RAPTURE A PANGKHALOU TE SILTUOH DING GIMNEI- PART 3


RAPTURE A PANGKHALOU TE SILTUOH DING GIMNEI- PART 3 
Rev. Stephen Khupsianlal

Rapture hun a leitung a nuasie a umten kisuimawna thupitah leh accidents huoisetah tah umding te zieh a shi leh mang adim a um ding ahidan ithei ta ua, piengtha zousie leitunga umnawn lou ding ahitah zieh ua hundamna thu hing genpieh ding koima umnawnlou ding chi zong  ithei uh ahi. 

Piengthate lahtou ahi toh kizui in Mangpa'n a Hagau jong latou ta ding ahizieh in Hattuom Hun, Hepina Hun or Hagau Khang khu abei ta dinga, setan/ dawi nasepna te huoise mama ta ding hi.

Tambang a mihingte abuoi veng vung lai un, van ah iMangpa Jesu'n Chiemtena Sagi khat khat in ahing phel ta a, aki phel masa pen sang in aban a kiphel dingte khu gimnei mama zaw nalai ding hi.

Chiemtena Sagi ahing kiphel tah in naikal kimkhat (30 minutes ) sung van asip dide hi (Kihilna 8:1). 

Tambanga van asip dide nazieh khu Belamnou Chiemtena (Gawtna masa) zousie phelzouta ahizieh leh gawtna huoisezaw sem leitunga sawlkia ding ahizieh a chizathuoi sa mama in van mite'n leitung mite sil thuoh tou ding ngaingam lou un sip dide mai  uhi. 

Naikal kimkhat sung van asip dide lai in Pasian mai a ding vansawltah sagi te kungah Pengkul Sagi pieh in um ta hi. Tam Pengkul Sagite khu Gawtna Sagi ahi kia hi. 

Chiemtena Sagi (Gawtna masa) leh Pengkul Sagi (Gawtna Nina) te khu Rapture zou chieng a tungpai ding Tribulation kum 7 hun kim masalam (3&half years) sung in tangtung ding uhi.

PENGKUL SAGI TOH LEITUNG GAWTNA 

Kihilna 8: 7 akhun Pengkul khatna ahing kimut ta a, tuachin Giel leh Mei sisan toh kihal in azui ta a, tuate khu leitungah akipai khesuh a, singkungte sethum suo sekhat aka tumta a, hampa hing zousie akatum ta hi chin a kigen hi. 

Mangpa'n Egypt agawtlai in gawtna sagi na azong tambang ma in ana gawt ahi hi ( Exodus 9: 18-26). Tambang ma in Zawlnei Joel in zong hun nukhieh lam ah 'Sisan leh meikuong' ke ding ahidan nagen lawh hi ( Joel 2:30 ).

Tambang gawtna tungtawn in singkungte leh hampate sethum suo sekhat katumta ding ahizieh in huon gasuo, haichi tampi kisuseta ding ahizieh in mihingte nasatah in neh leh taah lam ah buoina lianpi tuoh ding uhi.

Kihilna 8:8-9 akhun Pengkul Nina ahingki mut tah in Muol lienpi mei a kaa hileh kilawm, bang ahiei tuipi sunga pailut in a um a, tuipi sethum suo sekhat sisan asuoh ta hi. Tualeh tuipi a um ganhingte sethum suo sekhat a shita a, tualeh tembawte sethum suo sekhat suhsiet ahi ta hi.

Tui sisan kisuo khun Mangpa'n Egypt mite agawtna masa pen khu ana hi ahi ( Exodus 7:19-21 ). 

Johan in agendan akhun muol lienpi mei in akat mawng khu van apat hingki paisuh hizawlou in tua mei in akat tobang sil lienpi khu muol toh gentena hizaw hi. Tuachi'n tuipi khu sethum suo sekhat pen sisan (blood) ahing kisuo ta a, tuipi sunga hinna nei tampi asi ta ua, dawnding tuisieng hing vang mama ding leh tuidu dangta a mihing tampi shi ding ahidan ithei uhi.

Tuaban ah tuipi sisan kisuo ta ding ahizieh in ngasa leh adang dang hing shi dingte anamsiet sengseng ding zieh in huisiengthou tahsapna lienpi ahing um dinga, natna hii chizat huoitah tah hing laang nalai ding ahi.

Kihilna 8:10-11 akhun Pengkul Thumna mut ahing hitah in Van a kipat in Aasi lienpi khat meisel banga kuong a hing kesuh a, luidungte sethum suo sekhat leh tuinahte tungah atu ahi. Tua Aasi min khu Gamsai kichi hi. Tualeh tuite sethum suo sekhat a khasahta (Bitter) a, tua tui a kipat mi tampi ashi ta uh hi, tuipen khatsah ahitah zieh ahi.

Tam gawtna hing tung ding tungtawn akhun tuisiengte khu khatsah a umta ding ahizieh in dangtah seng man in adawn tei uh angai ding a, adawn chieng un atahsa ua dinga hoilou ding ahizieh in mishi tam mama ding ahi.

