RAPTURE A PANGKHALOU TE SILTUOH DING GIMNEI- PART 1
RAPTURE A PANGKHALOU TE SILTUOH DING GIMNEI- PART 1
Rev.Stephen Khupsianlal
Tulai tah ihun zah ukhu Hepina Hun (Grace Period) ahi chi ithei uhi. Tam khu Pentecost Ni in ahing kipan a Rapture ahing tun chiengin tam Hepina Hun khu abei ta ding hi. Tuazou chiengin Gimthuohna or Gawtna Gimneitah Tribulation hun khum kum 7 ahing um ta ding ahi ( Daniel 9:27). Tribulation kum 7 hun akhun Gamsa or Anti-Christ khun nasatah in thuneina toh vai hing hawm ding a, khovel pumpi athunuoi ah akoi sawm ding hi.
RAPTURE NI CHIENGA SIL UMDING DAN
Jesu Khrist a pienthana dihtah neitute Rapture a lahtou a aum zouchienga sil umdan ding khu ngaituo hamsa mama ahi. Leitung a mihing simsenglou manding thu khu Social Media teng ah BREAKING NEWS ahi pai ding ahi. Lenna Pilot te umnawnlou zieh in passengers bangza khovel ah ashi diei? Lenna bangza apohkeh ta diei? Bus driver umlou ding zieh in passengers bangza ashi diei? 4 wheelers leh 2 wheelers driver umlou ding zieh in Road Accident bangza a um ta diei le? Tembaw (Ship) hehtu umlou ding zieh in mi bangza ashi diei? 1912 a Titanic tuohsiet kigen khu nepte hing hiding hi.
Hospital a doctor nurses tampi umtalou ding ahizieh in patients bangza abuoi zah ta diei le? Bieh inn a Pastorte or lamkai tampi te umnawnlou hun ah bangchi tuh in buoina apieng ta diei? Pasian thugentute lahmang a umding ahi chieng un biehinn kai in umzieh mawng mawng nei nawnlou ding hi.
Mathiu 24:37-44 akhun "Lou ah mi ni a um ding ua, khat lahmang in a um dinga, khatpen nuasie ahi ding hi. Numei ni ann sukhawm in a um ding ua, khat lahmang in a um ding, khat pen a kinuasie ding hi. Tuaziehin kiging zing in um un" chi imu ahi. Pienthana dihtah neitute khu lahtou in aum dinga, piengthaloute pen nuasie in a um ding uh chi na ahi.
Luk 17:34-36 akhun "Kahing hil ahi, tua zan in lupna khat ah mi ni alumkhawm ding ua, khat lahmang in a um dinga, khat nuasie in a um ding hi. Numei ni ann sukhawm in a um ding ua, khat lahmang in a um ding a, khat nuasie in a um ding hi. Mi ni lou lai ah a umkhawm dinga, khatpen lahmang in a um ding a, khat nuasie in a um ding ahi," achi ahi.
Rapture Ni khuo chieng leh nuasie a umte umding dan ingaituo leh chizat huoitah ahi hi. Kisuimawna nasatah a umta ding a, WatsApp, Facebook etc chin teng ah Mimang Suina/Missing etc te hing viral ta ding hi. Innkuon kim khahlou ding zieh in ka leh mauna ten innsung ah, vengsung leh khosung gamsung pumpi ah Rapture a lahmangte ngaina, suimawna zieh a kana thawmgin huoise mama ding hi.
Tuaban ah Rapture a pankhahlou kitheidohna ahing umngal dinga, Gawtmun Meidiil lut ding katave mo chia theichetna hing um ding zieh in B.P stroke or Hypertension, Heart Failure etc in tampi shi kia ding hi. Accidents zieh te leh Doctors, Nurses tampi umnawnlou ding zieh in mihing shi tampi umnalai ding hi.
Rapture Ni chieng in annkam tuina mawngmawng a um nawn sih ding a, ann nehlou in lah umthei ahisih dinga, ne in dawn ulezong atuina mawng mawng aum nawn sih ding ahi. Tu Hattuom Hunsung a bawn setan nasepna gending umthei nalai ahi lai in Rapture chienga piengthate umlou tah chieng in dawi tampi mu na, dawi nasep huoisetah tah in nuasie a umte zial nalai ding hi.
Rapture a pangkhaloute a dingin kinepna mawng mawng a umnawn sih ding a, zauthawngna, thawmhauna, pangpatna, chimaw mangbatna khovel a na umngàilou te khu a um ta ding ahi. Tambang dinmun hing hita ding ahizieh in piengtha kichiennailou nahi leh na hundamna siemtup tan unau. Pasian thu a chiengnailou nahileh Pastor, Upa or Evangelist etc te ki doh kinkin in.
Rapture nuachieng in Pasian thu hing genpieh ding mi a umnawn sih ding ahi. Mit inei pet un Pasian Thu simvai, hun inei pet un hun nukhieh lam sil theisiem sawm vai. Bible in hun nukhieh lam chienga sil tung ding a agente lah aban ban in ahing tung tou ditdetta a, mit phet kal in van peengkul hing ging pai ta ding dinmun ah i um ta uhi.
Tun shi le chin vangam na lut na diei? Rapture hing tung taleh lahtou te lah ah na pang na diei? Ki ngaituo va ui🙏
Bangdinga Tribulation hun or Anti-Christ hun kipan nailou amah ichi chieng in daaltu um ahidan Laisiengthou in gen hi (2 Thessalonika 2:3-8) Tuakhu Rapture umnailou zieh ahi.
No comments