KEN VANG MANGPA MIN BOU SUANG VANG
KEN VANG MANGPA MIN BOU SUANG VANG
WAY2GOD
WAY2GOD simtu tengteng na bawn un chibai, Mangpa'n tam message tungtawn in
thathah hing peta hen!
Leitung ah miim bangin i piangkhia a, i khanglian a, theilou kaal in gaal
tawpna (shina) ngaah in i um uhi. I Laisiangthou in agen bangin
hinkhua pen paahpe paah bang leltah ahi giap ma hi. Hinanleh tambang
lunggeeltheina inei nalai uh pen Pasian khotuahna hunhoitah nei nalai ihi uh
china ahi. Tam hunhoi sungin bang chi'n pan na laah ei?
I neulai in midangte sang in inu-le-ipa te i muang pen ua, koima i giing sih
uhi. Hinanleh i hing let deudeu dungzui un inu-ipa te khu a haatpen ahi sih
uhi chi ithei chian panpanta uhi. Tamma bangin itenna gam govt. (UN or India)
zong muanthei ahilou dan ithei panpanta uhi. Aziahpen, neehguuhna, dihloutah a
vaihawmna, leh sil dangdang ah belthei tahtah lou ahi dan uh bang i phawh
panpan uhi.
Tuama bangin iNam-iGam, iMi-iSa lah ah zong bitna umtuamlou ahi dan i phawh
doh panpan ua, lawm leh gual hoitah, mi hausa, silbolthei tah mai a i koite'n
zong bitna hing petheilou ahi dan uh alang deudeu hi. Thamlou in i muan mama,
i ki guuh neppi mama te bang itung a hasiatna hing tuntu in bang pang nuam
sese nalai uhi.
Kinepna pen i bualna pawlpi leh hattuam te siang ah um sam va ichi
a, hinenleh chiantah a ing theikhiat tah chiang in i bualna pawlpi & hattuam sung ah zong bitna umtuanlou ahi dan itheikhe sonson zelta uhi. Aleh hei ah bitna
a um ta diai? Bitna kichi mawngmawng leitung ah umnonlou ata amah? Christian
te lah ah zong umnonlou ata ama le? Bangziah a tambang beidong tah dotna hing
piangdoh atai ichi chiangin Christiante pen Pasian ta ahi ua, hinanleh Pasian
ta bang a kizatna hinkhua aneilou ziah uh ahi. I theisiamna di'n gingtu hemhem
(fake christian) i tamtaahziah ua ahi. Tambang gingtu hemhem te'n pawlpi leh
hattuam sung a lamkai ziah uh ahi.
Tulaitah bang election ding kuan ahi toh kiton in thuthang bang nasa mama mai
hi, alelamkhat ah lah nuijat huai dehdeh jel hi. Chiamnui thutah khat gen lei,
mikhat in 500 hing pe masasa ka vote ahi mai achi dan in.... Koi vote leng hoi
ahia chite umtalou... hinanleh sum muna ding ahi phot leh banglouteng zong dih
sa mai (kolten sab chalega) achi dan in eima hoina ding, manphatna ding ahi
phot leh silteng ki OK veh thei din mun a gingtu hinkhua izatziah ua tambang
BITLOUNA khat hing tung ahita hi.
Vote khe ding te pen thutuam hitaleh, i vote ding te uh zong Pasian deidan toh
kituah a gamsung lamkai dia mansa ahi na di uai? Pasian zau mi, Pasian hagau
ki puisah mi ahi na di uai? Khovel sil a lamkai ding zong Pasian zau mi poimaw
mama ihi uleh hattuam lamkai dingte khu bangtobang mi a hi ta di uai? Gamsung
namsung leh michin in Pasian zau a lamkai kipoimaw mama mai ahi aziahpen
Pasian theilou pumpum a lamkai na in gamsung a bitna sang in patauna tun zawta
hi.
Bangma dang ah bitna a umtheih nonlou ziahin atawpna ah innsung hi koipou
beidon ngahna ahi -
agennop pen ahileh, leitung ah kinepna topkhawh khu INNSUNG ahi.
Hinanleh innsung/family nasan insung mite a ding a kineptheina a hing hi lou
chiangin innsung mite beidong kisa in a liammang uhi. Thamlou in khenkhat te
bang kineptheina ding um non mongmonglou chi in a hinna uh akila uhi
(suicide).
Khovel sil ah kinepna tampi a um hi...tekhin thu in sum-le-pai, power,
lawmlehgual, govt, underground, church, community, etc. tualeh tamteng baan ah
family a umnalai hi. Hinanleh mi tamtah ten tambang kinepna te a huut
(kinepnathon) ahi lam ang thei tah chiang un beidong kisa in hinman um aki sa
non sih uhi. Hinanleh tunin bangchihlai pou a eite a dia ginum gige Mangpa
Pasian a um hi chi phawh vai.
Kumpi David in Psalm 20:7 na ah agen bangin
midangte'n sakol lengte, sakol hatlaite muang nan uleh envang i Mangpa
min i suang ding uhi
achi mabang in tuni'n eite hing siampa iMangpa a um nalai hi chi chiantah in
itheita uhi. Sildang bangma bitna leh muanna hing pethei a um sih a iMangpa bou ahi chi tuni'n phawhthah vai. iMangpa muang ngam mite a ding in damna a um a, amuang mite abit
uhi. Hinaleh Mangpa a muanglou a sildang a muang mite pen
Hasiatna Kokhu Tung a Ding Banglel Ahi Uhi. Mangpa chouh ah muang ding
in na man tai unau?
Bangteng ituah in zong Mangpa a muang denden thei ding in Mangpa hamuanna
itung chiat uah nibang in hing taangta hen.
Kipah ing
No comments