Adawn zousie shiding ahiban ah, tuisunga hinna neizousie zong ashi ta ding ua, tam tui pen loubawlna ding huon bawlna ding a zong zahthei hinawnta lou ding ahizieh in mishi pen tam mama ding china ahi.

Israel miten Egypt ahing pawtsan lai un Marah munah Tuikha adawn kha ua, nanleh tua tui kha pen Mosi tungtawn in dawnthei hing suoh hi ( Exodus 15: 23-27). Hinanlehzong Tribulation hun chieng in tam tui kha ding pen koiman dawnthei ding in bawlthei nawnlou ding uhi.

Kihilna 8:12-13 akhun Pengkul Lina mut ahing hitah in Ni (Sun) sethum suo sekhat, Hapi sethum suo sekhat, Aasi sethum suo sekhat suhsiet in a umta ua, tuachin tuate sethum suo sekhat suhsiet a mielsah ahita ua, sun (daylight) sethum suo sekhat ataang tasih a, tuamabang in zan zong a um ahi.

Tami gawtma khun leitung pumpi huop in hasatna atun ta ding ahi. Nisa vah sethumsuo sekhat suhsiet hiding ahitah zieh in mihing leh silsiemte damtheina, hiselna etc te nasatah in ahing subuoi ding a, Nisa asat di bangtah a sanawnlou ding zieh in Climate Change thupitah ahing um ta ding a, shina in vai ahawm tou ta ding hi. Tuabang ma in Hapi leh Aasite zong sethum suo sekhat suhsiet hiding ahizieh un leitung pen nasatah in abuoizah mai ding hi.

Khovel ah Simzin tung ding china ahi a, tambang mielna khu Mangpa'n Egypt mite agawtlai in gawtna chi kuo na ah ana tungsah ahi ( Exodus 10:21-23). Amos 5:18 khun " Mangpa Ni khu miel ahi a, vah ahisih," achi ahi. Climate Change huoise mama ding ahizieh in loubawldan, huon bawl dan neh leh tah produce dan nasatah in hing buoi ding a, leitung pumpi ah kiel (famine) huoisetah hing tung ding china ahi.

Tambang a mihingte abuoizah laitah un van lai zawl ah vansawltah khat kikou aw khun "Tunggih Tunggih Tunggih chi in thumvei zen akikou khum ding ua, tuakhu Pengkul Thum kimut be ding umnalai ahizieh ahi hi. Chizat ahuoi ding dan dan maw!!!!

Kihilna 9: 1-12 akhun Pengkul Ngana ahing kimut tah in Dawiten mihingte agawt thei na ding ua Ha 5 sung hun pieh a um ahidan uh kigen hi. Amaute khun mihingte agawt ding dan ukhu Mom Ai mipe (Scorpion sting ) agu natdan toh tekah ahi.

Thuohla huoi tah ahiding zieh in shi ding aut mama ding ua, shithei tuanlou in a um ding uhi.

Egypt mite Mangpa'n agawtlai in khauphete zang in gawtna chi gietna asawl ahi ( Exodus 10:1-20). Khauphe te khun louhuon anesie un asusie uhi. Leitung ah kiel leh taah nasatah hing um tou zel ding ahi.

Kihilna 9: 13-21 akhun Pengkul Guhna mut ahitah in Sakol galkap tungtuong galkap honte (Dawi galkapte) atam dan uh tul mun tul zani (200 Millions) apha ua, amaute khun mihing te sethum suo sekhat athat kia ding uhi.

Kihilna 11:15-19 akhun Pengkul Sagina mut ahing hi tah in Van ah aw ngaitah in aging ta a, "Leitung leenggamte khu iMangpa leh Ama Khrist leenggam ahing hita a, Aman kumtawn kumtawn in vai ahawm ta ding hi," chi aw akiza a, tualeh Pasian mai a tou Upa 24 te khu khupboh in apua ua, Pasian abieh uh ahi.

Tam aw ging ngaitah kiza khu Van Lapawl ahi hi. Tam laa loupi khun leitung leenggam zousie iMangpa Jesu a ahita chi in zawna lapi kisahna ahi a, Second Coming hun a Mangpa Jesu Setan leh a galkapte hing zou ding hinanleh Van mipiten zawna laa ana sa masa ta uh ahi. 

Pengkul Sagi a gawtnate gimnei mama te khu Chiemtena Sagi kiphel zou chienga hing tung pai kia ding ahizieh in gawtna hing tung dingte khu nasahtah in huoise mama ding ahi hi. Tambang gawtna gimnei mamate ithuoh ding uh deilou in Mangpa'n Kalvary Kross ah suotatna leh hundamna dawngkot hing honpieh ahi unau ( Johan 3:16 ).

I Mangpa'n Tribulation gawtna chi 21 te ban ah kumtawn gawtmun meidiil ithuoh ding uh ahing phallou zieh in Hepina lienpi toh Kros ah hing tankhe zouta ahi.

Tunin iMangpa hing itdan leh hing hepidan ngaituo tha in A keengbul ah igitlouna teng utoh thupha tawi in ki surrender va ui.

Mangpa'n hing guolzawl hen๐Ÿ™



Simmun tuamtuam sim utte a di'n

Part - I
Part - II
Part - IV

















No comments

Powered by Blogger.