Tahsapna toh gualzawl kana hi hi

Tahsapna toh gualzawl kana hi hi

Pastor Dr Dongzathawng

Devotional # 5( vol 4)

Fellowship of Thirsty Souls and Hungry Hearts 

Thirsty member te Jingpha!

Pasian hoina in tuni na hinkhua hing tuam khum ta hen!

Tuni Topic: Tahsapna toh gualzawl kana hi hi 

Intro:

Ka tapa Levi school thah jou, ka tanu Vahdeinou jong thah jou kia in a school gei a park khat (lady hydra park) ah aneupen Rimoi toh ka um uhi. Park lianpi koi ma umlou phial in tourist neukhat chi lou mu ding umlou in, thawveng hi. Ju leh va ham in, Shillong ni sa nou ngiingeei in, papee leh singkung te hing dipdeep hi.  Ka tanu ki mawl en kawm in ka hing gial hi. Ka tanu lah nopsa sengseng. Kei lah nopsa khua phohlou.

Election thu igen jouta a, tunin thumkawm in result ana ngah mai vai. 

Tu in topic ah pan ta vai:

AW Tozer in alaibu The Pursuit of God ah “the blessedness of possessing nothing”  ( 23)chi giel hi. Bangma neilou nop dan leh hamphat huaidan chi gial hi. Hitan tunna ding in kumbang jat Pasian toh aki jawhta diai????

Tozer in agen jelna ah: 

“We must strip down to essentials and they will be found to be blessedly few(20) chi thei hi. Mihing te ipoimaw lou tampi in hing gih sah in hing vuhdim hi. 

Aw miin Christ a hausatna amu chian sem sem chiang un hih leitung nei leh gou te khu ngai nep uhi. 

Eite mu dan in Pasian gualzawlna khu: 

Sum tampi,  gou tampi, gam lianpi, inn hoi, gari hoi, kham lian, lom leh gual, lawchiinna, mite ngaisaangna etc etc te ahi. Himi te del in i thah i jung i hun teng i pia hi. Ahiin hite apoimaw lou ichina hilou in Pasian in atate, ami jat ut tahtahte khu tahsapna huaise toh gualzawl jel hi.

Pasian in Job khu ni khat thu in anei, agou,  athupina , aki ngapna teng sutkhiah sah hi.

Warren Wiesbe in alaibu Too Soon to Quit a agen dan in a hunpaisa thupina teng bei. Mabaan aki nepna teng bei. Tu dinmun mai um hi. Tua jong natna huaisie piah hinalai chi hi (too soon to quit). Himi genthei thuah sung in Pasian in athupina, a hausatna thuguh Job musah hi.  Atawp in Job in gen ding thei nonlou in a khut akam ah koi vawt hi.

Pasian in a thupi dan, amuan huai dan, muthei nei leh gou toh te thei lou a thupina ang musah ut chiang leitung hausatna te hing lahkhiah sah phot hi. Paul in “bangma nei lou nanleh mitampi hausa sah” hi. 

Rome suangkul sung ah bangma neilou hi nanleh Van Hausahna toh kidim in, tua akipahna dimlet ( overflowing joy) khu Philipi misiangthou te  kung ah luang let sah hi.

John Bunyan in ta 5 (tuate lah a 1 mittaw hinalai) in kum 10 val suangkul ah a ginna jieh in um san hi. Aji atate Neh ding bangma nusia lou hi. Himi kum 10 val sung in Pasian in tuni tan kum 400 jou leh leitung um laisie a Christian ten asim ding laibu gel sah ut hi jaw hi. Tua laibu tungtawn in gingtute gualzawlna pia ut hi jaw hi. Himi kum 12 sung in Pilgrims progress laibu hing giel khia hi.

Pu Thangngur in ni khat thugen hing tung in aji kung a “ann hing thuh ve” achi chiang aji in "ann tang umlou an huan lou, nang jin jin” chi'n dawng hi. Jawlneipa a thumna mun Suangkua (cafe) va pai in nau ngeh ka in va kap hi. Tuamun a pat in “ tahsap vang a luanhi anai lai in, na gam leh na dih tatna in hing nai jel in” chi hing piang khia hi. Himi la in tuni tan in gingtu tahsap na tawp khawh leh hahsatna mial nuai a paisuah simsenglou te hamuan na pia hi. 

Pu Bungliankung khu Pasian in tahsapna toh gualzawl lou leh Saidan taang ah hol va huthut lou ding a, hol va huthut lou leh laa hijat Pasian in pelou ding hi. Pasian in ama la hijat pia lou leh tunin eite la hijat ki neilou ding hi.

Tunin Pasian gualjawlna manpha mama gualzawlna dan a ina ngailou ukhu tahsapna ahi.

Na bank account a sum jat senglou a um a, gou tampi na nei a, na utut na leijou a, na dudu na nehthei hun chiang pilvang in Pasian a ki pum ngap, deng del kisahna, ginna a hin dan, ki ngainiamna lungsim leh chau kisahna leh neu kisahna ki  nei tawm mama hi. Muan ki hau hi. Pasian a ki muanna tawm hi.

