhiata hi.

Jannia guallel leh bangma boltheilou a ki thukhen khhumpa khu tu in Van leh Lei a Lal te lal kumpi te kumpi ding in thoukhiata hi.

Tunin Aman ana chiamsa ama ngel adia ana pangte khat jong mang hillou hi. Mihing te bang a achimaw lai ama adia gimte tu alal hun a theipha nonlou chite hilou in. Aman double, ten time mai hilou a ama toh goulua khawm vaihom khawm ding in Anung juite khatkhat in va suikhia hi. A gualjaw jiah a reward or sapham a spoil (gal ki dou chia gal jou ten a van tomte uh)! amute khu hom ut in a lomte, a unaute a umna chiat ah va zong hi.

Unaute tuni'n i tanpa ahin jiahin ihing ding uhi. Job in “my redeemer lives” chiin hangsan tah in gentheina ah pangjou hi (Job 19: 25). Graham Stain jinu'n apasal leh ata pasal te gel aki thahsah jou in “because He lives I can face tomorrow” chi in Ana sep uh sunjawm ding in thupuhna la in tu kum20 jou in jong sem jom jel a, Ahingjing A Tanpa in pui jel hi. A film en nailou ten et thei jing ahi. Tulai tah Theatre tuamtuam a ki sua hi. The living testimony of The living Saviour chi thei hi.

Church historian te'n bang ding a Christianity tuni tan bei nailou, hat semsem e chi study abolna ua a jiah point no. 1 khu a neitu pa/Amu khia tupa Chirst khu hingjing hi chi ahi.

Tuni nang leh kei munning khat a nungjuite bang a thawmhau, lau leh mangbang a ki phual te’n ithei ding khu I tanpa gualjou in thouta, i juipa gualjou pa hita, Eite agualjou lam hita. Mi lau ding hilou in min ahing lau ding te ihi lam ki thei vai, bangdang jiah hilou in Ama ahing jiah a eite jong hing ding ihi chi thuchiam inei hi. Ging in gingta sih lei jong thutah umsa ahi.

Tuni'n hahsatna neunou, tahsapna neunou, buaina themthem, puah gih nengneng inei ua, i khualjinna ah ling leh khau, suanghum, nisa, guahpi leh hui, melma thalkuang apat attack ituah malam hi. Ahin ithei ding khu tuate khu i ki exercise na ding a vanjat poimaw maimai ahi. Atop tan a nusialou ding in Aman hing chiam hi. Dam mualsuah ding, atawp a Gualjou ngeingei ding guatsa te ihi.

A last a gualjou ding, Atawp a anui ding lamte ihi. Ajiahpen i u pa (Christ Jesy), i tanpa, i captain pa khu a gual jou a thoukia tahi. Aman a jaw jiah in eite jong ajou ding ihi. A thupi khu ama toh ki nai a Ama a iki luai siam ding poimaw hi. Mangpa Hagau in I Tanpa thokiahna authority leh power theisiam a, jangthei ding in hing panpita hen!

Topa Thupha!