RAPTURE: TATSATE KHOPKHAWM NI DING NAI MAMATA

RAPTURE: TATSATE KHOPKHAWM NI DING NAI MAMATA 
Rev. Khupsianlal

(1 Thessalonika 4: 13-18; 2 Thessalonika 2:2) 

Khovel a siltung zelte ingaituo in gingtute a ding in imasang ua program poimaw mama khat hing tung pai ding khu RAPTURE ahi hi.

Rapture chi  khun Mangpa Jesu muong a hundam a umte Ama tatsate, A sisan a chiemte a umte la ding a ahing pei ni ding genna ahi. 

Tam ni chieng in iMangpa khu vansawltah tungnung pen aw toh, tualeh pengkul ging toh van apat hing kum suh ding ahi. Tuanah Khrist a shisate athou masa ding ua, tuazou chiengin hing a na umnalai gingtute khu huikhuo ah Mangpa tuoh ding in meipi lah ah lahtou in um ding uhi.

Rapture ni chieng in a utut moh pantheilou ding ahi. I Mangpa Jesu Khrist sisan a chiemte a um (Ephesa1:13;  4:30) Ama muong leh gingta adeilam bawlte bou lahtou in um ding uhi. Rapture masang a gingtu (Christian) shi masate hagau khu iMangpa toh hingkum suh khawm ding uhi.

Rapture ni a lahtou a umkhalou te khu mivangse tawpkhoh te ahi ding ua, amaute khu Pasian vaihawmna masang ah a ding ding uhi (Revelation 20:12) Nanleh Ama muong leh gingtate pen Vaihawmni chieng in ading sih ding uhi (Johan 5:24) 

Rapture hun a lahtou a um gingtute tahsa khu suhlamdang in a um pai ding ahi. Tua mi Van thuom a kithuom tahsa khun Vangam hi in khovel ah hitaleh lutmawna tatmawna anei nawn sih ding hi. Vangam ah alut thei ding a, Mangpa ngei toh leitung azong akum thei tahsa ahiding ahi. Tuabang khu shina zou a thoukia iMangpa tahsa khu ahi. (1 Korinth 15:51) 

Rapture hun a lahtou a um gingtute khun, Mangpa'n mun tampi ava bawlna mun, khut a lamlou kumtawn vangam ah puitou in a um ta ding uhi.

Rapture a lahtou hun toh kizawh in Mangpa'n khovel damlai hun a silhoi isep tam leh iseptawm dungzui in nuomman hawmkhietna hun (prize distribution ceremony ) ahing zahpi ta ding ahi (2 Korinth 5:10)

Tam Nuomman hawmhun khu Khrist in gingtute kungah kipahman amuding dawl uh ahawmkhietna hun ahi a, tualeh Pasian leenggam-kum sang leenggam tunding ahi hun chieng a satan ( portfolio ) hawmpieh a um ni jong ahingal ding ahi.

Rapture hing tun masang a shina ituoh khah ta ulejong Mangpa kunga tung ngei ding a ikisingsah chiet uh poimaw mama ahi hi. Rapture ni ilap kha unjong lahtou a umte lah a pang ngei ding a ikisah chiet ding uh ahi. Nang mai hilou in na innkuonpite zousie zong lahtou ni chieng a pangkim tei ding in nahinkhuo zang hoi in (Luk 12:37)

Rapture nikhuo hing tunna dinga iMangpa'n achiemte aban ban in ahing tung ditdet ta a, atungbei dikuon ahita ahi. 

Mak 13:28 ah " Tuachi'n theipi kung ah gentena thu zil un, abate a hing dawn suong a, a nate a hing sel chiengin nipi anaita chi na thei uhi ," chi kimu hi.

Bang agenna ahidieile? Israelte kumtampi mite suoh leh sal in ana um ua, nanleh tu in UNO in Israel State ana pezouta uh ahi. Refugee banga ava umna uh mun tuom tuom te apat in agam uh Israel gam uah ahing kinuale pan ta uhi. 

Mangpa thu amanlou zieh un kum tamtah gawtnate thuo in suoh leh sal in na umta nan ulezong Mangpa'n khovel a dia A namtel te ahizieh un ahoi na ding uh alemgel pieh veve ahi. Israelte khankhuo akhuol tah zieh in Mangpa'n tambang sil ahing um chieng leh NIPI ANAITA chi thei un chi hi. Tami in a etsah khu Rapture anaita china ahi. 

Mihing ihi ua, neh leh tah khankhuo isai ding ma uh ahina hi, nanleh imaban ua Rapture nikhuo hing tung ding thupoimaw tah manghil leh nelsie zen in vang leihinkhuo buoipi seng da va ui unaute dachia vaigei ta ding ahi hi.

Mangpa'n hing guolzawl hen🙏