Mangpa khotuahna na tuah hun sung in
Mangpa khotuahna na tuah hun sung in
Mangpa Pasian khu bang to bang hi ding in na ngaituah ei? thungetna inei naah leh i dei hunhun a Pasian jat thei mai di'n na hisaap kha ngai ei?
Leitung hinkhua pen i ngaisut chiang in tup-le-ngiim, dei-le-ngai, a tung ding a i dei leh a tunglou ding a i dei tampi um hi. Tambang lunggulna eima dei hunhun leh eima dei bangbang in taangtung zeel thei leh idei uhi.
Eima dei hunhun leh eima dei bangbang a sil a taangtun theilou khu panpitu haat tah khat mapuina jaal a mailam nawt te ihi uh chi iki theitheina uh ahi. Tuaziahin, tambang lunggeel nei pumpum a kingainiam tah a ginna toh Pasian masuan a hinkho zat khu Pasian kipaahna ahi.
La phuahtu in "I tung ah I Mangpa a lungkim naah pou leh sildang zong ei a ahi" achi bang in i Mangpa lungkimna khu Ama deihna bang a ki niamkhiat tah a ginna toh a deibang silte, hahsa nan leh theitawh a bawl jeelte khu ahi.
Tuaziahin, eima deibang silte khu eima dei hunhun a umsah i sawm ziah a, thuumnate leh thungetnate toh Pasian abol diing a suaah bang a command pia hi lei kilawm hial a thungetna i boljeelte khu bawlkhelna chikhat ahi. Thungetna pen bawl ding ma ahi. Hinanleh, Pasian deina bang a hinkho zatna tellou kei a i deibang silte bawl ding a Pasian buan pen lunggeel theite ding in kingaituah tham ching mama hi.
Pasian deina bang a hinkho zatna tellou kei a Pasian gualzawlna tang kichi khu ei hoijiah hilou in Pasian deisahna leh, akhotuahna i tang uh china ahi zaw hi. Tamteziahin, Pasian deisahna tang iki chi kha maithei hi, hisaamlou hi, Mangpa a hinna dihtah nei a, a deibang a hinkho zatna panta ding a i Mangpa'n ei hatna ahi kha zaw mo sih ding hi.
Tambang a Pasian khotuahna i damsung in kitang dendenlou ding ahi chi phawh vai. Tua ahiziahin, eima deina bang a sil tung hilou in Pasian in ang deisahna dungjui a Ama dei hunhun a silte tung jeel ahi bou hi chi manghil sih vai. Tuaziahin i Mangpa deisahna i tanlai hun khu hunmanpha ahi, mansuah sih vai. Tambang hun hoi sung in i Mangpa toh kal kikim a kalsuankhomte ihi nai ma ki veel chian vai.
Thupil in tam bang in agen hi "Mihing lungsim ah tupna tampi a um a, ahivangin Mangpa deilam bou atangtung ding hi." Thupilte 19:21
I Mangpa deisahna i tan sung in Mangpa lungkimna mimal leh innkuante hiva ui.
Simtu teng Mangpa'n hing gualzawl chiatta hen!
No comments