RAPTURE HUN A THUKHENNA LEH NUOMMAN HAWMNA

RAPTURE HUN A  THUKHENNA LEH NUOMMAN HAWMNA 
Rev. Stephen Khupsianlal

Text: 2 Korinth 5:10 

Laisiengthou akhun mihingte tunga vaihawmna chituom tuom hing um ngei ding ahidan akigen hi. Tuabang vaihawmkhumna or thukhenna pen atun hun atuom tuom ahiding hi.

Tuabang a thukhenna tuom tuom hing tung dingte khu  abawn in igen nai sih ding ua, Khrist sisan zal a hundam a um, Amisiengthoute huikhuo a ahing khopkhawm hun (Rapture) chieng a thukhenpieh a ium ding dan uleh nuomman dingte igenkhawm masa ding uhi.

KHRIST THUKHENNA TOUPHA (Seat of Bema Judgment) 

2 Kornth 5:10 khun " Aziehpen michin tahsa a aum sunga asil bawlte asie apha abawl dungzui a asep man anga theina dinga Khrist thukhenna toupha mai ah ding teitei ding ahi uhi," akichi hi. Tam vaihawmna hun ding khu Rapture hun a iMangpa Jesu toh huikhuo a iki mutuo hun chieng un um ding ahi. Tam vaihawmna hun kizang ding pen piengthate ading bou ahia, vangam lut di chietchiet hinanlei jong isilbawlte uh asie-apha bangpen atamzaw in atawm zaw diei, tuami dungzui a nuomman imu hun ding ukhu ahi.

1 Thessalonika 4:13-17 akhun" Hinanleh unaute aw, kinepna neilou midangte bang a, na lungkham louna ding un, imute tungtang na theilou uh kadei sih hi. Aziehpen Jesu ashi a, a thou kia ta chi igintat leh Jesu a imute zong Pasian in Ama toh ahing puikhawm ding hi. Tami Mangpa thu in nakung uah kagen uh ahi, eite Mangpa hingpei donga, dam a na um nalaiten imusate imakhel sih ding hi. Aziehpen Mangpa ngei khu kikou aw toh, vansawltah tungnung pen aw toh, tualeh pengkul gingtoh van a kipat hing kumsuh ding ahi, tualeh Khrist a shisate a thou masa ding uhi. Tuazou chiengin ei hinga na um nalaite huikhuo ah Mangpa tuoh dingin amau toh meipi lah ah lahtou in i um dinga, tuachin kumtawn in Mangpa kungah i um tading hi. Tuaziehin tam thute in noute khat leh khat ki hamuon tuo chiet un," achi hi.

Tam hun akhun tam anuoi a bang in thukhenpieh in ium ngei ding uh ahi:-

Inasep dan chiet uh hing kilangta ding hi: 

1 Korinth 3:13 ," Michin a nasep dan chiet uh ahing kilang ding hi, aziehpen a ni in aphuong doh ding hi. Mei a suhlat a umding ahiziehin michin nasep bang chibang ahiei chi mei in a suchien ding hi," chi akimu ahi. Tualeh Thugenpa 12:14 akhun "Aziehpen Pasian in sil kibawl zousie, ahoi leh asia hitaleh, sil kiphuolgu zousie thukhenna mun ah atut ding hi," akichi kia ahi. Leitungah Pasian nna bang ichi sep vuai, isem tam uai or isemtawm uai chi khu hing kilang chien ta ding hi. Tuami dungzui in nuomman imu ding ahi.

Ithugente uh zousie  iphuongkhe ding uhi: 

Mathiu 12:36 akhun,"  Hinanleh kahing hil ahi, miten thu ginalou agen pouma uh thu khenni chiengin, azieh agen ding uhi. Nathu in siem tansah in na um ding a, na thu ma in siemlou tansah in na um ding hi," chi akigiel hi. Tuazieh in ikamte ukhu thuhoi lahoi genna a izah ding uh poimaw mama hi.

Ilunggel-ngaituona thuguh te thukhenpieh ihiding uhi:

Rome 2: 1 , "Ka khantanhoi gen dungzui a Pasian in Jesu Khrist zanga mihingte thuguh, vai ahawmpieh ni chiengin chi thu imu kia uhi. Tamteng ban azong sil tampi isep ibawlte uh zousie thukhenpieh in i um ding uh ahi. Galatia 6:7-8 khun "Sol in umsih un, Pasian pen simmaw guol a hisih hi, aziehpen mi'n atu phot uh tua ma a at ding uhi. Aziehpen tahsa lam a tu mi in tahsa lam a sietna a at dinga, hinanleh Hagau lam a tu mi in Hagau ah kumtawn hinna a at ding hi," achi ahi. 

Gingtu ten iPasian bieh dan uleh anua izui dan uh kingaituo pha chiet va ui. Inu leh Pa, iPi leh Pu te Khristian ahizieh ua eizong hundam a kikoi mai mai ihikha uh ama, ahisih leh piengtha tah tah ihina uoi ki gelpha chiet va ui.

