UPNA IN GUALZAWHNA HI

UPNA IN GUALZAWHNA HI
Nisim Manna

𝘽𝙪𝙡𝙥𝙝𝙪𝙝: 𝙋𝙖𝙨𝙞𝙖𝙣' 𝙩𝙖 𝙖 𝙝𝙞𝙩𝙚 𝙥𝙚𝙪𝙝𝙢𝙖𝙝 𝙞𝙣 𝙡𝙚𝙞𝙩𝙪𝙣𝙜 𝙣𝙖𝙩𝙚 𝙯𝙤 𝙪𝙝 𝙖, 𝙞 𝙪𝙥𝙣𝙖 𝙩𝙖𝙬𝙝 𝙡𝙚𝙞𝙩𝙪𝙣𝙜 𝙣𝙖𝙩𝙚 𝙩𝙪𝙣𝙜𝙖𝙝 𝙖 𝙜𝙪𝙖𝙡𝙯𝙤 𝙞𝙝𝙞 𝙝𝙞. 𝙅𝙤𝙝𝙖𝙣 𝙈𝙖𝙨𝙖 5:4

Johan in hih munah Khristiante pen a gualzote ihihna hong gen hi. Bang hang hiam cih leh eite hong honpa i Topa pen khuamial in a zawhlohpa hi a ( Jn. 1:5 ), leitung nate a zokhinpa ahi hi ( Jn. 16:33). Tua manin Topa nungzui eite in gitlohna kizosak lo-in, hoihna tawh gitlohna a zo dingte hihang ( Rom 12:21). Tua Topa nungzui eite pen Dawimangpa a zo khinte ihi a, ( 1Jn.2:13 ), leitung mite a panpih Dawimangpa sangin eite hong ompih i Pasian vanglian zaw hi ( 1Jn.4:4 ). Tua hi a eite pen i Topa in zawngkhal tak leh thanem takin hong nutsiatte ki hilo hi, cih i kitheih ding kisam hi. Tua tham lo-in leitungah i do dingte khempeuh i Topa Jesu in hong zawhsaksa hilai hi! 

Koi bangin Khristiante in leitung nate kizo hiam? A neu 5na ah, Jesu pen Pasian' Tapa hi cih a umte bek in zo ding, ci hi. Tua pen Johan in a neu 4na ah " Upna tawh leitung nate tungah a gualzo," na ci hi. Tua hi-a Khristiante in 'upna' i neih pen i gualzawhna hi. Bang hang hiam cih leh eite pen Khris in nuntak tawntungna hong piakte (Jn.3:16) leh a cingtaak nuntakna hong piakte ihi hi (Jn.10:10). Tua manin kithanem sak kei in. Na tha khauhsak in. Na upna in gualzawhna hong pia ding hi. 

𝐊𝐢-𝐚𝐩𝐧𝐚: 𝐓𝐨𝐩𝐚 𝐚𝐰, 𝐮𝐩𝐧𝐚 𝐭𝐚𝐰𝐡 𝐥𝐞𝐢𝐭𝐮𝐧𝐠 𝐧𝐚𝐭𝐞 𝐤𝐚 𝐳𝐚𝐰𝐡𝐧𝐚 𝐝𝐢𝐧𝐠𝐢𝐧 𝐉𝐞𝐬𝐮 𝐊𝐡𝐫𝐢𝐬 𝐦𝐢𝐧 𝐢𝐧 𝐤𝐨𝐧𝐠 𝐤𝐢-𝐚𝐩 𝐡𝐢. 𝐀𝐦𝐞𝐧!