Hih hun chiang na ham dan, na sum jatdan, mi dangte na et dan , mipi mai a testimony, gualzawlna thu  na puan dan , na thum dan tan pha, na sermon tanpha pilvang mama in ajiehpen hahsatna leh tahsapna hun saang in nopsahna leh ki ningchinna in mite lungsim leh hagau susie hat mama hi.

Pasian in a it mama, a van jat ut mama te tahsapna toh gualzawl jel hi. Ajiehpen Ama toh ki khen sah utlou hi. Mahni kimuang a a lampial khah ding uh, aginna uh Ama apat aki hei mang khah ding uh phallou hi. Jausah hi.

Tunia Tele Evangelist numei a ki puh jung jung, scandal a minsia jungjung te apuh sietna ukhu tahsapna  gualzawlna in anutsia chiang un Pasian mai sui ngap nonlou uhi. Pasian kengbul ah khutdaw (beggar) bang in umthei nonlou uhi. Ajiehpen sum hau ta lua ta, lar seng ta, ki ningching seng ta uhi.

Inn det hibang nei ta, tate hubang a lawching ta, gou hijat ten khum ta, Lom leh gual hoi hijat nei ta, progm hijat adia invitation mu ta, foreign connection hijat siam doh ta, donar hijat taise lou ding nei ta.  Ama ading a bang tan a taise lou ding mi siam doh ta!!!! Hibang din mun ah  koi in e mittui luang kawm a, khutdaw bang a Pasian kung a thum thum non ding??? Aw hibang a ki muanna (security) mama ahi  hagau mi tampi puhsietna! Pasian hiteng jan khat thu a la mang thei pa ahi ithei ngai hi. 

Achang ah Pasian in hagau lam ang gualzawl ut jieh in tahsa lam ah tahsapna huaise tah hing tung sah masa hi. Tahsa lam kining  ching vum jen kawm kawm  a Hagau lam tasam kisah theina lungsim mawh piang lou hi. Paikhawm khawm ahi.

Hibang a tahsa lam kiching seng a hagau lam ajong pang vevaw te patat huai hi. Ahiin broken a jawi ngiingei, kap ngutngut chite vang um non lou hi. “Topa hoi hi. Topa thupha “ chi tan khu athumna uh ahi ta hi.

Jacob bang a "na hing gual jou lou leh” chi te, Mose bang a "na hing umpi lou ding leh” chia beidong a thumna vang um nonlou hi.

Tunin Gualzawlna hiva chia idel del te Pasian in hing pia lou in, i thumna dawnglou chiin iki ngaisie a i baa mai thei hi. Pasian in gualzawlna tah tah i nget leh idel te sang a thupi jaw AMA ( Himself) hing ki piah sawm hijaw hi.

Tua ama hing kipia khu imu chet tah tah chiang adang teng ideina khu Ama vah ah jun mang bei ding hi. Tua hun chiang the “blessedness of posessing nothing” leh “blessedly few “ kichi te bang ahi chi ing thei pan pan ding hi. Tuachiang hagau lam a thuuh tah leh saupi ana pai ten “ jawng  napi hausa” achi te uh ing thei pan pan ding hi.

Ahiin ibuaina ukhu eite tahsapna tawp khawh itungnai sih uhi. Hibang i nei teng sutkhiah sah din mun ading in Pasian in hing muang nailou himai thei hi. Kei bang a Hakhat i deficit a, tawm khat ang kining koi leh jong iginna ki ling leh patau te ihi leh vang i jawt ding lampi sauna lai ding hi.

Tahsapna khu gualzawlna ahi dan: 

1. Tahsapna in hing ki ngainiem sah hi. Tasam kawm kawm ham thau tawm  hi.
2. Tahsapna in Pasian kung ah hing kai nai nai hi. Kining chin lai sang in tahsap hun ah min Pasian han tam jaw in bel jaw uhi. Hun nop lai sang in hun hamsa ah Israel te maitam  mei kuang tam jaw hi
3. Tahsapna  in thumna tui sah, serious  sah hi. Kining ching te thumna leh tasam te thumna kibang lou hi. tahsapnhun a mite thumna tui suah sah in luang sah jaw in pai jaw hi.
4. Tahsam huaise lou in koima jingkal matah, jan kim athou in thum lou ding hi. Tasam lou in koima ann ngawl in thum lou ding hi. Thum leh jong tui lou ding hi.
5. tahsapna thuuh tah lou in koi ma thuuh tah leh sau pi thum ngap lou hi. 

Elisha in vang apu Elizah kung ah “double blessing na hing piahlou leh hing nusia lou ding, hing juijui ding ka hi” 

Hitan ah hun sah ta vai. Tunia apat in tahsapna hinkhua na tuah khah leh Pasian in hing gual ding chi hilou in ahing gualjawl ahi ta chi thei tavai !

Mangpan natahsapna khu A gualjawlna ahi lam thei ding in imit uh hing vahsah ta hen!!

Topa Thupha!