Hun hoi inei lai pet ua i kisiemtha  lou ua Mangpa Jesu khu Mang leh Hundampa a ikipom kin lou ua silhoi tampi ibawlman lou uleh anuoi a nuommante imu sih ding uh ahi. Tuakhu silzum huoipen ahing hiding ahi.

1. Guolzawna Lukhu Setheilou 

1 Korinth 9:25  "Mi koipou kipahman sang dinga kidemna a pang mite sil zousie ah ama leh ama akithunun uhi. Ama un guolzawna lukhu sethei sang dingin apang ua, eite pen in asetheilou guolzawna lukhu sang dingin ipang uhi," chi imu uhi.

Silbangkim a mahni kithunun a gingtu hinkhuo hoitah a zangtuten asetheilou guolzawna lukhuh aki san ding uh ahi. Imasang ua umum ineh ua idawn uleh igingtu hinkhuo isuse ding uh ahi. Tuaziehin thumna toh pang in mahni kithunun sawm zing ding ahi.

2. Kipahna Manglukhu 

1 Thessalonika 2: 19  "Aziehpen ka kinepna uleh, kaki pahna uh, ahisih leh ka kipahna manglukhu uh bang ahiei? Ahing pei chienga iMangpa Jesu mai a noute mama na hisih ding uh amah?"

Hagau mangthai man tuten tam kipahna manglukhu asang ding uhi. Eiten hagau mangthaite khu missionary te nasep or evangelist te mawpuohna bang in ingaituo uhi. Nanleh ibawn un mawpuohna inei chiet uh ahia, i umna mun chiet uah Gospel phuongzah ding in Witness dingte ihi chiet uhi. Tuazieh in hagau mangthai veina chiet in matsawm chiet va ui.

3. Dihtatna Manglukhu 

2 Timothy 4:8 " Tu in dihtatna manglukhu kei a dingin koi in a umta, tuakhu Mangpa vaihawmpa dihtah in tua ni chiengin kei ahing pe ding hi..."

Imimal hinkhuo uah, office kaina mun ah, isepna mun chiet uah leh hattuom pawlpi te ah dihtatna tasam mama hi. Corruption toh kithuo gingtu hinkhuo zangten tam dihtatna manglukhu amu sih ding uhi. Hattuom lamkai ihina te ukhu chance lemtang la a Pasian sum zatatna neilou a mahni hamphatna ding a zang or thangbawl ihi khah leh ei a ding in supna leh maizumna higiap ding hi. Tuaziehin, Sawltah Paul bang in eite jong dihtatlouna, gutatna, lepchiena zousie te paikhie in pan latha chiet va ui.

4. Hinna Manglukhu 

Jakob 1:12 , "Ze etna thuoh teitei mi khu ahampha hi, aziehpen etkhieh a a umzou chiengin Mangpa'n ama itte kunga apieh ding a achiem sa hinna manglukhu asang ding hi." Gingtu hinkhuo ah ze-etna tuom tuom ituoh tou ding uh ahi. Hinanleh kumbang ze-etna gingtu hinkhuo puisethei dingte apat gin umtah a ipan uleh hinna manglukhu isang thei pan ding uh ahi.

5. Thupina Manglukhu 

1 Peter 5:4 " Tualeh Belampu lianpen a hing kilah chiengin, atultheilou thupina manglukhu na sang ding uhi." Pasian nasem Pastorte, Missionaryte, evangelist te a ding in atuom mawng mawng in tami thupina manglukhu bawlpieh a um ahia, belampu lianpen iMangpa Jesu deidan leh hing ngansie banga isep lou ua, ibawllou uleh ki sang lou ding hi. Tuakhu hing zumhuoi mama ding hi.

6. Sana Manglukhu 

Kihilna 4:4 "Tua mangtoupha kimkot ah, mangtoupha sawmnilehli a um a, tualeh tua touphate tungah upa sawmnilehli puon vam sil a tou kamu a, ama un sana lukhu a lutung uah a khuh uhi." Hattuom Upate a ding in sana manglukhu koi pieh in a um a, tuamai hilou in puon vam jong silsah ahidan uh imu uh ahi. 

Tambang a nuomman thupi koipieh a um ahilam theilou in Upa tamtah ten kei law kasang sih ahi chi in thasetah a mihing nasem bang a kingaituo belam pu apang kitam ding hi. Tambang ngaituona neiten nuomman hawm ni chieng a i sankhahlou ding pen hing zumhuoi mama hi ding hi.

Rapture hun a Mangpa Jesun leitunga  ihinkhuo mandan uh dungzui a nuomman ahing hawm hun chieng in atamthei bang sangthei ding in pan latha chiet va ui chi in ikichiel uhi. Khovel buoidan ngaituo in sem utlei jong iseptheilou hun hing tung ta abang ta a, Rapture jong nai mama ta hi. Tuazieh in inuomman muding ukhu eimau sepdan a kinga chiet ahizieh in midang ngansie da va ui.

" Ngaiin, hing pei pai ding ka hi, na manglukhu koiman ahing lahpieh lou na ding in na neisa kembit in." Kihilna 3:11 

Mangpa'n hing guolzawl hen🙏